މެމްބަރުންގެ އަދަދު ހަމަނުވެގެން އިލެކްޝަންސް ކޮމިޝަނުން އުވާލަން ނިންމާފައި އޮތް މޯލްޑިވްސް ރިފޯމް މޫވްމަންޓުން ރިޔާސީ އިންތިހާބަށް ކެންޑިޑޭޓަކު ނެރެން ނިންމައި، ޕްރައިމަރީގައި ވާދަ ކުރުމުގެ ފުރުސަތު މިއަދު ހުޅުވާލައިފި އެވެ.
އެމްއާރްއެމްގެ ޕްރައިމަރީ އިއުލާންކޮށްފައި މި ވަނީ, އެ ޕާޓީގެ ރައީސް އަހުމަދު ފާރިސް މައުމޫނު ރިޔާސީ އިންތިހާބަށް ކުރިމަތިލާކަމުގެ އަޑު ފެތުރިފައި ވަނިކޮށެވެ. އެމްއާރްއެމުން ޕްރައިމަރީ ބާއްވަން ނިންމާފައި ވަނީ އަންނަ އާދިއްތަ ދުވަހެވެ.
އެމްއާރްއެމްގެ ޓިކެޓުގައި ރިޔާސީ އިންތިހާބަށް ވާދަކުރަން ހުށަހަޅާ ފަރާތްތަކުގެ ހުންނަން ޖެހޭ ޝަރުތުތަކަކީ, ޕާޓީގެ މެމްބަރެއްގެ ގޮތުގައި އެއް އަހަރުވުން, ޕާޓީގެ އިގުރާރުގައި ސޮއިކޮށް ހުށަހެޅުން އަދި އިލެކްޝަންސް ކޮމިޝަނުން ކަނޑައަޅާފައިވާ ޝަރުތުތައް ފުރިހަމަވުމެވެ.
އެމްއާރްއެމްގެ ޕްރައިމަރީގައި ވާދަކުރަން ހުށަހަޅަންޖެހެނީ އެމްއާރްއެމްގެ ޓިކެޓުގައި އިންތިހާބަށް ކުރިމަތިލުމަށް އެދޭ ފޯމެވެ. އެ ޕާޓީން ބުނިގޮތުގައި ޕްރައިމަރީ ބާއްވާނީ އަންނަ ހޯމަ ދުވަހު އެވެ. އަދި ވޯޓުލުން ކުރިއަށް ދާނީ އޮންލައިންކޮށެވެ.
އެމްއާރްއެމުން ޕްރައިމަރީ އިއުލާނުކޮށްފައި ވާއިރު, އެ ޕާޓީން ވަނީ މިއަދު ޖުމްހޫރީ ޕާޓީއާ ބައްދަލުކޮށް, ގުޅިގެން މަސައްކަތް ކުރުމުގެ މަޝްވަރާތައް ފަށާފަ އެވެ.
އެމްއާރްއެމްގެ ފަރާތުން ވާދަކުރަން ނިންމާފައިވަނިކޮށް ޖޭޕީއާއެކު މަޝްވަރާ ފެށުމާ ގުޅޭގޮތުން ސުވާލުކުރުމުން ފާރިސް ވިދާޅުވީ ވެރިކަމަށް ކުރިމަތިލައްވާނެކަން އިއުލާން ކުރައްވާފައި ނުވާނެ ކަމަށެވެ. ނަމަވެސް, އެކަމާ ގުޅުންހުރި މަސައްކަތްތައް ކުރައްވަމުންދާ ކަމަށް ވިދާޅުވި އެވެ.
"އަޅުގަނޑު ވަކި އެނައުންސްމަންޓެއް އަދި ހަދާފައެއް ނުވާނެ. އެކަމަކު އެއީ ގާނޫނީ ވަގުތުތަކެއް ކަނޑައެޅިފައިވާ މަސައްކަތަކަށްވާތީވެ, އަޅުގަނޑުމެން ވެސް ތައްޔާރީތައްވުމުގެ ގޮތުން ބައެއް މަސައްކަތްތައް އެބަ ކުރަން،" ފާރިސް ވިދާޅުވި އެވެ.
