ރިޔާސީ އިންތިހާބުގައި އެއްބަސްވެވޭ އެއް ކެންޑިޑޭޓަކު ނެރުމަށް ޖުމްހޫރީ ޕާޓީ އާއި އެމްއެންޕީއާއެކު އެއްބަސްވުމަށްފަހު ވެސް ޑިމޮކްރަޓުން ވަކިން ކެންޑިޑޭޓަކު ނެރެން ރިޔާސީ ޕްރައިމަރީ ބޭއްވުމުގެ މަސައްކަތް ހުއްޓާނުލައި ކުރިއަށް ގެންދިއުމަށް އެ ޕާޓީން ނިންމައިފި އެވެ.
ޑިމޮކްރެޓުންގެ ވަގުތީ ޗެއާޕާސަން ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފު ވިދާޅުވީ ސެޕްޓެމްބަރު 9 ގައި އޮންނަ ރިޔާސީ އިންތިހާބަށް އެ ޕާޓީގެ ކެންޑިޑޭޓަކު ނެރުމަށް ބާއްވާ އެ ޕާޓީގެ ޕްރައިމަރީއަށް ކުރިމަތިލުމުގެ ފުރުސަތު ކުރިއަށް އޮތް ދެތިން ދުވަސްތެރޭގައި ހުޅުވާލާނެ ކަމަށެވެ.
"ޕްރައިމަރީގެ މަސައްކަތް ހުއްޓައެއް ނުލަން، އަޅުގަނޑުމެން ޕްރައިމަރީ އިއުލާން ކުރާނަން ކުރިއަށް އޮތް ދެތިން ދުވަހުގެ ތެރޭ،" ހަސަން ލަތީފު ވިދާޅުވި އެވެ.
ޕީޕީއެމް ރުހޭނަމަ، އިދިކޮޅު ހުރިހާ ސިޔާސީ ޕާޓީއަކުން އެއް ކެންޑިޑޭޓަކު ނެރުމަށް ޑިމޮކްރަޓުން އެއްބަސްވީ އިއްޔެ އެވެ. އެކަމަށް އެއްބަސްވީ ޑިމޮކްރެޓްސް އުފެއްދެވުމުގައި އިސްކޮށް އުޅުއްވާ ކުރީގެ ރައީސް މުހައްމަދު ނަޝީދާއި، ޖޭޕީގެ ލީޑަރު ގާސިމް އިބްރާހިމާއި، އެމްއެންޕީގެ ރައީސް މުހައްމަދު ނާޒިމް އިއްޔެ ބޭއްވި ބައްދަލުވުމަށް ފަހު އެވެ.
"އަޅުގަނޑުމެން އަދި ޕީޕީއެމާއި އެމްއާރުއެމް ވެސް ވާހަކަ ދައްކާނަން، މި ކަމަށް އެއްބަސްވެވޭތޯ، އަޅުގަނޑުމެން ތިން ޕާޓީން ބޭނުންވަނީ އެއް ކެންޑިޑޭޓަކު ނެރެން މި ރިޔާސީ އިންތިހާބަށް،" ޖޭޕީގެ ރިޔާސީ ކެންޑިޑޭޓުގެ ގޮތުގައިވެސް ހުންނެވި ގާސިމް ވިދާޅުވި އެވެ.
ނަމަވެސް، ޕީޕީއެމުން ވަނީ އެ ތިން ޕާޓީގެ ހުށަހެޅުމަށް ރައްދުދީ ޕީޕީއެމްގެ ރިޔާސީ ކެންޑިޑޭޓު އަބްދުﷲ ޔާމީނަކީ އެއްބަސްވެވޭ ކެންޑިޑޭޓަކަށް ހަމަޖެއްސުމަށް ހުށަހަޅައިފަ އެވެ.
އެމްއެމްޕީއާރުސީ ވިއްކި ރަށްތަކުގެ ތެރެއިން ވ. އާރަށް ވިއްކި މުއާމަލާތުގައި ރިޝްވަތު ހިފުމާއި މަނީ ލޯންޑަރިންގެ ކުށް ސާބިތުވެ ޔާމީން ވަނީ 11 އަހަރުގެ ޖަލަށް ލައިފަ އެވެ. އެހެންވެ، އޭނާއަށް އިންތިހާބުގައި ވާދަކުރަން ގާނޫނު ހުރަސް އަޅަ އެވެ.
ނަމަވެސް ޕީޕީއެމްއިން ބުނަމުންދަނީ އެ ޕާޓީގެ ކެންޑިޑޭޓަކީ ޔާމީން ކަމަށާއި، އަންނަ އާދީއްތަ ދުވަހު ކެންޑިޑެސީ ހުޅުވާލުމުން، ޔާމީންގެ ފޯމް ވެސް ހުށަހަޅާނެ ކަމަށެވެ.
އެގާރަ އަހަރުގެ ހުކުމް ދެމިއޮތްހާ ހިނދަކު ޔާމީންގެ ކެންޑިޑެސީ ސައްހަ ކަމަށް ބަލައި ނުގަންނާނެ ކަމަށް އިލެކްޝަންސް ކޮމިޝަންގެ ރައީސް ފުއާދު ވަނީ ވިދާޅުވެފަ އެވެ.
