ޕެރިސް (ޖުލައި 23) - ޖަޕާންގައި ކުރިއަށްގެންދާ ޕްރީ ސީޒަން ޓުއާ އަށް ޕީއެސްޖީ ނެގި ސްކޮޑުން އެ ކްލަބުގެ ތަރި ކިލިއަން އެމްބާޕޭ ބާކީކޮށްފި އެވެ.
އެމްބާޕޭ ސްކޮޑުން ބާކީކުރި ސަބަބެއް ޕީއެސްޖީން ނުބުނެ އެވެ. އެކަމަކު، މި ނިންމުމާ އެކު އެމްބާޕޭ، 24، ރެއާލް މެޑްރިޑަށް ބަދަލުވާން އުޅޭކަމުގެ އަޑުތައް ވަނީ އަނެއްކާވެސް ފެތުރެން ފަށައިފައެވެ.
ޕީއެސްޖީން ޖަޕާނުގެ ޓުއާ އަށް ގެންދާ ސްކޮޑުގައި އެމްބާޕޭގެ ކޮއްކޮ، އުމުރުން 16 އަަހރުގެ އީތާން އެމްބާޕޭ ހިމެނެއެވެ. އަދި ބްރެޒިލްގެ ތަރި ނޭމާ ވެސް ވަނީ ސްކޮޑުގައި ހިމަނައިފައެވެ.
އެމްބާޕޭ ދިޔައީ ޕީއެސްޖީގެ ޕްރީ ސީޒަންގެ ފަރިތަކުރުންތަކުގައި ބައިވެރިވަމުންނެވެ. އެކަމަކު، ޕްރީ ސީޒަންގެ ޓުއާ އަށް ނެގި ސްކޮޑުން އެމްބާޕޭ މި ބާކީކުރީ ޕީއެސްޖީން ހުށަހަޅާފައިވާ ގޮތަށް ކޮންޓުރެކްޓް އާކުރަން އެމްބާޕޭ ދެކޮޅު ހަދާފައިވަނިކޮށެވެ.
ޕީއެސްޖީއާއެކު އެމްބާޕޭ ހަދާފައިވާ ކޮންޓުރެކްޓް އަންނަ އަހަރު ހަމަވާނެއެވެ. ކޮންޓުރެކްޓް ހަމަވުމާއެކު، އެމްބާޕޭ އަށް ހިލޭ ޓްރާންސްފާއެއްގައި އެހެން ކްލަބަކަށް ބަދަލުވެވޭނެއެވެ. ކޮންޓުރެކްޓް އާނުކުރާނެކަން އޭނާ ވަނީ މި އަހަރުގެ މެއި މަހު ވެސް ބުނެފައެވެ.
"ކޮންޓުރެކްޓްގައި ބާކީ އެއް އަހަރު އެބައޮތް. އެހެންވީމަ ކޮންޓުރެކްޓްގެ މުއްދަތު ހަމަކުރާނަން،" އެމްބާޕޭ ބުނެފިއެވެ.
އެކަމަކު އެމްބާޕޭ ހިލޭ ދޫކޮށްލަން ބޭނުންނުވާ ކަމަށް ޕީއެސްޖީން ވަނީ ބުނެފައެވެ. ޕީއެސްޖީން އެމްބާޕޭ އަށް ހުށަހެޅީ ކޮންޓުރެކްޓް އާނުކުރަން ނުވަތަ، މި ޓްރާންސްފާގައި އެހެން ކްލަބަކަށް ބަދަލުވުމެވެ.
"ދުނިޔޭގެ އެންމެ މޮޅު ކުޅުންތެރިޔާ ހިލޭ އެހެން ކްލަބަކަށް ބަދަލުވުމަކީ ގަބޫލްކުރެވޭނެކަމެއް ނޫން. އެއީ ވާނެކަމެއް ނޫން،" ޕީއެސްޖީގެ ރައީސް ނާސިރު އަލް ހެލާފީ މި މަހުގެ ކުރީކޮޅު ވިދާޅުވިއެވެ.
މީގެ އަހަރެއްހާ ދުވަސް ކުރިން ޕީއެސްޖީގެ ކޮންޓުރެކްޓް އެމްބާޕޭ އާކުރީ ރެއާލް އަށް ބަދަލުވާން ގާތްވެފައި ވަނިކޮށެވެ. އެކަމަކު، ރެއާލްގެ ހުށަހެޅުމަށް ފުރަގަސްދީ، އޭނާ އޭރު ނިންމީ ޕީއެސްޖީގައި މަޑުކުރާށެވެ. ޕީއެސްޖީއާއެކު އޭރު އެމްބާޕޭ ސޮއިކުރީ ދެ އަހަރު ދުވަހުގެ އެއްބަސްވުމެކެވެ. އިތުރު އެއް އަހަރަށް ކޮންޓުރެކްޓް އާކުރުމުގެ އިހްތިޔާރު އޮތް ނަމަވެސް، ކޮންޓުރެކްޓް އާކުރަން މިހާރު އޭނާ ބޭނުމެއްނުވެއެެވެ.
ފާއިތުވި 14 އަހަރު ރެއާލަށް ކުޅުނު ފްރާްންސްގެ ފޯވަޑްް ކަރީމް ބެންޒެމާ އެ ކްލަބު ދޫކޮށް، ސައޫދީ އަރަބިއްޔާގެ އަލް އިއްތިހާދަށް ބަދަލުވުމާ އެކު، ރެއާލް އިން ދަނީ ފޯވަޑަކަށް ބަލަމުންނެވެ.
އެހެންކަމުން، ޕީއެސްޖީން އެމްބާޕޭ ވިއްކާލަން ބޭނުންވާނަމަ، އެންމެ ރަނގަޅު އެއް ކްލަބަށް އޮތީ ރެއާލެވެ.
