އެމްއެމްޕީއާރްސީގެ ފަރާތުން 2014 ވަނަ އަހަރާއި 2015 ވަނަ އަހަރު ކުއްޔަށް ދިން 50 ފަޅު ރަށާއި ފަޅުތަކުގެ ތެރޭގައި ހިމެނޭ އއ. މަތިވެރި ކައިރި އޮތް ފަޅު އެ ރަށުގެ ރައްޔިތުން އެދިފައިވާ ގޮތަށް ކައުންސިލުގެ އިހުތިސާސްގައި ހިމެނުމުގެ އެންމެހާ ކަންކަން ނިމިފައިވާ ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
އޮކްޓޯބަރު 21, 2021 ގައި ރައީސް ސޯލިހު މަތިވެރިއަށް ކުރެއްވި ރަސްމީ ދަތުރުފުޅުގައި އެ ރަށު ކައުންސިލުން އެދުނީ، މަތިވެރިއާ 100 އެއްހާ މީޓަރު ދުރުގައި އޮންނަ ފަޅު އެ ރަށުގެ އިހްތިސާސްގެ ތެރެއަށް އަލުން ވައްދައި، ފަޅުގެ ނަފާ ރަށު މީހުންނަށް ލިބޭނެ ގޮތް ހަދައިދިނުމަށެވެ.
އޭގެ 664 ދުވަސް ފަހުން, މިއަދު މަތިވެރި އެމްޑީޕީ ޖަގަހައިގައި ހުންނަވައި ރައީސް ވަނީ އެކަން އެގޮތަށް ކުރުމުގެ އެންމެ ފަހުގެ މަރުހަލާގައި އޮތްކަން ހާމަކުރައްވާފަ އެވެ.
"ކައުންސިލުން އެދުނީ އެ ރަށް ރަށުގެ އިހުތިސޯސުގެ ތެރޭގައި ހިމެނުމަށް. މަތިވެރި ފިނޮޅުގެ ހުރިހާ ކަމެއް ނިމި ކައުންސިލުގެ އިހުތިސޯސްގެ ތެރެއަށް ލާން އެއޯތީ ތައްޔާރުވެފައި. ވަޒީރުންގެ މަޖިލީހުގެ ބައްދަލުވުން ދެން ބާއްވާ ދުވަހަކުން އެކަން ނިމިގެންދާނެ," ރައީސް މިއަދު ވިދާޅުވި އެވެ.
ބެލެވޭ ގޮތުގައި އަންނަ ހަފްތާގައި ބާއްވާ ވަޒީރުންގެ މަޖިލީހުގެ ބައްދަލުވުމުގައި މިކަމާ ގުޅޭގޮތުން ގޮތެއް ނިންމާނެ އެވެ.
ރައީސް ވިދާޅުވި ގޮތުގައި އިދިކޮޅުގައި ތިއްބެވި ބޭފުޅުންގެ ޗާޓަކަށް ކުދި ރަށްތަކެއް ނާރަ އެވެ. އަންނަ އިންތިހާބުގައި ވޯޓު ދޭއިރު 2013 އިން 2018 އަށް ހިންގި ޕީޕީއެމްގެ ވެރިކަމާއި މިހާރު ހިނގަމުންދާ އެމްޑީޕީގެ ވެރިކަމާ އަޅައިކިޔުމަށް ފަހު ރަނގަޅަށް ވިސްނައި ގޮތެއް ނިންމުމަށް ރައީސް އެދިވަޑައިގެންނެވި އެވެ.
"އެއް ފަޅީގައި އޮތީ 2013 އިން 2018 އަށް ވެރިކަން ކުރި ޕާޓީ. އެ މީހުންގެ ވިސްނުން ހުރި ގޮތް އެންމެނަށް އެނގޭ. ހުށަހަޅަމުން ދަނީ ވެސް އެފަދަ ކަންކަން. ރަނގަޅަށް ފުންކޮށް ވިސްނުމަށް ފަހު ގޮތް ނިންމުމަށް އެދެން," ރައީސް ވިދާޅުވި އެވެ.
މަތިވެރިއަށް ވެސް 2018 ގައި ގިނަ ވައުދުތަކެއްް ވި ކަމަށާއި އަދި މިހާރު މަސައްކަތްތައް ކުރިއަށްދާ ގޮތަށް ގޮސް ހުރިހާ ވައުދެއް ފުއްދަވާނެ ކަމުގެ ޔަގީންކަން ރައީސް ދެއްވި އެވެ. އަދި, އެމަނިކުފާނަށް ވޯޓު ދެއްވުމަށް މަތިވެރީ ރައްޔިތުންގެ ކިބައިން އެދިވަޑައިގެންނެވި އެވެ.
