ދެވަނަ ދައުރެއް ދެއްވައިފިނަމަ، ދުނިޔޭގެ ނަން މަޝްހޫރު ހޮސްޕިޓާލިޓީ ސްކޫލެއްގެ ކެމްޕަހެއް އަޅަން އެމްޑީޕީގެ ރިޔާސީ ކެންޑިޑޭޓު އަދި ރައީސް އިބްރާހިމް މުހައްމަދު ސޯލިހު ވައުދުވެވަޑައިގެންފި އެވެ.
މިދިޔަ ފަސް އަހަރު ވެސް ސަރުކާރުގެ ފަތުރުވެރިކަމުގެ ވުޒާރާއިން ކުރި އެންމެ މުހިންމު އެއް މަސައްކަތަކީ ރާއްޖޭގެ މީހުން ދިރިއުޅޭ ރަށްރަށަށް ގޮސް އެ ރަށުގައި ރަށު ފަތުރުވެރިކަން ކުރެވޭނެ ގޮތްތަކެއް ހޯދުމެވެ.
ރިޔާސީ އިންތިހާބުގެ ކެމްޕެއިނުގައި ގދ. އަތޮޅުގެ ރަށްރަށަށް އެމަނިކުފާނު ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ހެނދުނު ގދ. ވާދޫގައި ވިދާޅުވީ އެ ސިޔާސަތު އަންނަ ދައުރެއްގައި އިތުރަށް ފުޅާކުރައްވާނެ ކަމަށެވެ.
ރަށްރަށުގައި ފަތުރުވެރިކަން ފުޅާކުރުމަށާއި، ފަތުރުވެރިކަމުގެ ދާއިރާގެ އިސް ވަޒީފާތަކުގައި ދިވެހީން ތިބުމުގެ އަމާޒަށް ވާސިލްވުމަށް، ރާއްޖޭގައި ދުނިޔޭގެ ނަން މަޝްހޫރު ހޮސްޕިޓާލިޓީ ސްކޫލެއްގެ ކެމްޕަހެއް އަޅުއްވާނެ ކަމަށް ރައީސް ވިދާޅުވި އެވެ.
"ދުނިޔޭގެ ނަން މަޝްހޫރު ހޮސްޕިޓާލިޓީ ސްކޫލެއްގެ ކެމްޕަސް އިރާދަކުރެއްވިއްޔާ އަޅުގަނޑުމެން ގާއިމުކޮށްދޭނަން،" ރައީސް ވިދާޅުވި އެވެ.
ސްޓޫޑަންޓު ލޯނުގެ އިންޓްރެސްޓް ކުޑަކުރުމާއި، ރާއްޖެއަށް ހިދުމަތް ކުރުމުގެ ޝަރުތާއެކު ލޯނު މައާފު ކުރުމުގެ އިތުރުން ފުރަތަމަ ޑިގްރީ ހިލޭ ފޯރުކޮށްދިނުމުގެ ޕްރޮގްރާމްގެ އެހީގައި ކޮންމެ ރަށެއްގައި ފަތުރުވެރިކަމުގެ ވިޔަފާރިތައް ކުރަން ބޭނުންވާ މީހުން ތަމްރީނު ކުރުމުގެ މަސައްކަތް ވެސް ހިންގަވާނެ ކަމަށް ވިދާޅުވި އެވެ.
"ކޮންމެ ރަށެއްގެ ލޭންޑް ޔޫސް ޕްލޭން ހަދާއިރު، އެއާ ގުޅުވައިދޭ ހިއުމަން ރިސޯސް، އެ ރަށަކަށް ބޭނުންވާ އިންސާނީ ވަސީލަތްތައް އޭގައި ހިމަނަން، އޭރަށް ކޮންމެ ރަށެއްގައި އުފެދޭނެ ވަޒީފާތަކާއި، އެއަށް ބޭނުންވާނެ ތަމްރީނު ލިބިފައި ތިބި ޒުވާނުން އުފެދިގެން ދާނެ،" ރައީސް ތަފްސީލްކޮށް ވިދާޅުވެ ދެއްވި އެވެ.
ބޭރު ޔުނިވާސިޓެއްގެ ކެމްޕަހެއް ރާއްޖެ ގެންނަން ވައުދުވެ ވަޑައިގެންނެވިއިރު، ރައީސް ސޯލިހުގެ އާ މެނިފެސްޓޯގައި ރާއްޖެއިން ބޭރުން ކުދިން ކިޔަވަން ރާއްޖެ އައުމަށް ބާރުއެޅުމުގެ ގޮތުން ސްޓޫޑަންޓް ވިސާ ތައާރަފްކުރާން ވެސް ވަނީ ނިންމަވައިފަ އެވެ.
ދުނިޔޭގެ ނަން މަޝްހޫރު ހޮސްޕިޓާލިޓީ ސްކޫލެއްގެ ކެމްޕަސް ރާއްޖޭގައި އެޅުމަށް ރައީސް ވައުދުވެވަޑައިގެންނެވިއިރު، ބޭރުގެ ޔުނިވާސިޓީތަކުގެ ކެމްޕަސްތައް ރާއްޖެއަށް ގެނައުމަކީ އެމްޑީޕީން ވަރަށް ކުރިން ފެށިގެން ގެންގުޅޭ ސިޔާސަތެކެވެ.
