މެންޗެސްޓާ (ޖުލައި 15) - ފައިނޭންޝިއަލް ޕެއާޕްލޭ (އެފްއެފްޕީ) ގަވައިދާ ހިލާފުވެފައިވާތީ ޔޫރަޕްގެ މައި ފުޓްބޯޅަ އިދާރާ ޔުއެފާ އިން މެންޗެސްޓާ ޔުނައިޓެޑާއި ބާސެލޯނާ އަށް ފިޔަވަޅުއަޅައިފި އެވެ.
އެ ގޮތުން ކުރިން ސީޒަނުގައި އައި ޔުނައިޓެޑްގެ ދަރަނިތައް ފޫބެއްދޭ ވަރަށް މި ފަހަރު އާމްދަނީ ހޯދިފައި ނުވާތީ ޔުއެފާ އިން ވަނީ ޔުނައިޓެެޑް 335،000 ޑޮލަރު އިން ޖޫރިމަނާކޮށްފަ އެވެ.
ބާސެލޯނާ އަށް ފިޔަވަޅު އަޅާފައިވަނީ ކްލަބްގެ މާލީ ލިޔެކިޔުންތަކުގައި ކުޅުންތެރިން ވިއްކައިގެންނާއި އެކިއެކި ޓްރާންސްފާ ފީތަކުން ލިބޭ ފައިސާ ކްލަބްގެ އެކައުންޓްގައި ހިމަނާފައިވާ ގޮތާއި ލިޔެކިޔުންތަކާ ފުށުއެރުންތަކެއް ހުރުމުންނެވެ. އެހެންވެ، ބާސެލޯނާ އަށް ދީފައިވަނީ 550،000 ޑޮލަރުގެ ޖޫރިމަނާ އެކެވެ.
ޔުއެފާ އިން ކްލަބްތަކުގެ ހިންގުން ހަރުދަނާ ކުރަން ހެދި އެފްއެފްޕީ ގަވާއިދުގައިވާ ގޮތުން ތިން އަހަރަށް ވުރެ ދިގު މުއްދަތަކަށް އެއް ކްލަަބެއްގެ ދަރަނި 30 މިލިއަން ޑޮލަރަށް ވުރެ ބޮޑުވެގެން ނުވާނެ އެވެ. މި ގަވާއިދަށް ނުފެތޭތީ ކޮންމެ އަހަރަކު ޔުއެފާ އިން ގިނަ ކްލަބްތަކަކަށް ފިޔަވަޅު އަޅަ އެވެ. މި ފަހަރު އެ ގަވައިދަށް ނުފެތޭތީ އެންމެ ބޮޑަށް ފިޔަވަޅު އެޅީ ބެލްޖިއަމްގެ ރޯޔަލް އެންޓްވާޕް އަދި ތުރުކީގެ ޓްރަބްޒޯންސްޕޯ އެވެ. މީގެއިން ކޮންމެ ޓީމެއް ވަނީ ދެ މިލިއަން ޑޮލަރުން ޖޫރިމަނާކޮށްފަ އެވެ.
މި ފަހަރު ފިޔަވަޅު އެޅުމުންފަހު ވަގުތު ސަލާމަތްވި ކްލަބްތަކުގެ ތެރޭގައި އިންޓަ މިލާން، އޭސީ މިލާން، ޕީއެސްޖީ، މޮނާކޯ، ރޯމާ އަދި މާސޭ ހިމެނެ އެވެ.
