މެކްސިކޯ، ކެނަޑާ އަދި އެމެރިކާގައި 2026 ވަނަ އަހަރު ބާއްވާ ފީފާ ވޯލްޑް ކަޕާއި ސައުދީ އަރަބިއްޔާގައި 2027 ވަނަ އަހަރު ބާއްވާ އޭޝިއަން ކަޕްގެ ޖޮއިންޓް ކޮލިފައިން ފުރަތަމަ ބުރުގައި ރާއްޖެ އާއި ބަންގްލަދޭޝް ވާދަކުރަން ޖެހިއްޖެ އެވެ.
ކޮލިފައިން ފުރަތަމަ ބުރުގެ މެޗުތައް ކުޅޭނީ އަންނަ އޮކްޓޫބަރު މަހުގެ ތެރޭގަ އެވެ. އެ ގޮތުން، މާލޭގައި ކުޅޭ ފުރަތަމަ ލެގު އޮންނާނީ 12 އޮކްޓޫބަރުގައި ރާއްޖޭގަ އެވެ. އަދި ދެ ވަނަ ލެގު 17 އޮކްޓޫބަރުގައި ބަންގްލަދޭޝްގައި ކުޅޭނެ އެވެ.
ބަންގްލަދޭޝާއި ރާއްޖެ ކުޅެގެން މޮޅުވާ ޓީމެއް ހޮވޭނީ ކޮލިފައިން ގްރޫޕް ސްޓޭޖަށެވެ. އެ ގޮތުން، ރާއްޖެ އާއި ބަންގްލަދޭޝް މެޗުން މޮޅުވާ ޓީމެއް ވާދަކުރާނީ އޮސްޓްރޭލިއާ އާއި ލެބަނަން އަދި ފަަލަސްތީނާ އެއް ގްރޫޕެއްގަ އެވެ.
ރާއްޖެ އާއި ބަންގްލަދޭޝް އެންމެ ފަހުން ކުޅުނު ހަތަރު މެޗަށް ބަލާއިރު، ބަންގްލަދޭޝް ދެ މެޗުން އަދި ރާއްޖެ ދެ މެޗުން ވަނީ މޮޅުވެފަ އެވެ. އެ ގޮތުން، 2021 ވަނަ އަހަރުގެ އޮކްޓޫބަރު މަހު ބޭއްވި، ސާފް ޗެމްޕިއަންޝިޕްގައި މާލޭގައި ރާއްޖޭން ވަނީ އަލީ ސުޒޭންގެ ކޯޗުކަމުގައި 2-0 އިން ބަންގްލަދޭޝް ބަލިކޮށްފަ އެވެ. އޭގެ އެއް މަސް ފަހުން، ނޮވެމްބަރު މަހުގައި ސްރީ ލަންކާގައި ކުޅުނު ފޯ ނޭޝަންސް ކަޕްގައި ރާއްޖެ އަތުން ބަންގްލަދޭޝް ވަނީ 2-1 އިން މޮޅުވެފަ އެވެ. އެއީ، 18 އަހަރު ތެރޭ ބަންގްލަދޭޝަށް ސީނިއާ ފުޓްބޯޅައިގައި ރާއްޖެ އަތުން ލިބުނު ފުރަތަމަ މޮޅެވެ. ރާއްޖޭގެ ކޯޗަކަށް ހުރީ ފްރެންޗެސްކޯ މޮރިއޭރޯ އެވެ. އަދި ބަންގްލަދޭޝްގެ ކޯޗަކަށް ހުރީ މާރިއޯ ލެމޯސް އެވެ.
މޮރިއޭރޯގެ ކޯޗުކަމުގައި 2022 ވަނަ އަހަރުގެ މާޗް މަހު ރާއްޖޭގައި ކުޅުނު އެކުވެރިކަމުގެ މެޗުގައި ގައުމީ ޓީމު ވަނީ 2-0 އިން ބަންގްލަދޭޝް ބަލިކޮށްފަ އެވެ. އެކަމަކު، މޮރިއޭރޯ ހުއްޓައި، މިދިޔަ މަހުގެ ސާފް ޗެމްޕިއަންޝިޕްގައި ބަންގްލަދޭޝް އިން ވަނީ ރާއްޖެ އަތުން 3-1 އިން މޮޅުވެފަ އެވެ. މިއީ، 2003 ވަނަ އަހަރުގެ ފަހުން ސާފް ޗެމްޕިއަންޝިޕެއްގައި ރާއްޖެ އަތުން ބަންގްލަދޭޝް މޮޅުވި ފުރަތަމަ ފަހަރެވެ.
ރާއްޖޭން ވޯލްޑް ކަޕް ކޮލިފައިންގައި ނުކުންނާނީ ސުޒޭންގެ ކޯޗުކަމުގަ އެވެ. ބަންގްލަދޭޝް އިން އެންމެ ފަހުން ދެ ފަހަރު ވެސް ރާއްޖެއާ ކުޅުނުއިރު ކޯޗަކީ، ހަވިއޭ ކަބްރޭރާ އެވެ.
