ރާއްޖޭގެ ފުޓްބޯޅަ އެހެން ހަރުފަތަކަށް ގެންދިޔުމަށްޓަކައި އެޓޯލް ފުޓްބޯޅަ ކުލަބާ އެކު ދިވެހި ފުޓްބޯޅަ އަށް އިންގިލާބީ ބަދަލެއް ގެންނަވާނެކަމަށް ކުރީގެ ޓޫރިޒަމް މިނިސްޓަރު އަދި ގައުމީ ފުޓްބޯޅަ ޓީމުގެ ކުރީގެ މެނޭޖަރު، އަލީ ވަހީދު (ބަލަކް) ވިދާޅުވެއްޖެ އެވެ.
އިނގިރޭސިވިލާތުގައި ހުންނަވައި ފުޓްބޯޅަ ކޯޗިންގެ ގިނަ މަސައްކަތްތަކެއް ކުރެއްވުމަށްފަހު އަލީ ވަހީދު އެނބުރި މާލެ ވަޑައިގަތީ ޖުލައި 11 ވަނަ ދުވަހު އެވެ. އެ ދުވަހު މާލެ ވަޑައިގެން އަލީ ވަހީދު ވަނީ އޭނާގެ އެންމެ ބޮޑު ފޯކަސް އޮތީ ފުޓްބޯޅަ އަށް ކަމަށާއި ވިސްނުމަކީ ކްލަބަކާ ގުޅިގެން ފުޓްބޯޅަ އަށް ހިދުމަތްކުރުމަށް ކަމަށް ވިދާޅުވެފަ އެވެ.
ފުޓްބޯޅައަށް ހިދުމަތްކުރައްވާނެ ގޮތުގެ މާސްޓާ ޕްލޭން ހިއްސާކުރުމަށް ރޭ ހިރިޔާ ސްކޫލުގައި ބޭއްވި ރަސްމިއްޔާތުގައި އަލީ ވަހީދު ވަނީ އޭނާގެ އާ ކުލަބު ތައާރަފްކުރައްވާފަ އެވެ. "އެޓޯލް ފުޓްބޯޅަ ކުލަބު"ގެ ނަމުގައި އާ ކުލަބެއް އުފައްދަވައި އެ ކުލަބާއިއެކު ފުޓްބޯޅައިގެ ކަންކަން ކުރިއަށްގެންދަން ރާވާފައިވާ ގޮތް އޭނާ ހިއްސާކުރެއްވި އެވެ.
މިގޮތުން އެޓޯލް ފުޓްބޯޅަ ކުލަބަށް އެނަން ދެވުނު ސަބަބާއި، ކުލަބުގެ ލޯގޯ އާއި ކުލަބުގެ ކުލަތައްވެސް އޭނާ ވަނީ ހިއްސާކުރައްވާފަ އެވެ.
ކުލަބުގެ މާސްޓާ ޕްލޭނުގައި އަލީ ވަހީދު ފާހަގަކުރައްވާފައިވަނީ މައިގަނޑު ފަސްކަމެކެވެ. އެއީ މިއަދުން ފެށިގެން ކުރިއަށް އޮތް 20 އަހަރުގެ ތެރޭގައި ހާސިލްކުރަން ބޭނުންވާ ފަސްކަންތަކެވެ.
އަލީ ވަހީދު (މ) ގެ ޗެއާމަންކަމުގައި ނިއު ރޭޑިއަންޓަށް ކާމިޔާބު ހޯދައިދިން ދެ ތަރިން ކަމަށްވާ ދަގަނޑޭ (ކ) އާއި .އުމެއިރު (ވ).-- ފޮޓޯ: މުހައްމަދު ޝާބިން/ އަދަދު
އެޓޯލް ފުޓްބޯޅަ ކުލަބުން ހާސިލްކުރަން ބޭނުންވާ އަމާޒުތައް
1. ކުރިއަށް އޮތް އެއް އަހަރުގެ ތެރޭގައި ބައިނަލްއަގްވާމީ ކުލަބު ނެޓްވޯކެއް ބިނާކުރުން.
