ޕެރިސް (އޮގަސްޓް 7) - ޕީއެސްޖީގެ ފަރިތަކުރުންތަކުގައި އެ ޓީމުގެ ފޯވަޑް ކީލިއަން އެމްބާޕޭ ބައިވެރިނުކުރުމަށް އެ ކްލަބުން ނިންމައިފި އެވެ.
ކޮންޓުރެކްޓް އާކުރުމާ ގުޅޭގޮތުން ޕީއެސްޖީ އާޢި އެމްބާޕޭގެ ދެމެދުވައި އުފެދިފައިވާ މައްސަލަ އަށް އަދިވެސް ހައްލެއް ނުލިބެ އެެވެ.
ޕީއެސްޖީން އޭޝިއާ އަށް ކުރި ޕްރީ ސީޒަން ޓުއާގައި ވެސް އެމްބާޕޭ ،24، ބައިވެރިއެއްނުކުރެ އެވެ.
ފްރާންސް ލީގު އަންނަ ހަފުތާގެ ހޮނިހިރު ދުވަހު ފަށާއިރު، އެމްބާޕޭ އަށް ޕީއެސްޖީގެ ސީނިއާ ސްކޮޑާއެކު ފަރިތަކުރުމުގެ ފުރުސަތެއް ނުދެ އެވެ. އެމްބާޕޭ ފަރިތަކުރަނީ ޕީއެސްޖީގެ ބީ ޓީމާއެކު އެވެ.
އެމްބާޕޭ އާއި ޕީއެސްޖީއާ ދެމެދު މައްސަލަ އުފެދުނީ ޕީއެސްޖީން ހުށަހަޅާފައިވާ ގޮތަށް ކޮންޓުރެކްޓް އާކުރަން އެމްބާޕޭ ދެކޮޅު ހަދާފައިވަނިކޮށެވެ.
ޕީއެސްޖީއާއެކު އެމްބާޕޭ ހަދާފައިވާ ކޮންޓުރެކްޓް އަންނަ އަހަރު ހަމަވާނެއެވެ. ކޮންޓުރެކްޓް ހަމަވުމާއެކު، އެމްބާޕޭ އަށް ހިލޭ ޓްރާންސްފާއެއްގައި އެހެން ކްލަބަކަށް ބަދަލުވެވޭނެއެވެ. ކޮންޓުރެކްޓް އާނުކުރާނެކަން އޭނާ ވަނީ މި އަހަރުގެ މެއި މަހު ވެސް ބުނެފައެވެ.
ޕީއެސްޖީން ގަބޫލްކުރާ ގޮތުގައި އެމްބާޕޭ ކޮންޓުރެކްޓް އާކުރަން ބޭނުންނުވަނީ ހިލޭ ޓްރާންސްފާއެއްގައި އަންނަ އަހަރު ރެއާލް މެޑްރިޑަށް ބަދަލުވާން އޭނާ އެއްބަސްވެފައިވާތީއެވެ.
ސައުދީ އަރަބިއްޔާގެ އަލް ހިލާލުން އެމްބާޕޭ އަށް ބޮޑު އަގެއް ހުށަހެޅިއެވެ. އެކަމަކު އެމްބާޕޭ އެ ކްލަބަށް ދާކަށް ބޭނުމެއްނުވިއެވެ.
