ޖަންގަލިތަކުގައި ރޯވެ ފެތުރޭ އަލިފާންގަނޑުތައް އަވަހަށް ދެނެގަތުމަށް، ކެލިފޯނިއާގެ ފަޔާ ފައިޓަރުން އާޓިފިޝަލް އިންޓެލިޖެންސް (އޭއައި)ގެ ޒަމާނީ ޓެކްނޮލޮޖީ ބޭނުންކުރަން ފަށައިފި އެވެ.
އެގައުމުގެ ފަޔާފައިޓަރުން ދަނީ އޭއައި ބޭނުންކޮށްގެން މުޅި ސްޓޭޓްގެ 1،000 އަށް ވުރެ ގިނަ ސަރަހައްދެއްގެ ވީޑިއޯ ފީޑްތައް ތަހުލީލު ކުރަމުންނެވެ. އެއްވެސް އަލިފާނެއްގެ އަލާމާތެއް ފާހަގަކުރެވިއްޖެ ނަމަ މި އޭއައި ސިސްޓަމުން ކުއްލި ހާލަތުގައި ހަރާކްތެރިވާ ފަރާތްތަކަށް ވަގުތުން އެލާޓް ކުރެ އެވެ.
"އެލާޓް ކެލިފޯނިއާ" ގެ ނަން ދީފައިވާ މި އޭއައި ސިސްޓަމްގެ އެހީގައި މިދިޔަ މަހުވެސް ވަނީ އަލިފާންގަނޑެއް ނިއްވާލާފަ އެވެ. ސެން ޑިއޭގޯގެ އިރުމަތިން ގާތްގަނޑަކަށް 80 ކިލޯމީޓަރު ދުރުގައި އޮންނަ ކްލީވްލެންޑް ނޭޝަނަލް ފޮރެސްޓްގައި މެންދަމު 3 ޖަހާއިރު އަލިފާން ރޯވިކަން ކެމެރާއަކުން ވަނީ ދެނެގަނެފަ އެވެ.
އަނދިރިކަމާއި މީހުން ނިދާ ވަގުތަކަށް ވުމުން މިއީ އަލިފާންގަނޑު ފެތުރެ ހާލަތު އިތުރަށް ގޯސްވުމުގެ ފުރުސަތު އޮތް ވަގުތެކެވެ. ނަމަވެސް އޭއައި އިން ވަގުތުން ފަޔާ ކެޕްޓަނަކަށް އެލާޓް ދިނުމުން ގާތްގަނޑަކަށް 60 ފަޔާ ފައިޓަރުން ވެގެން ވަނީ 45 މިނެޓުގެ ތެރޭގައި އަލިފާންގަނޑު ކާމިޔާބުކަމާއެކު ނިއްވާލާފަ އެވެ.
މި ނިޒާމުގެ ފަހަތުގައިވާ ޓެކްނޮލޮޖީ އުފެއްދީ ޔުނިވާސިޓީ އޮފް ކެލިފޯނިއާ ސެން ޑިއޭގޯގެ އިންޖިނިއަރުންނާއި ކެލިފޯނިއާގެ ޗިކޯގައި ހުންނަ ޑިޖިޓަލްޕަތާ ގުޅިގެންނެވެ. މި ޕްލެޓްފޯމް ބަރޯސާވެފައިވަނީ މުޅި ކެލިފޯނިއާގެ އެކި ޕަބްލިކް އެޖެންސީތަކާއި ޕަވަ ޔުޓިލިޓީތަކުން އިންސްޓޯލްކޮށްފައިވާ 1،038 ކެމެރާއަށެވެ. މި ކެމެރާތަކަކީ ރިމޯޓްކޮށް 360 ޑިގްރީއަށް އެނބުރޭ ކެމެރާތަކެކެވެ.
ޖުލައި މަހުގެ 10 ވަނަ ދުވަހު ފެށި އޭއައި ޕްރޮގްރާމުން އުއްމީދީ ނަތީޖާތަކެއް ފެނިގެން ގޮސްފައިވާކަމަށް އެގައުމުން ބުނެ އެވެ. ކެލިފޯނިއާ ޑިޕާޓްމަންޓް އޮފް ފޮރެސްޓްރީ އެންޑް ފަޔާ ޕްރޮޓެކްޝަން (ކެލް ފަޔާ) އިން ބުނެފައިވަނީ އެއްވެސް ފަރާތެއް އެމެޖެންސީ ނަންބަރަކަށް ގުޅުމުގެ ކުރިން އޭއައި އިން ފަޔަ ކެޕްޓަނުންނަށް އެލާޓްކުރާ ކަމަށެވެ.
ކެލް ފަޔާ އިން ގަބޫލުކުރާގޮތުގައި މި ޓެކްނޮލޮޖީ ދުނިޔޭގެ އެހެން ސަރަހައްދުތަކަށާއި ގައުމުތަކަށް ނަމޫނާ މޮޑެލްއަކަށް ވެގެންދާނެ އެވެ. މިއަހަރު ހަވާއީ، ކެނެޑާ، އަދި މެޑިޓެރޭނިއަން ކަނޑު ފަދަ ތަންތަނުގައި ހިނގަމުންދާ އާދަޔާ ހިލާފު އަލިފާންގަނޑުތަކުގެ ސަބަބުން މިކަމުގެ މުހިންމުކަން އިތުރަށް ފާހަގަކުރެވެ އެވެ.