2. ކުރިއަށް އޮތް ތިން އަހަރުގެ ތެރޭގައި ދިވެހިރާއްޖޭގެ ކޮންމެ ރަށެއްގައި ކުލަބުގެ ވިއުގައެއް ގާއިމް ކުރުން.
3. ކުރިއަށް އޮތް ފަސް އަހަރުގެ ތެރޭގައި ރާއްޖޭގެ ޗެމްޕިއަންކަން ހޯދުން.
4. ކުރިއަށް އޮތް 10 އަހަރުގެ ތެރޭގައި އޭއެފްސީ ކަޕްގެ ޗެމްޕިއަންކަން ހޯދުން.
5. ކުރިއަށް އޮތް 15 އަހަރުގެ ތެރޭގައި ގައުމީ ޓީމަށް އާ ޖީލެއް ބިނާކުރުން.
6. ކުރިއަށް އޮތް 20 އަހަރުގެ ތެރޭގައި ވޯލްޑް ކަޕަށް ދިވެހިރާއްޖެ ކޮލިފައިވުން.
ކުލަބުގެ އަމާޒުތައް ފާހަގަކުރައްވަމުން އަލީ ވަހީދު ވިދާޅުވީ އެންމެ ބޮޑު އިސްކަމެއް ދެއްވާނީ ކުލަބުގެ ބިންގާ ރަނގަޅުކުރުމަށް ކަމަށާއި، މިގޮތުން ފުރަތަމަ ތިން އަހަރުގައި ބައިނަލްއަގްވާމީ ނެޓްވޯކެއްގެ ތެރެއިން ދިވެހި ކުޅުންތެރިންނަށް ފުރުސަތުތައް ހޯދައިދިނުމާއި ރާއްޖޭގެ އެކި ކަންކޮޅު ތަކުގައި ތިބި ހުނަރުވެރި ކުޅުންތެރިންނަށް ފުޓްބޯޅައިގައި ކުރިއަށްދިޔުމަށް ބޭނުންވާ މަގު ތަނަވަސްކޮށްދިނުންކަމަށެވެ.
"އިންގްލެންޑް، ސްޕެއިން، މިޑްލްއީސްޓް، ދިވެހިރާއްޖެ ހިމެނޭހެން އަޅުގަނޑުމެން ނެޓްވޯކެއް ގާއިމްކުރާނަން. ފުރަތަމަ ފަހަރަށް ރާއްޖޭގެ ކުލަބެއް އިންޓަނޭޝަނަލް ނެޓްވޯކެއްގެ ތެރެއަށް ވަންނާނެ."
"ދިވެހިރާއްޖޭގެ ޓެލެންޓްސް ހޯދައި އެ ކުޅުންތެރިންނަށް ކުލަބުން ފުރުސަތު ދޭނަން. އަދި އެ ކުޅުންތެރިންގެ ޑިވެލޮޕްމަންޓަށްވެސް ބޭނުންވާ ކަންކަން ކުރާނަން"
އަލީ ވަހީދު ރޭ އެޓޯލް ފުޓްބޯލް ކްލަބް ލޯންޗް ކުރަން ބޭއްވި އިވެންޓްގެ ތެރެއިން.--- ފޮޓޯ: މުހައްމަދު ޝާބިން/ އަދަދު
"ކުލަބުތަކަށް ބުނެލަން ބޭނުންވަނީ ރޭހަށް އަޅުގަނޑުމެން މިރެއިން ފަށައިގެން ނިކުތީއޭ. ތިބޭފުޅުންވެސް ގަދަކުރޭ، އަޅުގަނޑުމެންވެސް ގަދަ ކުރާނާން. ފައިދާކުރާނީ ހަމަ ދިވެހި ފުޓްބޯޅައަށް."
