ކުރިއަށް އޮތް ރިޔާސީ އިންތިހާބަށް ޕީޕީއެމުން ރިޔާސީ ކެންޑިޑޭޓެއް ނުނެރުމަކީ އެ ޕާޓީގެ ލީޑަޝިޕްގެ ހިޔާނާތެއް، އަދި އަނިޔާވެރި އަމަލެއް ކަމަށް ވިދާޅުވެ، ކުރީގެ ރައީސް އަދި ޕީޕީއެމްގެ ސީނިއާ އެޑްވައިޒަރު އެ ޕާޓީން ވަކިވެވަަޑައިގެންފި އެވެ.
ވަހީދު ޕީޕީއެމްއިން ވަކިވެވަޑައިގެންނެވިކަން ހާމަ ކުރެއްވީ ޓްވިޓާގައި އާއްމުކުރެއްވި ބަޔާނަކުންނެވެ.
އެ ބަޔާނުގައި ވިދާޅުވީ ޕީޕީއެމްގެ ޕީޕީއެމްއިން ވަކިވެވަޑައިގަތުމަށް ނިންމެވީ ފަރުވާތެރިކަމާ އެކު ވިސްނެވުމަށް ފަހު ކަމަށެވެ.
"...އަޅުގަނޑަށް އިހުސާސް ކުރެވެނީ އަޅުގަނޑުގެ ހުނަރު، ތަޖުރިބާ އަދި އިލްމު، ހަމަޖެހުމާއި ނަޒާހަތްތެރިކަމާއި ތެދުވެރިކަން އޮތް މާހައުލެއްގައި ހުރިހާ ދިވެހިންގެ ކާމިޔާބީއަށް ޓަކައި ބޭނުންކުރުން މުހިއްމު ކަމަށެވެ،" ބަޔާނުގައި ވަހީދު ވިދާޅުވި އެވެ.
ވަހީދުގެ ބަޔާނުގައި ޕީޕީއެމްއިން ވަކިވެވަޑައިގަންނަވާ ސަބަބު އޮމާންކޮށް ވިދާޅުވެފައި އޮތަސް، ޕާޓީގެ ސެކްރެޓަރީ ޖެނެރަލް މުހައްމަދު ތޮލާލަށް މިއަދު ފޮނުއްވި ސިޓީގައި ބަންޑުން ކޮށްލައްވާފައި ވަނީ ނުރުހުމާއި ހިތްހަމަނުޖެހުމެވެ.
"...ޕީޕީއެމްގެ ރިޔާސީ ކެންޑިޑޭޓް ރައީސް އަބްދުﷲ ޔާމީނަށް 2023 ވަނަ އަހަރުގެ ރިޔާސީ އިންތިހާބުގައި ބައިވެރިވެވަޑަަގަތުމުގެ ޝަރުތު ހަމަނުވާ ކަމަށް އިލެކްޝަން ކޮމިޝަނުން ނިންމެވުމާއި އެ ނިންމެވުން ދިވެހިރާއްޖޭގެ ސުޕްރީމްކޯޓުގެ އިއްތިފާގުން 5 އޮގަސްޓް 2023ގައި ދެމެެހެއްޓުމާއި އިންތިހާާބުގެ ކެންޑިޑޭޓުން ހުށަހެޅުމުގެ ފުރުސަތު 7 އޮގަސްޓް 2023 ގެ 2:00 ގައި ހަމަވުމާއި ދޭތެރޭގައި އިތުރު ކެންޑިޑޭޓެއް ނެރުމަށް ވަގުތު އޮވެ ޕީޕީއެމްގެ ލީޑަޝިޕްގެ ފަރާތުން އެއްވެސް މަސައްކަތެއް ނުކުރައްވަވައި އަދި ޕާޓީގެ ސެނެޓަށް، ކެންޑިޑޭޭޓެއް ނެރުމުގެ ފުރުސަތެއް ނުދެއްވަވައި، އެހެން ކުޑަ ޕާޓީއެއްގެ ކެންޑިޑޭޓެއް ނެރުމަކީ ޕީޕީއެމް އަށް ޕާޓީގެ ލީޑަޝިޕުން ވެވަޑައިގެންނެވި ވަރަށް ބޮޑު ހިޔާނާތެއް،" ވަހީދުގެ ސިޓީގައި ވިދާޅުވެފައިވެ އެވެ.
ދެހާސް ތޭރަ ވަނަ އަހަރުގެ ރިޔާސީ އިންތިހާބުގެ ނާކާމިޔާބަށް ފަހު ޕީޕީއެމްއާ ގުޅިވަޑައިގެންނެވި ޑރ. ވަހީދު އެ ޕާޓީގެ ރިޔާސީ ޓިކެޓު ހޯއްދެވުމަށް މަސައްކަތް ކުރެއްވި އެވެ.
ވަހީދު ޕީޕީއެމުން މިއަދު ވަކިވެވަޑައިގެންނެވި އިރު، ޔާމީނުގެ ކެންޑިޑެެސީ ބަލައިނުގަންނަން އީސީން ނިންމި ނިންމުން ރަނގަޅުކަމަށް ސުޕްރީމްކޯޓުން ކަނޑައެޅި ދުވަހު ވެސް ޕީޕީއެމްގެ ރިޔާސީ ޓިކެޓަށް އޮތް ޝައުގުވެރިކަން އެމަނިކުފާނު ފާޅުކުރެއްވި އެވެ.
ސުޕްރީމް ކޯޓު ބޭރުގައި ހުންނަވައިގެން "އަދަދު"އަށް ދެއްވި ހާއްސަ އިންޓަވިއުއެއްގައި ޑރ. ވަހީދު ވިދާޅުވީ، ރައީސް ޔާމީނަށް އިންތިހާބުގައި ވާދަ ނުކުރެވޭ ނަމަ ތައްޔާރަށް ހުންނެވި ކަމަށެވެ. އަދި އެކަން މީގެ ދެ އަހަރެއްހާ ދުވަސް ކުރިން ވެސް ދަންނަވާފައިވާނެ ކަމަށް ވަހީދު ވިދާޅުވި އެވެ.
"އަޅުގަނޑު ވަރަށް ކުރިންވެސް ދަންނަވާފައި ވާނީ. މީގެ ދެއަހަރެއްހާ ދުވަސް ކުރިން ވެސް، ރައީސް ޔާމީނަށް ކުރިމަތިނުލެވޭ ހާލަތެއް މެދުވެރިވެއްޖެ ނަމަ އަޅުގަނޑުވެސް އެބަ ހުރީމޭ" ވަހީދު ވިދާޅުވި އެވެ.
ރައީސް ޔާމީނަކީ ރާއްޖޭގައި އެންމެ ތާއީދު ބޮޑު ލީޑަރުކަން ފާހަގަކުރައްވައި ޑރ. ވަހީދު ވިދާޅުވީ އެމަނިކުފާނަށް ވާދަނުކުރެވުމަކީ ވަރަށް ބޮޑު ހިތާމައެއް ކަމަށެވެ.
