ޕެރިސް (ޖުލައި 28) - އިޓަލީގެ އެޓަލަންޓާ އަށް ކުޅެމުން އަންނަ ޑެންމާކްގެ ފޯވާޑް، ރަސްމުސް ހޮއިލުންޑް އަށް މެންޗެސްޓާ ޔުނައިޓެޑުން ފާރަލަމުން އަންނަނިކޮށް، ފްރާންސްގެ ޗެމްޕިއަން، ޕީއެސްޖީން އޭނާ އަށް ބިޑް ކުރަން ތައްޔާރުވެއްޖެ އެވެ.
ޑެންމާކްގެ ކޯޕެންހާގެން އަށް ކުޅުމަށް ފަހު، އޮސްޓްރިއާގެ ސްޓުމް ގްރާޒް އަށް ފަހުން ބަދަލުވި، ހޮއިލުންޑް، 20، އެޓަލަންޓާ އަށް ސޮއިކުރީ މިދިޔަ އަހަރު 20 މިލިއަން ޑޮލަރުގެ ޑީލެއްގަ އެވެ. އެޓަލަންޓާގައި މިދިޔަ ސީޒަނުގައި ދެއްކި މޮޅުކުޅުމުގެ އިތުރުން ޑެންމާކްގެ ގައުމީ ޓީމުގައި ވެސް ހޮއިލުންޑްގެ ވިދުން ގަދަވުމާ އެކު، އޭނާ އަށް އެންމެ ފުރަތަމަ ޝައުގުވެރިކަން ފާޅުކުރި ޓީމުތަކުގެ ތެރޭގައި ޔުނައިޓެޑް ހިމެނެ އެވެ.
ޔުނައިޓެޑްގެ ކޯޗު އެރިކް ޓެން ހާގް އެންމެ ބޮޑަށް ބޭނުންވަނީ ސްޓްރައިކަރެކެވެ. އެ ގޮތުން، ޓޮޓެންހަމް ހޮޓްސްޕާސްގެ ހެރީ ކޭން އަށް ފުރަތަމަ ޓާގެޓް ކުރި ނަމަވެސް ފަހުން، މުޅިން ކަހަލަ ގޮތަކަށް ޔުނައިޓެޑުން ވިސްނުން ބެހެއްޓީ ހޮއިލުންޑް ހޯދާށެވެ.
ހޮއިލުންޑްގެ ސޮއި ހޯދުމަށް ޔުނައިޓެޑަށް ދިމާވެފައި އޮތް އެންމެ ބޮޑު ގޮންޖެހުމަކީ އެޓަލަންޓާ އިން އޭނާ ވިއްކާލަން ކިޔާ އަގު ބޮޑުވުމެވެ. އެޓަަލަންޓާ އިން ހޮއިލުންޑް ވިއްކަން ބޭނުންވަނީ މަދުވެގެން 60 މިލިއަން ޑޮލަރުގެ ޑީލެއްގަ އެވެ. އެ ވަރުގެ ފީއެއް ދޭން އަދި ޔުނައިޓެޑުން އަންނަނީ ދެކޮޅު ހަދަމުންނެވެ.
ކޯޗަކަށް ލުއިސް އެންރީކޭ ހަމަޖައްސައި ޕީއެސްޖީން ބަދަލުތަކަކާ ދިމާލަށް ދާން އަމާޒުހިފާފައިވާއިރު، އެ ޓީމަށް ފޯވާޑެއް ވަނީ ބޭނުންވެފަ އެވެ. ކީލިއަން އެމްބާޕޭ، ޕީއެސްޖީ ދޫކޮށްލާނެކަން ގާތްގަނޑަކަށް ޔަގީންވެފައިވާއިރު، އެ ތަނަށް ޕީއެސްޖީން ދެން ވެސް ބޭނުންވަނީ ޒުވާން ފޯވާޑެއް ހޯދާށެވެ، އެންރީކޭ ބޭނުންވާ ޕްރޮފައިލަށް ފިޓްވަނީ ހޮއިލުންޑް ކަމަށް ފްރާންސްގެ ނޫސްތަކުން ވަނީ ރިޕޯޓްކޮށްފަ އެވެ.
އެހެންވެ، ޕީއެސްޖީން ކުރިއަށް އޮތް ދުވަސްތަކުގައި ހޮއިލުންޑް އަށް ބިޑްކުރާނެ ކަމަށް ރިޕޯޓްތައް ބުނެ އެވެ.