ކުލަބުން ކުޅުންތެރިން ތަރައްގީކުރުމުގައި މައިގަނޑު ހަތަރުކަމަކަށް އިސްކަންދޭނެކަން ފާހަގަކުރަމުން އަލީ ވަހީދު ވިދާޅުވީ މިހާރުގެ ފުޓްބޯޅައިގައި މި ހަތަރުކަންތަކަކީވެސް ކާމިޔާބަށްދާން ބަލާއިރު މުހިންމު ކަންތައްތައް ކަމަށެވެ. މިގޮތުން ކުޅުންތެރިޔާގެ ޓެކްނިކަލް ހުނަރު ތަރައްގީކުރުމާއި، ފިޒިކަލީ ރަނގަޅުކުރުމާއި، ސައިކޮލޮޖިކަލީ ވަރުގަދަކުރުމުގެ އިތުރުން ސޯޝަލީ މީހުންނާ ގުޅޭ ބަލައިގަންނަ ކުޅުންތެރިއަކަށް ހަދަން އެކުލަބުގެ އެކަޑީއިން މުހިންމު އިސްކަމެއް ދެއްވާނެކަމަށެވެ.
އޭނާ ވިދާޅުވީ އިނގިރޭސިވިލާތުގައި ކޯޗިންގެ ކަންކަން ދަަސްކޮށް އުނގެނެމުންދިޔައިރު އެންމެ ބޮޑަށް ފާހަގަވިކަމަކީ އެކަޑެމީތަކުގައި މި ހަތަރުކަމަށް ފޯކަސް ކުރެވިގެން ގިނަ މަސައްކަތްތަކެއް ކުރުން ކަމަށާއި، ރާއްޖޭގެ ބެލެނިވެރިންނާއި އެކަޑެމީތަކުގެ ކޯޗުން ގުޅިގެން މި ހަަތަރުކަންތަކަށް ފޯކަސްކޮށްގެން މަސައްކަތްކޮށްފި ނަމަ ހުނަރުހުރި ވަރުގަދަ ތަރިންތަކެއް އުފެއްދޭނެކަމަށެވެ.
މިވަރުގެ ބޮޑު މާސްޓާ ޕްލޭނެއް ތަންފީޒުކޮށް ކުރިއަށްގެންދިޔުމަށް ބޭނުންވާ ފައިސާ ހޯދާނީ ކިހިނެއްތޯ ނޫސްވެެރިން ސުވާލުކުރުމުން އޭނާ ވިދާޅުވީ ސްރީލަންކާގެ ބައެއް ކުންފުނިތަކާއި ރާއްޖޭގެ ކުންފުނިތަކުންވެސް ސްޕޮންސާޝިޕް ލިބޭނެކަމުގެ ޔަގީންކަން އެބައޮތް ކަމަށާއި، ދިވެހި ފުޓްބޯޅަ ހިންގުމަށް ފައިސާ ލިބޭނެކަމުގެ އިތުބާރު އެބައޮތް ކަމަށެވެ.
މިސާލެއްގެ ގޮތުގައި އަލީ ވަހީދު ސިފަކުރެއްވީ 2012ގައި ނިއުރޭޑިއަންޓާ ހަވާލުވެ އެކުލަބު ހިންގެވިއިރު ވެސް ކުލަބަށް އޭނާ އަމާޒުކުރެއްވި އަދަދަށް ފައިސާ ހޯއްދެވިކަމާއި، އެކުލަބަށް ބޭނުންވާ ކާމިޔާބީ ލިބި ރަނގަޅު މިސްރާބަކަށް ކުލަބު ގެންދެވުނު ކަމަށެވެ.
އަލީ ވަހީދު ވިދާޅުވީ އެޓޯލް ފުޓްބޯޅަ ކުލަބުގެ ޗެއާމަން އަކީ އޭނާ ނޫންކަމަށާއި، އޭނާ އަކީ ކުލަބުގެ ޑިރެކްޓަ އޮފް ފުޓްބޯލް އަދި ކުލަބުގެ ހެޑް ކޯޗު ކަމަށެވެ. އެހެންކަމުުން، ނަތީޖާ ނުުނެރެވޭ ހިސާބުން ޒިންމާ ނަގާނެ ކަމަށް ވެސް އަލީ ވަހީދު ވިދާޅުވި އެވެ.
އަތޮޅުތަކުގެ ކުލަބުތަކާ، ޖަމިއްޔާތަކާ ގުޅިގެން މުޅި ރާއްޖެ ހިމެނޭ ވިއުގައެއް ގާއިމްކުރުމުގެ މަސައްކަތް މިހާރު ވެސް ފަށާފައިވާކަމަށް އަލީ ވަހީދު ވިދާޅުވި އެވެ.
