ސެޕްޓެމްބަރު 9 ގައި ބާއްވާ ރިޔާސީ އިންތިހާބު ޕީޕީއެމް/ޕީއެންސީ އަށް ކާމިޔާބު ވެއްޖެ ނަމަ މިހާރު ތަރައްގީ ކުރަމުންދާ ހަނިމާދޫ އިންޓަނޭޝަނަލް އެއާޕޯޓު ޕްރޮޖެކްޓު ހުއްޓުވައި، އެއާޕޯޓު ނައްތާލާނެ ކަމަށް ފޮރިން މިނިސްޓަރު އަބްދުﷲ ޝާހިދު ރޭ ވިދާޅުވެއްޖެ އެވެ.
އެމްޑީޕީގެ ރިޔާސީ ކެންޑިޑޭޓު ރައީސް އިބްރާހިމް މުހައްމަދު ސޯލިހުގެ ސޯސަން ޖަގަހައިގަ ރޭ ވާހަކަ ދައްކަވަމުން ޝާހިދު ވިދާޅުވީ ޕީޕީއެމްއިން ވެރިކަމަށް އައުމަށް ރާވާފައިވާ ރޭވުމުގެ ތެރޭގައި ހަނިމާދޫ އެއާޕޯޓު ނައްތާލުން ހިމެނޭ ކަމުގެ މައުލޫމާތު ލިބިވަޑައިގެންފައިވާ ކަމަށެވެ.
titledesc
"އެކަމުގެ މައުލޫމާތުތައް އަޅުގަނޑުމެންނަށް ލިބެމުން ދަނީ. ރޭވުންތައް އެ މީހުން ރާވަމުން ދަނީ. މުޅި ހަނިމާދޫ ޕްރޮޖެކްޓް އެ މީހުން އޮތީ ބޭރުކޮށްލަން ނިންމާފައި،" ޝާހިދު ވިދާޅުވި އެވެ.
ޕީޕީއެމްގެ ވެރިކަމުގައި އެއްވެސް ކުރިއެރުމެއް ބޮޑު ތިލަދުންމައްޗަށް ނުލިބޭނެ ކަމަށާއި ވޭތުވެދިޔަ ވެރިކަމުގައި ވެސް އެ ސަރަހައްދަގެ ރަށްތަކަށް ތަރައްގީގެ މަސައްކަތްތަކެއް ކޮށްދެއްވާފައި ނެތްކަމަށް ޝާހިދު ވިދާޅުވި އެވެ.
ބޮޑުތިލަދުންމަތީގެ ރަށްތަކުގެ ތެރެއިން އިގުތިސޯދީ ގޮތުން އެންމެ ވަރުގަދަ ހދ. ކުޅުދުއްފުއްޓަށް ޕީޕީއެމްގެ ވެރިކަމުގައި އަދި އިދިކޮޅުގެ މިހާރުގެ ކެންޑިޑޭޓު މުހައްމަދު މުއިއްޒު މިނިސްޓަރަކަށް ހުންނެވި ހަތް އަހަރު މާ ގިނަ ކަންތައްތަކެއް ކޮށްދީފައި ނެތްކަން ވެސް ޝާހިދު ފާހަގަ ކުރެއްވެވި އެވެ. ބޯހިޔާވަހިކަމުގެ އެންމެ ޓިނުގަނޑެއް ވެސް މުއިއްޒުގެ މިނިސްޓަރުގައި ކުޅުދުއްފުށީގައި އަޅާފައި ނެތް ކަމަށް ޝާހިދު ވިދާޅުވި އެވެ.
ހަނިމާދޫ އެއާޕޯޓުގެ މަޝްރޫއު ރަސްމީކޮށް ފެށުމަށް މި އަހަރުގެ ޖެނުއަރީގައި ބޭއްވި ރަސްމިއްޔާތުގައި ރައީސް ސޯލިހު ވިދާޅުވީ "މި އެއާޕޯޓު ވެގެން ދާނީ ބޮޑުތިލަދުންމައްޗާއި މި އުތުރުގެ ރައްޔިތުން ފަހުރުވެރިވާނެ ފަދަ ޒަމާނީ އެއާޕޯޓަކަށް،" ކަމަށެވެ.
"މި އެއާޕޯޓް ނިމުމާއެކު، ސީދާ ގޮތުންނާއި ނުސީދާ ގޮތުން މި ސަރަހައްދުގެ އިގުތިސޯދު ފެނުން ތޮޅިލައި އުދަވާން ފަށާނެ،" އެ މަނިކުފާނު ވިދާޅުވި އެވެ.
އިންޑިއާގެ އެގްޒިމް ބޭންކުގެ ލޯނުން ހިންގާ މި މަޝްރޫއު ވެގެންދާނީ އެއާބަސް އޭ320 އަދި ބޯއިން 737 މަރުކާގެ ބޯޓު ފަހަރު ޖެއްސޭ ފެންވަރުގެ ރަންވޭ އަކާއި، މިލިއަނުން ޕަސެންޖަރުންނަށް ހިދުމަތް ދެވޭނެ ޖާގަ ތަނަވަސް އެއާޕޯޓަކަށް ކަމަށް ސަރުކާރުން ބުނެ އެވެ.
