މިއަދު ރާއްޖޭގެ މިނިވަންކަމުގެ ރަމްޒަކީ ސަރުކާރުން ބޭރުގެ ހުރިހާ ގައުމުތަކާއެކު ބާއްވާ ސުލްހަވެރި ގުޅުން ކަމަށް ހޯމް މިނިސްޓަރު އިމްރާން އަބްދުﷲ މިއަދު ވިދާޅުވެއްޖެ އެވެ.
ރާއްޖޭގެ 58 ވަނަ މިނިވަން ދުވަހުގެ މުނާސަބަތުގައި ސޯޝަލް ސެންޓަރުގައި މިއަދު ބޭއްވި ރަސްމީ ޖަލްސާގައި ވާހަކަ ދައްކަވަމުން މިނިސްޓަރު އިމްރާން ވިދާޅުވީ، މިއަދުގެ ދުނިޔޭގައި މިނިވަންކަން ގެއްލިދަނީ ގައުމުތަކާމެދު ބޭއްވޭ ގުޅުންތަކާ އެކަމުގައި ކަންކުރެވޭ ނުރައްކާތެރި ގޮތްތަކުގެ ސަބަބުން ކަމަށެވެ.
"[އެކަން] އިހުސާސްކުރެވި [ރައީސް އިބްރާހިމް މުހައްމަދު ސޯލިހު] ދުނިޔޭގެ ހުރިހާ ގައުމުތަކާއެކު ބޭއްވޭ ސުލްހަވެރި މަތިވެރި ގުޅުންތަކަކީ އަޅުގަނޑުމެންގެ ރާއްޖޭގެ މިއަދުގެ މިނިވަންކަމުގެ ރަމްޒު،" އިމްރާން ވިދާޅުވި އެވެ.
އަދި، އެ ގުޅުންތައް އެގޮތުގައި ދެމިއޮންނަނީ ރާއްޖޭގެ ފުރިހަމަ ހާރިޖީ ސިޔާސަތެއް ކަނޑައެޅި އެ ސިޔާސަތު ދެމެހެއްޓުމުގެ ޒިންމާ ނަންގަވާ ބޭފުޅުންގެ ޝަރަފުވެރި މަސައްކަތުގެ ސަބަބުން ކަމަށް ވެސް މިނިސްޓަރު ވިދާޅުވި އެވެ.
މިނިސްޓަރުގެ ވާހަކައިގަ ދެން އަލިއަޅުއްވާލީ މި ޒަމާނުގައި ރާއްޖޭގެ މިނިވަންކަމަށް އޮތް ނުރައްކާތަކަށެވެ. އެގޮތުން ދިވެހިން ބައިބައިކުރުވަނިވި ފިކުރުތަކުން، ހާއްސަކޮށް ދީނީ ހަރުކަށި ފިކުރާއި ދީނާ ދެކޮޅު ފިކުރުތަކުން ދުރުވުމަކީ ހުރިހާ ދިވެހިން ގުޅިގެން ކުރަންޖެހޭ ކަމެއްގެ ގޮތުގައި ސިފަކުރެއްވި އެވެ.
"މި ކުޑަކުޑަ ރާއްޖެ އަމާންކަމާ އޮމާންކަންމަތީ ދެމިގެންދާގޮތް މެދުވެރިކުރުމަކީ އަޅުގަނޑުމެން އެންމެން އެކުގައި އުފުލަންޖެހޭ ބޮޑު ޒިންމާއެއް،" އިމްރާން ވިދާޅުވި އެވެ.
ކޮވިޑުގެ ބަލިމަޑުކަމަށްފަހު މިނިވަން ދުވަސް ކުލަގަދަކޮށް ފާހަގަކުރަމުން ނުދިޔަ ނަމަވެސް މި އަހަރު ސަރުކާރުން ވަނީ މިނިވަންދުވަހާ ގުޅުވައިގެން ގިނަ ހަރަކާތްތަކެއް ރާވާފަ އެވެ. އެގޮތުން ހެވިކަމުގެ ކުޅިވަރުތަކާއި، ޕެރޭޑާއި، ފުޅަނދުބުރުގެ އިތުރުން ހުޅުމާލެ ބަލަހައްޓާ އާބަންކޯއާ ގުޅިގެން "މިނިވަން އުފާ" ގެ ނަމުގައި އެ ރަށުގެ ސެންޓްރަލް ޕާކުގައި އަށްޑުވަހަށް ދެމިގެންދާ ކާނިވަލެއް ބޭއްވުމަށް ވަނި ހަމަޖެހިފަ އެވެ.
ދިވެހިރާއްޖޭގެ މިނިވަން ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެވެސް ޖުލައިމަހުގެ 26 ވަނަ ދުވަހެވެ. ދިވެހިރާއްޖެއަށް ފުރިހަމަ މިނިވަންކަން ލިބިފައި ޖުލައި 26، 1965 ގަ އެވެ.
