ކުރިއަށް އޮތް ރިޔާސީ އިންތިހާބުގައި އިދިކޮޅު ޕީޕީއެމް/ޕީއެންސީ ކޯލިޝަނުގެ ލީޑަރު ރައީސް އަބްދުﷲ ޔާމީނަށް ވާދަކުރެވެން ނެތްނަމަ، ޕީޕީއެމް ކެންޑިޑޭޓެއްގެ ގޮތުގައި ވާދަކުރަން ތައްޔާރަށް ހުންނެވި ކަމަށް ކުރީގެ ރައީސް ޑރ. މުހައްމަދު ވަހީދު ހަސަން މަނިކު މިއަދު ވިދާޅުވެއްޖެ އެވެ.
މިއަދު ސުޕްރީމް ކޯޓު ބޭރުގައި ހުންނަވައިގެން "އަދަދު"އަށް ދެއްވި ހާއްސަ އިންޓަވިއުއެއްގައި ޑރ. ވަހީދު ވިދާޅުވީ، ރައީސް ޔާމީނަށް އިންތިހާބުގައި ވާދަ ނުކުރެވޭ ނަމަ ތައްޔާރަށް ހުންނެވި ކަމަށެވެ. އަދި އެކަން މީގެ ދެ އަހަރެއްހާ ދުވަސް ކުރިން ވެސް ދަންނަވާފައިވާނެ ކަމަށް ވަހީދު ވިދާޅުވި އެވެ.
"އަޅުގަނޑު ވަރަށް ކުރިންވެސް ދަންނަވާފައި ވާނީ. މީގެ ދެއަހަރެއްހާ ދުވަސް ކުރިން ވެސް، ރައީސް ޔާމީނަށް ކުރިމަތިނުލެވޭ ހާލަތެއް މެދުވެރިވެއްޖެ ނަމަ އަޅުގަނޑުވެސް އެބަ ހުރީމޭ" ވަހީދު ވިދާޅުވި އެވެ.
ރައީސް ޔާމީނަކީ ރާއްޖޭގައި އެންމެ ތާއީދު ބޮޑު ލީޑަރުކަން ފާހަގަކުރައްވައި ޑރ. ވަހީދު ވިދާޅުވީ އެމަނިކުފާނަށް ވާދަނުކުރެވުމަކީ ވަރަށް ބޮޑު ހިތާމައެއް ކަމަށެވެ.
"މިއަދު އަޅުގަނޑުމެންނަށް ފެނިގެން ދިޔައީ ރައީސް ޔާމީނުގެ އިސްތިއުނާފީ މައްސަލަތައް ލަސްކުރަމުން ކުރަމުން ކުރަމުން ގޮސް އެމަނިކުފާނުގެ އަސާސީ ހައްގެއް ގެއްލުނުތަން," ވަހީދު ވިދާޅުވި އެވެ.
ރައީސް ޔަމީނުގެ ހައްގު ގެއްލުނީ ޖުޑީޝަލް ސިސްޓަމުގެ ތެރެއަށް ސިޔާސީ ނުފޫޒު ވަދެގެން ކަމަށް އެމަނިކުފާނު ވިދާޅުވި އެވެ.
ރައީސް ޔާމީނަށް އިންތިހާބުގައި ވާދަ ނުކުރެވޭ މައްސަލަ ކޯޓުގައި ހިނގަމުން ދަނިކޮށް އިއްޔެ ރައީސް ވަހީދުގެ ކުށުގެ ރެކޯޑު ސާފުކުރަން ވަނީ ހުށަހަޅާފަ އެވެ.
ޕީޕީއެމުން ކެންޑިޑޭޓެއް ނެރުމަށް އިތުރު ވަގުތު ދިނުމަށް ވެސް، ސުޕްރީމް ކޯޓަށް ހުށަހެޅިފައިވާ ކެންޑިޑެސީ މައްސަލާގައި އެ ޕާޓީން އެދިފައިވެ އެވެ. ނަމަވެސް އެ ފުރުސަތު ވެސް ދެވެން ނެތް ކަމަށް ސުޕްރީމް ކޯޓުން މިއަދު ކަނޑައެޅި އެވެ.
އެމްއެމްޕީއާރްސީ މެދުވެރިކޮށް ވ. އާރަށު ދޫކުރުމުގެ ތެރެއިން ރިޝްވަތު ނަންގަވައި ފައިސާ ލޯންޑާ ކުރެއްވިކަން ސާބިތުވެ ޔާމީނަށް އިއްވާފައިވާ ޖަލު ހުކުމާ ހެދި ރިޔާސީ ކެންޑިޑޭޓަކަށް ވުމުގެ ޝަރުތު އެމަނިކުފާނުގެ ހަމަނުވާ ކަމަށް އިލެކްޝަންސް ކޮމިޝަނުން ނިންމީ މިދިޔަ އަންގާރަ ދުވަހެވެ. ސުޕްރީމް ކޯޓުން ވަނީ އިލެކްޝަން ކޮމިޝަނުގެ ނިންމުން ރަނގަޅު ކަމަށް މިއަދު ހުކުމް ކޮށްފަ އެވެ.
ރާއްޖޭގައި ބޭއްވި ފުރަތަމަ ވާދަވެރި ރިޔާސީ އިންތިހާބު 2008 ގައި ރައީސް މުހައްމަދު ނަޝީދު ކާމިޔާބު ކުރެއްވިއިރު ޑރ. ވަހީދަކީ އެމަނިކުފާނުގެ ރަނިން މޭޓެވެ. އޭރު ހުންނެވީ ގައުމީ އިއްތިހާދު ޕާޓީގެ ލީޑަރެއްގެ މަގާމުގަ އެވެ.
އަދި, އޭގެ ތިން އަހަރު ފަހުން ފެބްރުއަރީ 2012, ގައި ސިފައިންނާއި ފުލުހުން ގުޅިގެން ހިންގި މިއުޓިނީއަކުން ރައީސް ނަޝީދުގެ ސަރުކާރު ބަދަލުކުރުމުން ވެރިކަމާ ހަވާލުވެވަޑައިގަތީ ޑރ. ވަހީދެވެ.
ވެރިކަމުގައި ހުންނަވައި 2013 ގެ ރިޔާސީ އިންތިހާބަށް އެމަނިކުފާނު ކުރިމަތިލެއްވި އެވެ. އެ އިންތިހާބުގެ ފުރަތަމަ ބުރުގައި ލިބިވަޑައިގެންނެވީ އެންމެ ފަސް ޕަސެންޓެވެ. ފުރަތަމަ ބުރު ސުޕްރީމް ކޯޓުން ބާތިލު ކުރުމުން ދެން ބޭއްވި ބުރުގައި އެމަނިކުފާނު ވާދަނުކުރައްވަ އެވެ. އޭގެ ބަދަލުގައި ތާއިދު ކުރެއްވީ 2013 ގެ އިންތިހާބާ ކާމިޔާބު ކުރެއްވި ރައީސް އަބްދުالله ޔާމީނަށެވެ.
