އެމްޑީޕީގެ ރިޔާސީ ކެންޑިޑޭޓުގެ ހައިސިއްޔަތުން ރައީސް އިބްރާހީމް މުހައްމަދު ސޯލިހު ފުވައްމުލަކަށް މިއަދު ކުރައްވާ ދަތުރުގައި ނައިބު ރައީސް ފައިސަލް ނަސީމް ވެސް ބައިވެރިވެވަޑައިގަތުމަށް ނިންމަވައިފި އެވެ.
މި ދަތުރުގައި ފައިސަލް ވަޑައިގަތުމަށް ކުރިން ހަމަޖެހިފައެއް ނެތެވެ.
ސަރުކާރުގެ އިސް އޮފިޝަލަކު މިއަދު "އަދަދު" ނޫހަށް ވިދާޅުވީ ނައިބު ރައީސް ފައިސަލްގެ އުފަން ރަށަށް ރައީސް ސޯލިހު މިއަދު ހަވީރު ވަޑައިގަންނަވާއިރު، އަރިހުގައި މިހާރު ފައިސަލް ވެސް ވަޑައިގަންނަވާ ކަމަށެވެ.
"ކުރިން އެމަނިކުފާނު ބައިވެރިވެވަޑައިނުގަންނަވާ ގޮތަށް އޮތީ. މިހާރު ރައީސް އަރިހުގައި ވަޑައިގަންނަވާނެ،" އޮފިޝަލް ވިދާޅުވި އެވެ.
ރައީސް ސޯލިހު ފުވައްމުލަކަށް ކުރިން ތާވަލު ކޮށްފައި އޮތީ އިއްޔެ އެވެ. އެ ދަތުރު ފަސްކުރި ސަބަބެއް ރައީސް އޮފީހުން ނުބި ނަމަވެސް، މި ރަށާއި ދެކުނުގެ އަތޮޅުތަކަށް އިއްޔެ މޫސުން ވަރަށް ބޮޑަށް ގޯސްވި އެވެ. ނަމަވެސް މިއަދު މިރަށަށް މޫސުން ރަނގަޅެވެ.
ރައީސް ސޯލިހު ކެމްޕޭނުގައި ފުވައްމުލަކަށް ވަޑައިގަންނަވާއިރު، ނައިބު ރާއިސްގެ އިތުރުން ކޯލިޝަންގެ ޕާޓްނަރުން ކަމުގައިވާ އަދާލަތު ޕާޓީ އާއި އެމްޑީއޭގެ އިސްވެރިންނާއި ސަރުކާރުގެ ބައެއް އިސް ވެރިން ބައިވެރިވެވަޑައިގަންނަވާނެ އެވެ.
ރައީސް ސޯލިހު ދެ ވަނަ ދައުރަކަށް ވާދަ ކުރައްވާއިރު، ރަނިންމޭޓެއް އަދި ކަނޑަނާޅުއްވަ އެވެ. ނަމަވެސް، ފައިސަލް ވަނީ އެކަމަށް ޝައުގުވެރިކަން ފާޅުކުރައްވައިފަ އެވެ. ފައިސަލަކީ އާ ގާނޫނު އަސާސީގެ ދަށުން ރިޔާސީ އިންތިހާބު ބާއްވަން ފެށި ފަހުން ދައުރެއް ފުރިހަމަ ކުރައްވާ ފުރަތަމަ ނައިބު ރައީސް އެވެ.
