ރިޔާސީ އިންތިހާބަށް ކުރިމަތިލާން ހުޅުވާލި މުއްދަތު ހަމަވާން މަދު ވަގުތުކޮޅަކަށް ވެފައި ވަނިކޮށް، އިންތިހާބުގައި ވާދަކުރެއްވުމަށް އެމްޑީޕީގެ ކުރީގެ ރައީސް ޑރ. މުހައްމަދު މުނައްވަރު ގެންގުޅުއްވި ވިސްނުން ދޫކޮށްލައްވައިފި އެވެ.
ކުރީގެ ރައީސް މައުމޫނު އަބްދުލް ގައްޔޫމުގެ ވެރިކަމުގައި ބަންޑާރަ ނައިބުގެ މަގާމު އަދާކުރެއްވި، އައްޑޫއަށް ނިސްބަތްވާ އުމުރުން 61 އަހަރުގެ ޑރ. މުނައްވަރު. ރިޔާސީ އިންތިހާބުގައި ވާދަ ކުރައްވާކަން އިއުލާނު ކުރެއްވީ މިދިޔަ މާޗު 5، ގައި ފޭސްބުކްގައި ކުރެއްވި ޕޯސްޓުގަ އެވެ.
އަމިއްލަ ގޮތުން ވާދަކުރެއްވުމަށް 1،500 މީހުންގެ ތާއީދު ސޮއި ހޯއްދެވުމުގެ މަސައްކަތް ވެސް މިދިޔަ މަހުން ފެށިގެން މުނައްވަރު ގެންދެވީ ކުރައްވަމުންނެވެ. އެކަމަކު މިއަދު ކުރެއްވި ޓްވީޓެއްގައި އޭނާ ވިދާޅުވީ ރިޔާސީ އިންތިހާބުގައި ވާދަކުރެއްވުމުގެ ވިސްނުން ދޫކޮށްލައްވާފައިވާ ކަމަށެވެ.
ރިޔާސީ އިންތިހާބުގެ ގާނޫނު ބުނާ ގޮތުން ރާއްޖޭގައި ރަޖިސްޓްރީކޮށްފައިވާ ސިޔާސީ ޕާޓީއެއްގެ ޓިކެޓުގައި ވާދަކުރުމުގެ ބަދަލުގައި އަމިއްލަ ގޮތުން އެ އިންތިހާބަށް ވާދަކުރާނަމަ މަދުވެގެން 1،500 މީހުންގެ ސޮއި ހިމެނޭ ތާއީދު ފޯމުތައް އިލެކްޝަންސް ކޮމިޝަނަށް ހުށަހަޅަން ޖެހެ އެވެ.
މުނައްވަރު "އަދަދު" ނޫހަށް ވިދާޅުވީ އިންތިހާބުގައި ވާދަނުކުރައްވަން ނިންމެވީ މިހާރު މި އޮތް ވަގުތުކޮޅުގެ ތެރޭގައި ރައްޔިތުންގެ ޖުމުލަ ތާއީދެއް ހޯއްދެވެން އޮތް ކަމަށް ގަބޫލު ނުކުރެއްވޭތީ ކަމަށެވެ. އެހެން ކެންޑިޑޭޓަކަށް ތާއީދު ކުރައްވާނެތޯ ސުވާލުކުރުމުން ވިދާޅުވީ އަދި ގޮތެއް ނުނިންމަވާ ކަމަށެވެ.
"ފުރަތަމަ އިންތިހާބުގައި ވާދަކުރުމުގެ ވިސްނުމެއް ގެންގުޅުނީ ވެސް މި ވަގުތު މި ތިބި މީހުން [ސިޔާސީ ލީޑަރުންނާއި ވާދަކުރާނެ ކަމަށް އިއުލާންކޮށްފައިވާ ކެންޑިޑޭޓުން] ކަމުނުދާތީ، ދެން ކުރިއަށް ދާނެ ގޮތް ނުއެއް ނިންމަން، އަދި މީޑިއާތަކާ ވެސް ބައްދަލުކުރާނަން އަޅުގަނޑު،" މުނައްވަރު ވިދާޅުވި އެވެ.
ސިޔާސީ މަސައްކަތުގައި މާ ބޮޑަށް ހަރަކާތްތެރި ވެވަޑައިނުގެން އަހަރުތަކެއް ވަންދެން ހުންނެވުމަށް ފަހު މި އަހަރުގެ ކުރީކޮޅު ބޭއްވި އެމްޑީޕީގެ ރިޔާސީ ޕްރައިމަރީގެ ތެރެއިން ކުރީގެ ރައީސް މުހައްމަދު ނަޝީދު އަރިހުގައި އެމަނިކުފާނުގެ ކެމްޕޭނުގައި މުނައްވަރު އުޅުއްވި އެވެ.
އޭގެ ފަހުން، ފޯޅަވަހި ހިމެނޭހެން ޗާގޯސް ޖަޒީރާތަކަކީ މޮރިޝަސްގެ ބައެއް ކަމަށް ބަލައިގެން ރާއްޖެއާއި އެ ގައުމާ ދެމެދު ފުށުއަރާ ކަނޑުގެ ސަރަހައްދުގެ އިން ކަނޑައެޅި މައްސަލާގައި، ސަރުކާރުގެ ސްޓޭންޑާއި އިޓްލޮސްގެ ނިންމުމާ ދެކޮޅަށް އުފެއްދި އިއްތިހާދު ލީޑު ކުރެއްވުމުގައި ވެސް މުނައްވަރު އުޅުއްވި އެވެ.
އެ ނިންމުމާ ދެކޮޅަށް މަސައްކަތް ކުރަން އިދިކޮޅު ޕީޕީއެމް/ޕީއެންސީ ކޯލިޝަނާއެކު، ޑިމޮކްރެޓްސްއާއި، އެމްއެންޕީއާއި، ޖުމްހޫރީ ޕާޓީގެ ބައެއް ބޭފުޅުންނާއި، މުނައްވަރާއި ރިޔާސީ އިންތިހާބުގައި އަމިއްލަ ގޮތުން ވާދަކުރައްވަން ނިންމަވާފައިވާ ކުރީގެ ހޯމް މިނިސްޓަރު އުމަރު ނަސީރު ވެސް ބައިވެރިވި އެވެ. މާލޭގައި ބޮޑު ޖަލްސާއެއް ބޭއްވުމަށް ފަހު، ފަހުން އެ އިއްތިހާދުގެ އެއްވެސް ހަރަކާތެއް ނުފެނެ އެވެ.