ފާރިސް ފާހަގަ ކުރެއްވި ގޮތުގައި, މިއަދު ޖޭޕީއާއެކު ކުރި މަޝްވަރާތަކުގައި ވަރަށް އުއްމީދީ މަންޒަރެއް ފެނިގެން ހިނގައްޖެ އެވެ. އަދި, މިކަމުގައި ރަސްމީ އަދި ނުރަސްމީކޮށް ވެސް އިތުރު މަޝްވަރާތައް ކުރަން ނިންމާފައިވާ ކަން ފާރިސް ހާމަކުރެއްވި އެވެ.
ގާނޫނުން ލާޒިމްކުރާ މެންބަރުންގެ އަދަދު ހަމަނުވުމުން، އުވާލުމަށް ނިންމާފައިވާ އެމްއާރުއެމުން ރިޔާސީ ކެންޑިޑޭޓަކު ނެރުމަށް މަސައްކަތް ކުރަމުންދާއިރު, ކުރިއަށް އޮތް ރިޔާސީ އިންތިހާބުގައި ކެންޑިޑޭޓަކު ނުނެރެވޭނެ ކަމަށް ސީދާ ބުނަން ނޭނގޭ ކަމަށް އިލެކްޝަންސް ކޮމިޝަނުން ވަނީ ބުނެފަ އެވެ.
"އެމްއާރުއެމް އިން އެބަވޭ އެ ޕާޓީ އުވާލުމަށް ކޮމިޝަނުން ނިންމި ނިންމުން ގަބޫލުނުކުރާނެ ކަމަށް ބުނެ ކޯޓަށް މައްސަލަ ހުށަހަޅާފަ، އެހެންވީމަ ދެން ކޯޓުން ގޮތެއް ނުނިމެނީސް [ރިޔާސީ ކެންޑިޑޭޓަކަށް] ވާދަކުރެވޭނެއޭ، ނުކުރެވޭނެއޭ މިވަގުތު ބުނަން ދަތި،" އީސީގެ ސެކެޓްރީ ޖެނެރަލް ހަސަން ޒަކަރިއްޔާ ވިދާޅުވި އެވެ.
އެމްއާރުއެމް އުވާލި މައްސަލާގައި މައުމޫނާއި އެމަނިކުފާނުގެ ދަރިކަލުން އަދި ޕާޓީގެ ރައީސް އަހްމަދު ފާރިސް މައުމޫން ވަނީ މިއީ އީސީގެ ނިންމުމަކީ ގާނޫނާ ހިލާފު ނިންމުމެއް ކަމަށް ބުނެ ފާޑުވިދާޅުވެފަ އެވެ. އެމްއާރުއެމުން ބުނާ ގޮތުގައި އީސީއިން 3،000 މެމްބަރުން ހަމަކުރުމަށް ދިން މުއްދަތުގައި އެ އަދަދަށް އެ ޕާޓީން ވަނީ ފޯމު ހުށަހަޅައިފަ އެވެ.
އީސީގެ ނިންމުން ބާތިލުކުރުމަށް އެދި ކުރިއަށް އޮތް 30 ދުވަހުގެ ތެރޭގައި ސިވިލް ކޯޓަށް މައްސަލައެއް ހުށަހެޅުމަށް މަސައްކަތް ކުރަމުންދާ ކަމަށް ކޯޓުގައި ބުނެފައިވާތީ، ސިވިލް ކޯޓުގެ އަމުރު ނެރެދީފައިވަނީ 30 ދުވަހަށެވެ. އެ އަމުރު ނެރުނީ މިދިޔަ މޭމަހުގެ 28 ގަ އެވެ. އެ އަމުރު މުރާޖައާ ކުރުމަށް އެދި އީސީއިން ދެފަހަރެއްގެ މަތިން ހުށަހެޅުމުންވެސް ކޯޓުން ނިންމީ މުރާޖައާ ކުރެވެން ނެތް ކަމަށެވެ.
