ބައިބޯ، ތޮއްޖެހިފައިވާ ދިވެހިރާއްޖޭގެ ވެރި ރަށް މާލޭގެ އެންމެ ބޮޑު ދެ ހޮސްޕިޓަލުގެ އެމަޖެންސީއަށް ބަލިވެގެން ގެންދާ މީހުންގެ އަދަދު ކުއްލިއަކަށް ވަރަށް ބޮޑަށް ވަނީ އިތުރުވެފަ އެވެ.
އެންމެ ބޮޑު ޕްރައިވެޓް ހޮސްޕިޓަލް އޭޑީކޭއިން ބުނީ ރެއިން ފެށިގެން ހުއްޓުމެއް ނެތި އެ ހޮސްޕިޓަލަށް މީހުން އަންނަމުންދާ ކަމަށެވެ. އޭގެ އިތުރުން އައިޖީއެމްއެޗް، ހުޅުމާލެ ހޮސްޕިޓަލް އަދި ވިލިމާލެ ހޮސްޕިޓަލް ވެސް އޮތީ ބަލި މީހުންނާއެކު ތޮއްޖެހިފަ އެވެ.
ގިނަ މީހުން އަންނަނީ ހޮޑުލެވޭތީ އެވެ. ބައެއް މީހުންނަށް ބޮޑުކަމުދެވޭ ކަމަށް ވެސް އޭޑީކޭއިން ބުނެ އެވެ. ސީދާ ނަމްބަރެއް ނުދެވުނު ނަމަވެސް، އާދަޔާ ހިލާފަށް ގިނަ މީހުން ބަލިވެގެން ހޮސްޕިޓަލުން ފަރުވާ ހޯދަމުންދާ ކަމަށް އޭޑީކޭއިން ބުނެ އެވެ.
މާލޭގައި ކުއްލިއަކަށް ގިނަ އަދދެއްގެ މީހުން ބަލިވާން ފެށުމުން ގިނަ ބަޔަކު އެކަން ގުޅުވަނީ، މިނިވަން ދުވަސް ފާހަގަ ކުރަން އިއްޔެ އާއި ރޭ މާލޭގައި ބޭއްވި ކުޅިވަރު ބަލަން އާންމުން ހަރަކާތްތެރިވި ވަގުތާ އެވެ.
ބަލިމަޑުކަމުގެ ސީދާ ސަބަބު ހޯދުމަށް ހެލްތު ޕްރޮޓެކްޝަން އޮތޯރިޓީން މިހާރު ވަނީ މަސައްކަތް ފަށައިފަ އެވެ. އެއިރުން، ދިމާވެގެން އުޅޭ ކަންތަކަށް ސީދާ ފިޔަވަޅު އަޅަން އެނގޭނެ އެވެ. އެކަމަކު އޭގެ ކުރިން ވެސް ރައްކާތެރިވުމުގެ ގޮތުން ބައެއް ކަންކަން ކުރެވިދާނެ އެވެ.
ނޯރޯވައިރަސް
ބައްޔެއް ޖެހިގެން ނޫން ގޮތަށް އާންމުކޮށް ހޮޑުލެވެނީ ބަނޑަށް ޖެހޭ ޖަރާސީމެއްގެ ސަބަބުންނެވެ. އޭގެ ބައެއް އަލާމާތްތަކުގެ ތެރޭގައި ބޯ އެނބުރުން، ހޮޑުލެވުން އަދި ބޭރަށް ހިންގުން ހިމެނެ އެވެ. އަދި އަތާއި ފައިގައި ރިއްސުމާއި ބޮލަށް ތަދުވުމާއި ހުން އައުން ވެސް އަލާމާތްތަކުގެ ތެރޭގައި ހިމެނެ އެވެ.
ފެތުރޭ ގޮތް
ނޯރޯވައިރަސް ނުވަތަ ސްޓަމަކް ބަގްއަކީ ވަރަށް ހަލުވިކަމާއެކު ފެތުރޭ ބައްޔެކެވެ. ބަލިޖެހެން މެދުވެރިވާ މައިގަނޑު ދެތިން ސަބަބެއް އޮވެދާނެ އެވެ.
- ބަލި މީހެއްގެ ފަރާތުން
- ވައިރަސް ހުރި ތަނެއްގެ އަތްލުމަށްފަހު އަނގައިގައި އަތްލެވުން
- ވައިރަސް ހުރި މީހަކު ތައްޔާރުކޮށްފައި ހުންނަ ކާނާ ކެއުން
ނޯރޯވައިރަސްއިން ސަލާމަތްވާނެ އެންމެ މޮޅު ގޮތަކީ ސައިބޯނި ލައިގެން ގިނައިން އަތް ދޮވުން ކަމަށް ޑޮކްޓަރުން ބުނެ އެވެ. އަލްކަހޯލް އަޅާފައި ހުންނަ ހޭންޑް ސެނިޓަައިޒާސް އިން އެ ވައިރަސް މަރުނުވާ ކަމަށްވެ އެވެ.
ގޭގައި ކުރެވިދާނެ ފަރުވާ
ބަނޑަށްޖެހޭ މި ޖަރާސީމަކީ މާ ނުރައްކާތެރި ޖަރާސީމެއް ނޫނެވެ. އަދި ގޭގައި ވެސް މި ބައްޔަށް ފަރުވާ ހޯދިދާނެ އެވެ. އެންމެ މުހިންމު ކަމަކީ ގިނައިން ދިޔާ އެއްޗެހި ބޭނުން ކުރުމެވެ. އެފަދަ ބައްޔެއް ޖެހިގެން އުޅޭއިރު ހަށިގަނޑުން ފެން މަދުވުމަކީ މައްސަލައަކަށް ވާނެ އެވެ. އަދި އަރާމު ކުރުމަކީ ވެސް މުހިންމު ކަމެކެވެ.
ރައްކާތެރިކަމުގެ ބައެއް ފިޔަވަޅުތައް
ހޮޑުލެވެންޏާ ރައްކާތެރިކަމުގެ އިތުރު އެހެން ފިޔަވަޅުތައް ވެސް އެޅުން މުހިންމެވެ. އަދި ހޮޑުލެވިފައި ހުރި ތަނެއް ސާފު ކުރާއިރު ވެސް ސަމާލުވާންޖެހެ އެވެ. އެގޮތުން ތިރީގައި ލިޔެފައި މި ހުރި ފިޔަވަޅުތައް އެޅުން މުހިންމެވެ.
- ހަޑިވެފައި ހުރި ހިސާބު ވީ އެންމެ އަވަހަކަށް ސާފު ކުރުން
- ސަރަހައްދުން މީހުން ދުރު ކުރުން
- ސާފު ކުރާއިރު މާސްކާއި އަންގި އެޅުން
- ހޮޑު ސާފު ކުރަން، އެއްފަހަރު ބޭނުންކޮށްފައި އުކާލެވޭ ޒާތުގެ ތަކެތި ބޭނުން ކުރުން
- ހޮޑުލެވުނު ތަނުގެ ކައިރީގައި ކާބޯތަކެތި ހުރި ނަމަ އެ ތަކެތި އުކާލުން
titledesc
