ޕެރިސް (ޖުލައި 25) - ކޮންޓްރެކްޓް އާ ކުރަން ދެކޮޅު ހަދަމުން އަންނަ ޕީއެސްޖީގެ ފޯވާޑް، ކީލިއަން އެމްބާޕޭ ވިއްކާލަން އެ ކްލަބުން ކިޔާ އަގުގައި އެ ޑީލް ކުރިއަށްގެންދަން ސައުދީ ޕްރޮފެޝަނަލް ލީގު (ޕްރޯ ލީގު)ގެ ކްލަބް އަލް-ހިލާލް އިން ތައްޔާރު ކަމަށް ރިޕޯޓްތައް ބުނެފި އެވެ.
އަންނަ ސީޒަނުގެ ނިޔަލަށް ޕީއެސްޖީގެ ކޮންޓްރެކްޓްގައި ހުރި އެމްބާޕޭ އެ އެއްބަސްވުން އާ ނުކުރާތީ، ޕީއެސްޖީން މި ފަހަރުގެ ޓްރާންސްފާގައި އޭނާ ވިއްކާލަން އޮތީ ނިންމައިފަ އެވެ. އެއީ، އަންނަ އަހަރު ކޮންޓްރެކްޓް ހަމަވުމުން، އެމްބާޕޭ ހިލޭ ޓްރާންސްފާއެއްގައި ޕީއެސްޖީ ދޫކޮށްލުމުގެ ފުރުސަތު އޮތުމުން، އެއްވެސް ފީއެއް ނުލިބި އެ ވަރުގެ ކުޅުންތެރިއަކު ގެއްލެން ބޭނުންނުވާތީ އެވެ.
އެހެންވެ، ޕީއެސްޖީން ވަކި ސަބަބެއް ހާމަކުރުމެއް ނެތި، އެ ޓީމުން ޕްރީ ސީޒަނަށް ނެގި ސްކޮޑުގައި އެމްބާޕޭ ނުހިމަނަ އެވެ. އެމްބާޕޭ ބަދަލުވާނެ ކަމަށް މީޑިއާގައި އެންމެ އަޑުފެތުރެެނީ ސްޕެއިނުގެ ގަދަބާރު، ރެއާލް މެޑްރިޑް އަށެވެ. އެކަމަކު، ކުއްލިއަކަށް އެ ރޭހުގެ ތެރެއަށް މި ވަނީ އަލް-ހިލާލް ވަދެފަ އެވެ.
ރިޕޯޓްތައް ބުނާގޮތުން އަލް-ހިލާލް އިން ވަނީ ރަސްމީކޮށް އެމްބާޕޭގެ ޓްރާންސްފާ ކަންތައްތައް މަޝްވަރާ ކުރަން ޕީއެސްޖީ އަށް ހުށަހަޅައިފަ އެވެ. އަދި ޕީއެސްޖީން އެމްބާޕޭ ވިއްކާލަން ކިޔާ އަގު އުޅޭ ވަރަށް ބިޑް ކުރަން ވެސް އަލް-ހިލާލް އޮތީ ތައްޔާރަށެވެ. އެ ގޮތުން، އަލް-ހިލާލް އިން އެމްބާޕޭ އަށް 333 މިލިއަން ޑޮލަރުގެ ބިޑެއް ކުރާނެ ކަމަށް ރިޕޯޓްތައް ބުނެ އެވެ.
މި ފަހަރުގެ ޓްރާންސްފާ މާކެޓްގައި އަލް-ހިލާލް އިން ވަނީ ޔޫރަޕްގެ ކްލަބްތަކަށް ކުޅޭ މަޝްހޫރު ތިން ކުޅުންތެރިއަކުގެ ސޮއި ހޯދައިފަ އެވެ. އެ ގޮތުން އެ ޓީމުން ގެނައީ، ޗެލްސީގެ ޑިފެންޑަރު، ހަލީދޫ ކުލިބާލީ އާއި ވުލްވްސްގެ މިޑްފީލްޑަރު ރުބެން ނެވޭސް އަދި ލާޒިއޯގެ ސާގެއި މިލިންކޮވިޗް-ސަވިޗް އެވެ. ތިން ކުޅުންތެރިންނަށް އެކުގައި 200 މިލިއަން ޑޮލަރާ ގާތްކުރާ އަދަދަކަށް ވަނީ ހަރަދުކޮށްފަ އެވެ.
