ލަހައިނާ، އެމެރިކާ (އޯގަސްޓު 12) - އެމެރިކާގެ ހަވާއީ ސްޓޭޓުގެ ޖަންގަލީގައި ރޯވެ މަރުވި މީހުންގެ އަދަދު 80 އަށް އަރާފައި ވާއިރު، އެކަމާ ގުޅޭ ތަހުގީގެއް ހިންގަން ހަވާއީގެ ޗީފް ލީގަލް އޮފިސަރު ނިންމަވައިފި އެވެ.
އަލިފާން ރޯވުމުގެ ސަބަބުން ލަހައިނާ އަވަށުގެ ބޮޑު ބަޔެއް އަނދައި އަޅިއަށް ވެފައިވާ އިރު، އެ އަވަށުގެ މީހުން އެނބުރި އަވަށަށް ދިޔުމަށް ހުއްދަ ދިނީ ހޮނިހިރު ދުވަހު އެވެ. މީހުން އެނބުރި ދިޔަ އިރު، ގެތައް ހުރީ ސުންނާފަތިވެފަ އެވެ.
އެ މީހުން ސަރުކާރާ މެދު ހިތްހަމަނުޖެހި ފާޑުކިޔަމުންދާ އިރު، ހަވާއީގެ އެޓޯނީ ޖެނެރަލް އޭން ލޮޕޭޒް ވިދާޅުވީ އަލިފާނުގެ ހާދިސާއާ ގުޅިގެން ހުރި ޝައްކުތަކާއި ޝަކުވާތަކާއި އޮފިޝަލުން އަމަލުކުރި ގޮތުގެ ތަހުގީގެއް ހިންގަވާނެ ކަމަށެވެ. ތަހުގީގުގެ ހޯދުންތައް އާއްމުކުރާނެ ކަމަށް އޭނާ ވިދާޅުވި އެވެ.
މަރުވި މީހުންގެ އަދަދު 80 އަށް އަރާފައިވާ އިރު، 1،418 މީހުން ތިބީ ވަގުތީ ހިޔާތަކުގަ އެވެ. ހަވާއީގެ އިތުރުން އުތުރު އެމެރިކާ އާއި ޔޫރަޕްގެ ބައެއް ހިސާބުތަކުގައި މި ހޫނު މޫސުމުގައި އާދަޔާ ހިލާފަށް ހޫނުގަދަވެ، ޖަންގަލިތަކުގައި ރޯވެފައިވެ އެވެ.
