ސުޕްރީމް ކޯޓުން ބަލަމުންދާ ކުރީގެ ރައީސް އަބްދުﷲ ޔާމީންގެ ކެންޑިޑެސީގެ މައްސަލަ އެމަނިކުފާނާ ދެކޮޅަށް ނިމިއްޖެ ނަމަ ޕީޕީއެމްއިން އެހެން ކެންޑިޑޭޓަކު ނެރޭނެ ކަމަށާއި އެއީ ޕްލޭން ބީ ކަމަށް އެ ޕާޓީން ބުނެފައިވަނިކޮށް، އެ ޕާޓީގެ ލީޑަޝިޕުގައި ހިމެނޭ ކުރީގެ ރައީސް ޑރ. މުހައްމަދު ވަހީދު ހަސަން މަނިކުގެ ކުށުގެ ރެކޯޑު ސާފުކުރަން ހުށަހަޅައިފި އެވެ.
ޑރ. ވަހީދު ކުށުގެ ރެކޯޑު ސާފުކުރަން ހުށަހަޅުއްވާކަން "އަދަދު" އަށް ކަށަވަރުވެފައިވާއިރު، ޕީޕީއެމް އިން ދެން ނެރޭ ކެންޑިޑޭޓަކު އަދި އިއުލާނެއް ނުކުރެ އެވެ.
ބެލެވޭ ގޮތުގައި އެ ޕާޓީން މަޑުކުރަނީ މިހާރު ސުޕްރީމް ކޯޓުގައި އޮތް ޔާމީނުގެ ކެންޑިޑެސީ މައްސަލާގައި އެ ކޯޓުން އިއްވާ ހުކުމަކަށެވެ. އަދި، ޑރ. ވަހީދުގެ ކުށުގެ ރެކޯޑު ސާފުކުރަނީ މި މަހުގެ ހަތްވަނަ ދުވަހަށް ކެންޑިޑެސީގެ ފޯމު ހުށަހެޅުމުގެ މުއްދަތު ހަމަވާއިރު އެކަމަށް ތައްޔާރުވުމުގެ ގޮތުން ކަމަށް ބެލެވެ އެވެ.
ސިޔާސީ މަސައްކަތްތަކާ ދުރުގައި ހުންނެވުމަށް ފަހު ރައީސް ވަހީދު ޕީޕީއެމްއާ ގުޅުނީ ޖޫން 22, 2020 ގަ އެވެ. އެމަނިކުފާނު ހުންނެވީ އެ ޕާޓީގެ ހާއްސަ އެޑްވައިޒަރެއްގެ މަގާމުގަ އެވެ. އެ މަގާމާ އެކު އެމަނިކުފާނު އެ ޕާޓީގެ ސެނެޓުގެ މެމްބަރުކަން ވެސް އަދާކުރައްވަ އެވެ.
ރާއްޖޭގައި ބޭއްވި ފުރަތަމަ ވާދަވެރި ރިޔާސީ އިންތިހާބު 2008 ގައި ރައީސް މުހައްމަދު ނަޝީދު ކާމިޔާބު ކުރެއްވިއިރު ޑރ. ވަހީދަކީ އެމަނިކުފާނުގެ ރަނިން މޭޓެވެ. އޭރު ހުންނެވީ ގައުމީ އިއްތިހާދު ޕާޓީގެ ލީޑަރެއްގެ މަގާމުގަ އެވެ.
އަދި, އޭގެ ތިން އަހަރު ފަހުންފ ފެބްރުއަރީ 2012, ގައި ސިފައިންނާއި ފުލުހުން ގުޅިގެން ހިންގި މިއުޓިނީއަކުން ރައީސް ނަޝީދުގެ ސަރުކާރު ބަދަލުކުރުމުން ވެރިކަމާ ހަވާލުވެވަޑައިގަތީ ޑރ. ވަހީދެވެ.
ވެރިކަމުގައި ހުންނަވައި 2013 ގެ ރިޔާސީ އިންތިހާބަށް އެމަނިކުފާނު ކުރިމަތިލެއްވި އެވެ. އެ އިންތިހާބުގެ ފުރަތަމަ ބުރުގައި ލިބިވަޑައިގެންނެވީ އެންމެ ފަސް ޕަސެންޓެވެ. ފުރަތަމަ ބުރު ސުޕްރީމް ކޯޓުން ބާތިލު ކުރުމުން ދެން ބޭއްވި ބުރުގައި އެމަނިކުފާނު ވާދަނުކުރައްވަ އެވެ. އޭގެ ބަދަލުގައި ތާއިދު ކުރެއްވީ 2013 ގެ އިންތިހާބާ ކާމިޔާބު ކުރެއްވި ރައީސް އަބްދުالله ޔާމީނަށެވެ.
