ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި ރައީސް އިބްރާހިމް މުހައްމަދު ސޯލިހުގެ ރަނިންމޭޓަކަށް ވެވަޑައިގަތުމުގެ ޝައުގު، ނައިބު ރައީސް ފައިސަލް ނަސީމް މިއަދު ފާޅުކުރައްވައިފި އެވެ.
"އަޅުގަނޑުގެ ޝައުގުވެރިކަން ފާޅުކޮށްފައި އޮންނާނީ،" ރާއްޖެ ޓީވީގެ ފަށާއިރު ޕްރޮގްރާމުގައި މިއަދު ހެނދުނު، އެ ޕްރޮގްރާމުގެ މެއިން ހޯސްޓު އާމިރު ސަލީމް ސުވާލު ކުރުމުން ފައިސަލް ވިދާޅުވި އެވެ.
އިޝާރާތް އެ ކުރެއްވީ ރަނިންމޭޓެއްގެ ޝައުގު ރައީސް ސޯލިހުގެ އަރިހުގައި ފާޅުކުރެއްވެވި ވާހަކަ އަށެވެ. އެ މަގާމު ބޭނުންފުޅުވިޔަސް، އެކަމަށް ވަކި ޝަރުތެއް ނެތްކަމާއި، ގޮތް ނިންމަވާނީ ރައީސް ސޯލިހުކަން ފާހަގަ ކުރެއްވެވި އެވެ.
ފައިސަލް، 50، ވިދާޅުވީ ނައިބު ރައީސެއްގެ ގޮތުގައި އިތުރު ދައުރެއްގައި ހިދުމަތް ކުރައްވަން ބޭނުންފުޅުވަނީ ފަށާފައިވާ ކަންކަން ކުރިއަށް ގެންދަން ބޭނުންފުޅުވާތީ ކަމަށެވެ.
"ކޮންމެ ކަމަކީ ވަކި ހިސާބަކުން ސްޓޮޕް ޖަހާލަންޖެހޭ ކަންކަމެއް ނޫން. ކުރިއެރުވެން އޮވޭ، ނުވަތަ ކުރިއަށް ގެންދިޔުން އޮވޭ،" މި ދައުރުގައި ފަށާފައިވާ ކަންކަމަށް އިޝާރާތް ކުރައްވައި ފައިސަލް ވިދާޅުވި އެވެ.
"އެ މަސައްކަތުގެ މެދުތެރެއިން ހުއްޓާލާފައި ގެއަށް ވަދެ ހުރުމަށް ވުރެ ބޮޑަށް އަޅުގަނޑުވެސް ހަމަ އެދޭ ކަމަކީ، އެދެނީ އަޅުގަނޑަށް ވެސް އެ މަސައްކަތް ކުރިއަށް ގެންދިޔުމުގެ ފުރުސަތު,"
ނައިބު ރައީސްގެ މަގާމުގައި އިތުރު ދައުރެއްގައި ހުންނެވުމަށް ފައިސަލްގެ ޝައުގު އޮތްއިރު، ފައިސަލް އަކީ އެކުގައި މަސައްކަތް ކުރެއްވުމަށް ވަރަށް ފަސޭހަ އަދި އެހާމެ އިތުބާރު ކުރެއްވޭ ބޭފުޅެއް ކަމަށް ރައީސް ސޯލިހު ވިދާޅުވެފައިވެ އެވެ.
ރިޔާސީ އިންތިހާބުގައި ވާދަކުރާ ކެންޑިޑޭޓުން ނަން ހުށަހަޅަން އަންނަ އާދީއްތަ ދުވަހު ހުޅުވާއިރު ރައީސް ސޯލިހުގެ އިތުރުން އެހެން ކެންޑިޑޭޓެއްގެ ވެސް ރަނިން މޭޓެއް އަދި އިއުލާނެއް ނުކުރައްވަ އެވެ.
ޖުމްހޫރީ ޕާޓީއަށް ނިސްބަތްވާ ފައިސަލްގެ އިތުރުން، ރައީސް ސޯލިހުގެ ރަނިން މޭޓަކަށް ވެވަޑައިގަތުމަށް އެހެން ބޭފުޅެއްގެ ޝައުގު އޮތްކަން އާންމުކޮށްފައެއް ނެތެވެ.
ރިޔާސީ އިންތިހާބުގައި ވާދަކުރައްވާނެކަން އިއުލާނު ކުރައްވައި ކެމްޕެއިން ކުރައްވާ ބޭފުޅުންގެ ތެރޭގައި ރައީސް ސޯލިހު، ޖުމްހޫރީ ޕާޓީގެ ލީޑަރު ގާސިމް އިބްރާހިމް، އެމްއެންޕީގެ ރައީސް މުހައްމަދު ނާޒިމް ހިމެނެ އެވެ. އެންމެ ބޮޑު އިދިކޮޅު ޕާޓީ ޕީޕީއެމްގެ ރިޔާސީ ކެންޑިޑޭޓަކަށް ކަނޑައަޅާފައި ވަނީ 11 އަހަރުގެ ޖަލު ހުކުމެއް ތަންފީޒުކުރާ ކުރީގެ ރައީސް އަބްދުﷲ ޔާމީނެވެ.
އެ ހުކުމް ދެމި އޮތްހައި ހިނދަކު ޔާމީންގެ ކެންޑިޑެސީ ބަލައިނުގަންނާނެ ކަމަށް އިލެކްޝަން ކޮމިޝަނުން ބުނެފައިވެ އެވެ.
