ކުރީގެ ރައީސް އަބްދުﷲ ޔާމީންގެ ވެރިކަމުގައި ރައްޔިތުންނަށް ހިތްހަމަޖެހިގެން ނުއުޅެވުނު ކަމަށާއި މާރާމާރީ އާއި ހަމަނުޖެހުން އެއިރު އޮތީ އާންމުވެފައި ކަމަށް ޑިފެންސް މިނިސްޓަރު މާރިޔާ އަހުމަދު ދީދީ މިއަދު ވިދާޅުވެއްޖެ އެވެ.
"އަޅުގަނޑު ގޭގައި ހުރެފައި މަޖިލީހަށް ދިޔަ ދިިޔުމާ ދޭތެރޭގައި، މަޖިލީހާ ދިމާލަށް އޮންނަ މަގަށް އަޅާލާއިރު ލޭ މަތިން ހުރަސްކޮށްފައި ކިތަންމެ ދުވަހަކު ދާންޖެހޭ. ރައްޔިތުން އެކަކު އަނެކަކާ ރުޅިގަދަވެ، ކަތިލާފައި ތިއްބާ. ކަޓަރު އަޅާ، މާރާމާރީ ހިންގާ، މިކަންކަން އޮތީ އާންމުވެފަ،" ހުޅުމާލޭ ފޭސް ދޭއްގައި ރައީސް އިބްރާހިމް މުހައްމަދު ސޯލިހުގެ ކެމްޕެއިން ޖަގަހައެއް ހުޅުވައިދެއްވުމަށްފަހު މާރިޔާ ވިދާޅުވި އެވެ.
ރައީސް ސޯލިހުގެ ކެމްޕެއިން ޝިއާރަކީ "އުފާވެރި، އަމާން ރާއްޖެ" އެވެ. މާރިޔާ ވިދާޅުވީ ރައީސް ސޯލިހުގެ ވެރިކަމުގައި ރައްޔިތުންނަށް ހަމަޖެހުމެއް ލިބިއްޖެ އަމާންކަން ދަމަހައްޓަން އަދިވެސް އެމަނިކުފާނަށް ވޯޓެއް ދޭންޖެހޭ ކަމަށެވެ.
އޭގެ އިތުރުން، މާލޭގެ ރައްޔިތުންނަށް ސަރުކާރުން ދިން ގޯއްޗާއި ފްލެޓު ހަދައި ނިމުމުން ދިރިއުޅުން ލުއިވެ، މާލޭގެ ކުލި ވެއްޓޭނެ ކަމަށް ވެސް މާރިޔާ ވިދާޅުވި އެވެ.
"އެ ބިންތައް ތަރައްގީކުރެވުނީމަ އަދި ފްލެޓުތައް ވެސް ނިމުނީމަ މާލޭގެ މި ކުލިތަކަށް ކޮންމެވެސް ވަރެއްގެ ތަސައްލީއެއް ލިބިގެންދާނެ. އެންމެނަށް ވެސް ހަމަޖެހިލައިގެން ދިރިއުޅެވޭ ގޮތް ވާނެ،" މާރިޔާ ވިދާޅުވި އެވެ.
ޖަގަހަ ހުޅުވުމުގެ ޖަލްސާގައި ވާހަކަ ދައްކަވަމުން ރައްޔިތުންގެ މަޖިލީހުގެ ހުޅުމާލޭ ދާއިރާގެ މެމްބަރު އަަލީ ނިޔާޒު ވިދާޅުވީ އެ ޖަގަހަ ފޭސް ދޭއްގައި ހުޅުވުމުގެ ފުރުސަތު ލިބުމަކީ މި ސަރުކާރުން ކުރި ބުރަ މަސައްކަތުގެ ނަތީޖާ ކަމަށެވެ.
"ބައެއް ބޭފުޅުންނަށް ހީވަނީ އަޅުގަނޑުމެން ހުޅުމާލޭގައި، ވަކިން ހާއްސަކޮށް ފޭސް ދޭއްގައި ކެމްޕެއިން ކުރުމަކީ ނުވާނެ ކަމެކޭ. މިހާތަނަށް ސިޔާސީ ގޮތުން އެމްޑީޕީއަށް ވެސް ސަރުކާރަށް ވެސް މި ސަރަހައްދާ ގުޅޭ ގޮތުން ދިމާވެފައި ހުރީކީ އެހާ ހިތްހަމަޖެހޭ ކަންތައްތަކެއް ނޫން،" ނިޔާޒް ވިދާޅުވި އެވެ.
ނިޔާޒް ވިދާޅުވީ އޭނާއަކީ މަސައްކަތް ކުރުމަށްފަހު އެކަން ދައްކަން އުޅޭ މީހެއް ނޫން ކަމަށާއި ނަމަވެސް ޖަމިއްޔާތަކާއި ރައްޔިތުންނާ ގާތުން އަބަދުވެސް މަސައްކަތް ކުރައްވަމުން ގެންދަވާ ކަމަށެވެ.
"އަޅުގަނޑަކީ ކުރާ ކޮންމެ މަސައްކަތަކަށްފަހު ފޮޓޯއެއް ނަގައި، ޓުވީޓުކޮށް މީޑިޔާއަށް ހިއްސާ ކުރާ މީހެއް ނޫން. އެހެންނަމަވެސް މަސައްކަތް ކުރާނެ ބައިވަރު ގޮތްތައް އެބަހުރި،" އޭނާ ވިދާޅުވި އެވެ.
އަންނަ ސެޕްޓެމްބަރު 9، ގައި ބާއްވާ ރިޔާސީ އިންތިހާބަށް ކުރިމަތިލާން މިއަދު ހުޅުވާލިއިރު ރައީސް ސޯލިހުގެ އިތުރުން ޖުމްހޫރީ ޕާޓީގެ ގާސިމް އިބްރާހިމާއި މޯލްޑިވްސް ނެޝަނަލް ޕާޓީގެ މުހައްމަދު ނާޒިމް ކުރިމަތިލައްވަ އެވެ. ރައްޔިތުންގެ މަޖިލީހުގެ ރައީސް އުފެއްދެވި ދަ ޑިމޮކްރެޓްސްގެ ރިޔާސީ ޕްރައިމަރީއަށް ކުރިމަތިލުމުގެ މުއްދަތު ހަމަވިއިރު، ފޯމު ހުށަހެޅުއްވީ ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބެވެ.
އެންމެ ބޮޑު އިދިކޮޅު ޕާޓީ ޕްރޮގްރެސިވް ޕާޓީ އޮފް މޯލްޑިވްސް އިން ބުނަނީ އެ ޕާޓީގެ ކެންޑިޑޭޓަކީ ކޮރަޕްޝަންގެ މައްސަލައެއްގައި 11 އަހަރުގެ ޖަލު ހުކުމެއް ތަންފީޒު ކުރައްވަމުންދާ ކުރީ ރައީސް ޔާމީން ކަމަށެވެ.
