ރައްޔިތުން މަޖިލީހުގެ ރައީސް މުހައްމަދު ނަޝީދު އުފެއްދެވި ޑިމޮކްރެޓްސް ޕާޓީގެ ވަގުތީ ކައުންސިލުގެ ފުރަތަމަ ބައްދަލުވުން މާދަމާ ބާއްވަން ހަމަޖައްސައިފި އެވެ.
އެ ޕާޓީގެ ތަރުޖަމާނު އަފްޝަން ލަތީފު "އަދަދު" އަށް ވިދާޅުވީ، ވަގުތީ ކައުންސިލްގެ ފުރަތަމަ ބައްދަލުވުން މާދަމާ ބާއްވާނެ ކަމަށެވެ. އަދި މިހާރު ޕާޓީން އިސްކަންދެނީ ރިޔާސީ އިންތިހާބުގައި ވާދަކުރާނެ ކެންޑިޑޭޓަކު ކަނޑައެޅުމަށާއި ރިޔާސީ އިންތިހާބުގައި ޕާޓީން ބޭނުންކުރާނެ މެނިފެސްޓޯގެ މަސައްކަތަށް ކަމަށް އޭނާ ވިދާޅުވި އެވެ.
"ރިޔާސީ އިންތިހާބަށް ކުރިމަތިލުމަށް އީސީން ކަނޑައަޅާފައިވާ ޓައިމްލައިނުގެ ތެރެއިން ކޮންމެހެން ނިންމަންޖެހޭ ނިންމުންްތައް ނިންމުމަށް [ކައުންސިލް ބައްދަލުވުމުގައި މަޝްވަރާކުރެވޭނީ].. އިންތިހާބު މިހާ ކައިރިވެފަ އޮތީމަ،" އޭނާ ވިދާޅުވި އެވެ.
ސެޕްޓެމްބަރު 9، ގައި ބާއްވާ ރިޔާސީ އިންތިހާބުގައި ވާދަކުރާ ކެންޑިޑޭޓުން ފޯމު ހުށަހެޅުމުގެ ފުރުސަތު މި މަހުގެ 23، ގައި އީސީން ހުޅުވާލާނެ އެވެ. ކުރިމަތިލުމުގެ މުއްދަތު ހަމަވާނީ އޮގަސްޓު 3، ވަނަ ދުވަހަށެވެ. އެހެންކަމުން، ރިޔާސީ ކެންޑިޑޭޓެއް ނެރޭނެ ކަމަށް ބުނެފައިވާ ޑިމޮކްރެޓުން އެކަމަށް ނިންމަން ޖެހޭ ނިންމުންތައް ނިންމުމަށް ބާކީ އޮތީ ހަފުތާއެއްހާ ދުވަހެވެ.
އަފްޝަން އިތުރަށް ވިދާޅުވީ، ޑިމޮކްރެޓުންގެ ކޮންގްރެސްއާ މެދު އަދި ޕާޓީން މަޝްވަރާ ނުކުރާ ކަމަށާއި އެކަމާމެދު ގޮތެއް ނިމުނުހާ އަވަހަށް އެކަން އިއުލާން ކުރައްވާނެ ކަމަށެވެ.
ޑިމޮކްރެޓުން ރިޔާސީ ކެންޑިޑޭޓަކާ މެދު ގޮތް ނިންމުމަށް ތައްޔާރުވާއިރު، ނަޝީދު ވަނީ އިދިކޮޅު ޕީޕީއެމާއެކު އެކުގައި ރިޔާސީ ކެންޑިޑޭޓަކު ނެރުމުގެ ހިޔާލުވެސް ހުށަހަޅުއްވާފަ އެވެ. ނަމަވެސް ޕީޕީއެމުން ވަނީ ނަޝީދުގެ ހިޔާލަށް ރައްދުދީ އެ ޕާޓީގެ ކެންޑިޑޭޓަކީ ޖަލުގައި ހުންނެވި ކުރީގެ ރައީސް އަބްދުﷲ ޔާމީން ކަމަށް ބުނާ ބުނުން ތަކުރާރުކޮށްފަ އެވެ.
ބެލެވޭ ގޮތުގައި ދެ ޕާޓީން މަޝްވަރާތައް ކުރިއަށް ގެންދިޔަ ނަމަވެސް ރިޔާސީ އިންތިހާބުގެ ފުރަތަމަ ބުރުގައި ދެ ޕާޓީންވެސް ވަކި ކެންޑިޑޭޓުން ނެރޭނެ އެވެ.
ދަ ޑިމޮކްރެޓްސް އަކީ އެމްޑީޕީގެ ރިޔާސީ ޕްރައިމަރީގައި ކުރިމަތިވެވަޑައިގެންނެވި ނާކާމިޔާބީއަށް ފަހު، ނަޝީދު އުފެއްދެވި 'ފިކުރެއްގެ ދިރުން' ހަރަކާތުގައި އިސްކޮށް އުޅުއްވި ބޭފުޅުން އުފެއްދެވި ޕާޓީއެކެވެ. ޕާޓީގެ ރަސްމީކޮށް ރަޖިސްޓްރީ ކުރުމަށްފަހު ނަޝީދު ޑިމޮކްރެޓްސްއަށް ސޮއިކުރެއްވީ މި މަހުގެ 13، ވަނަ ދުވަހުގެ ރޭ ބޭއްވި ޖަލްސާއެއްގަ އެވެ.
