ބެއިރޫތު، ލުބްނާން (އޯގަސްޓް 4) - އިސްލާމިކް ސްޓޭޓް (އައިއެސް) ޓެރަރިސްޓް ގްރޫޕުގެ ލީޑަރު އަބޫ އަލް ހުސެއިން އަލް ހުސެއިނީ އަލް ގުރައިޝީ މަރުވެފައިވާ ކަމަށް އިއުލާންކޮށްފި އެވެ.
ބުރާސްފަތި ދުވަހު އައިއެސްގެ ޓެލެގްރާމް ޗެނަލެއްގައި އާއްމުކުރި މެސެޖެއްގައި ބުނީ ލީޑަރު މަރުވީ ސީރިއާގެ ހުޅަނގު އުތުރުގައި ހަމަލާ ބަދަލުކުރުންތަކެއްގެ ތެރޭގައި ކަމަށެވެ.
ހަމަލާ ބަދަލުކުރީ އައިއެސް އާއި އެހެން ޓެރަރިސްޓް ގްރޫޕެއް ކަމުގައިވާ ހާޔަތު ތަހްރީރް އަލް ޝާމްއާ ދެމެދުގަ އެވެ. އޭނާ މަރުވީ ކޮން އިރަކު ކަމެއް ހާމައެއް ނުކުރެ އެވެ.
އައިއެސްގެ އާ ލީޑަރެއްގެ ގޮތުގައި އިއުލާންކުރީ އަބޫ ހަފްސް އަލް ހާޝިމީ އަލް ގުރައިޝީ އެވެ. އޭނާއަކީ އެ ގްރޫޕު އުފެދުނު ފަހުން ހޮވި ފަސް ވަނަ ލީޑަރެވެ.
މިދިޔަ އެޕްރީލް މަހުގެ ފަހުކޮޅު ތުރުކީގެ ރައީސް ތައްޔިބް އުރުދުގާން ވިދާޅުވީ އެ ގައުމުގެ ޖާސޫސީ އިދާރާއިން ސީރިއާގައި ހިންގި އޮޕަރޭޝަނެއްގައި އައިއެސްގެ ލީޑަރު މަރާލާފައިވާ ކަމަށެވެ. އެ އޮޕަރޭޝަނާ ގުޅޭ ފޮޓޯތަކެއް ވެސް ތުރުކީގެ ނޫސްތަކުން އާއްމުކުރި އެވެ.
އެހެން ނަމަވެސް، ބުރާސްފަތި ދުވަހު އެކަން ދޮގުކޮށް، އައިއެސްއިން ބުނީ ލީޑަރު މަރުވީ ހާޔަތު ތަހްރީރް އަލް ޝާމްގެ ހަނގުރާމަވެރިން ކަމަށާއި އެއަށްފަހު އޭނާގެ ހަށިގަނޑު ތުރުކީއާ ހަވާލުކުރި ކަމަށެވެ.
ހާޔަތު ތަހްރީރް އަލް ޝާމްއިން އައިއެސްއަށް ޓާގެޓު ކުރާ ކަމަށް މީގެ ކުރިން ބުނެފައެއް ނުވެ އެވެ. އައިއެސްއިން ތުހުމަތު ކުރަނީ އެ ގްރޫޕުން ތުރުކީގެ މަސްލަހަތަށް މަސައްކަަތް ކުރާ ކަމަށެވެ.
ހާޔަތު ތަހްރީރް އަލް ޝާމްއަކީ ޓެރަރިސްޓް ގްރޫޕެއް ކަމަށް އެމެރިކާ އާއި ހުޅަނގުގެ އެހެން ގައުމުތަކުން ކަނޑައަޅާފައިވެ އެވެ.
އިރާގާއި ސީރިއާގައި 2014 ވަނަ އަހަރު ފެތުރުނު އައިއެސްއިން ހަނގުރާމައިގައި ބަލިވީ 2017 ގަ އެވެ. އެކަމަކު އެ ގްރޫޕްގެ ހަރަކާތްތައް އަދިވެސް ކުރިއަށް ގެންދެ އެވެ.
އައިއެސްގެ ކުރީގެ ލީޑަރު އަބޫ ހަސަން އަލް ހާޝިމީ އަލް ގުރައިޝީ މަރުވިކަން އިއުލާން ކުރީ މިދިޔަ ނޮވެމްބަރު މަހުގަ އެވެ.
އޭގެ ކުރިން ލީޑަރަކަށް ހުރި އަބޫ އިބްރާހިމް އަލް ގުރައިޝީ މަރުވީ މިދިޔަ އަހަރުގެ ފެބްރުއަރީ މަހު އެމެރިކާއިން ހިންގި އޮޕަރޭޝަނެއްގަ އެވެ.
އެ ގްރޫޕްގެ ފުރަތަމަ ލީޑަރު އަބޫ ބަކުރު އަލް ބަގްދާދީ މަރާލީ އޮކްޓޯބަރު 2019 ގަ އެވެ.
