ހއ. އިހަވަންދޫގައި ހިންގާ ބިން ހިއްކުމުގެ މަޝްރޫއުގެ ދަށުން، އެރަށަށް އިތުރުކުރެވޭ 25 ހެކްޓަރުގެ ބިންހިއްކުމުގެ މަސައްކަތް ނިންމާލައިފި އެވެ.
އެ މަޝްރޫއު ކުރިއަށް ގެންދާ އެމްޓީސީސީ އިން ބުނި ގޮތުގައި، ޖުމްލަ 116.94 މިލިއަން ރުފިޔާގެ މި މަޝްރޫއުގެ 75 އިންސައްތަ މަސައްކަތް މިހާރު ވަނީ ނިމިފަ އެވެ.
ބިން ހިއްކުމުގެ އިތުރުން، ގޮނޑުދޮށް ހިމާޔަތްކުރުމުގެ ގޮތުން 850 މީޓަރުގެ ބޮޑުހިލައިގެ ރިވެޓްމެންޓް ޖެހުމުގެ މަސައްކަތް ވެސް މި މަޝްރޫއުގެ ތެރޭގައި ހިމެނެ އެވެ. އެމްޓީސީސީއިން ބުނި ގޮތުގައި ގޮނޑުދޮށް ހިމާޔަތްކުރުމުގެ މަސައްކަތުގެ 54 އިންސައްތަ މިހާރުވަނީ ނިމިފަ އެވެ.
އަދި ބާކީ 45 އިންސައްތަ މަސައްކަތް ނިންމުމަށް ބޭނުންވާ ބޮޑުހިލަ މިހާރު އެ ރަށަށް ގެންދެވި އަންލޯޑްވެސް ކުރެވިފައިވާ ކަމަށް އެ ކުންފުނިން ވަނީ ބުނެފަ އެވެ.
މި މަޝްރޫއު ހައުސިން މިނިސްޓްރީން އެމްޓީސީސީއާ ހަވާލުކުރީ 2020 ގެ ތެރޭގަ އެވެ.
ބިން ހިއްކުން ނިމުމާއެކު އެމްޓީސީސީ އިން ބުނީ އެ ކުންފުނިން ޗަރޓަރކޮށްފައިވާ ޑްރެޖަރު "ފިލިޕޯ ބްރުނެލެޝީ" ދެން ގެންދެވޭނީ ށ. ކޮމަންޑޫގެ ބިން ހިއްކުމަށްޓަކާ ކަމަށެވެ. އެ ޑްރެޖަރު މިއަދު ކޮމަންޑޫއަށް ދާނެ އެވެ.
