އަންނަ ސެޕްމްބަރުމަހު ރާއްޖޭގައި ބާއްވާ ރިޔާސީ އިންތިހާބަށް ދަ ޑިމޮކްރެޓްސް އިން ނެރޭނެ ކެންޑިޑޭޓަކު ކަނޑައަޅަން ބާއްވާ ޕްރައިމަރީއަށް ޝައުގުވެރިކަމެެއް ނެތް ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
ޖުމްހޫރީ ޕާޓީގެ މައި އޮފީސް، މ.ކުނޫޒުގައި އެޕާޓީގެ ލީޑަރު ގާސިމް އިބްރާހީމާއި އެމްއެންޕީގެ ރައީސް މުހައްމަދު ނާޒިމާ އެކު ބޭއްވެވި ބައްދަލުވުމަށް ފަހު ނޫސްވެރިން ކުރި އެއް ސުވާލަކީ "ޑިމޮކްރެޓްސްގެ ޕްރައިމަރީއަށް ޝައުގުވެރިކަން އެބަހުރިތޯ" މި ސުވާލެވެ.
އެ ސުވާލުގެ ޖަވާބުގައި ނަޝީދު ވިދާޅުވީ "ނޫން ނެތް" ކަމަށެވެ.
އެމަނިކުފާނު މިހެން ވިދާޅުވި އިރު ދަ ޑިމޮކްރެޓްސް އުފެދުމުގެ އަސްލަކީ އެމްޑީޕީގެ ޕްރައިމަރީ ނާކާމިޔާބު ވެވަޑައިގަތުމުން އުފެދުނު ޚިޔާލުތަފާތުވުންތަކެވެ. އެ ޚިޔާލުތަފާތުވުންތަކުގައި "ފިކުރެއްގެ ދިރުން" ނަމުގައި ނަޝީދު ވަކި ފެކްޝަނެއް އުފެއްދެވި އެވެ.
ފަހުން ޕާޓީއަކަށް ބަދަލުވީ އެ ފެކްޝަނެވެ.
ޖޭޕީގެ ލީޑަރު އަދި ރިޔާސީ ކެންޑިޑޭޓް ގާސިމް އިބްރާހީމާއި އެމްއެންޕީގެ ރިޔާސީ ކެންޑިޑޭޓް ނާޒިމާ އެކު ނަޝީދު ބޭއްވެވި މަޝްވަރާ ތަކަށް ފަހު ތިން ބޭފުޅުން ވެސް ވިދާޅުވީ އިދިކޮޅު ޕީޕީއެމުން އެއްބަސް ވާ ނަމަ އިދިކޮޅުން އެއް ކެންޑިޑޭޓަކު ނެރެން އެ ތިން ބޭފުޅުން އެއްބަހެވެ.
އަންނަ ސެޕްޓެމްބަރު މަހުގެ ނުވަ ވަނަ ދުވަހު ބާއްވާ ރިޔާސީ އިންތިހާބަށް ޖުމްހޫރީ ޕާޓީއާއި އެމްއެންޕީން ކެންޑިޑޭޓުން ކަނޑައަޅާފައި ވާއިރު ޕީޕީއެމުން ވަނީ އެޕާޓީގެ ކެންޑިޑޭޓަކީ ކުރީގެ ރައީސް އަބްދުﷲ ޔާމީނުކަމަށް ކަނޑައަޅައިފަ އެވެ.
އެހެން ނަމަވެސް އެމްއެމްޕީއާރްސީގެ ބޮޑު ހިޔާނާތުގެ މައްސަލައެއްގައި ކްރިމިނަލް ކޯޓުން އިއްވާފައިވާ 11 އަހަރުގެ ޖަލުހުކުމެއް އޮތުމުން އެމަނިކުފާނަށް ވާދަކުރެއްވޭނެ ކަމަކަށް ނުބެލެވެ އެވެ. އޭގެ ބަދަލުގައި އެެހެން ކެންޑިޑޭޓަކު ނެރޭކަށް ޕީޕީއެމުން އަދި ނުނިންމަ އެވެ.
