ވެރިކަންކުރާ އެމްޑީޕީގެ ސޯޝަލް މީޑިއާ އެކްޓިވިސްޓެއްގެ ގޮތުގައި ހަރަކާތްތެރުވި ޝަމްއޫން ޖަލީލް (ލޫކަސް ޖަލީލް) އޭނާ އައްޔަނުކޮށްފައި ހުރި ސަރުކާރުގެ ސިޔާސީ މަގާމުން އިސްތިއުފާ ދީފި އެވެ.
ލޫކަސް ހުރީ ހެރިޓޭޖް މިނިސްޓްރީގެ ޑިރެކްޓަރެއްގެ މަގާމުގަ އެވެ. އޭނާ ހުރި ސިޔާސީ މަގާމުން އިސްތިއުފާ ދިންކަން އެންގުމަށް ރައީސް އިބްރާހިމް މުހައްމަދު ސޯލިހަށް ލިޔެފައިވާ ސިޓީގައި އިސްތިއުފާދިން ސަބަބެއް ބުނެފައެއް ނުވެ އެވެ. ނަމަވެސް، ރައީސް ސޯލިހު "އަބަދުވެސް ބަހައްޓަވާ ގާތް ކަމަށް" ޝުކުރު އަދާކޮށްފައިވެ އެވެ.
ސަރުކާރާ ލޫކަސް ދުރުވިއިރު، އޭނާ މިރޭ އެމްޑީޕީގެ ކުރީގެ ރައީސް މުހައްމަދު ނަޝީދު އިސްވެ ހުންނަވާ އުފެއްދެވި ދަ ޑިމޮކްރެޓްސްއާ ގުޅޭނެކަން "އަދަދު" އަށް ވަނީ ކަށަވަރުވެފަ އެވެ. މިދިޔަ މަހު އެމްޑީޕީން ވަކިވިވެވަޑައިގެން ނަޝީދު، ރަސްމީކޮށް ޑިމޮކްރެޓްސްއަށް ސޮއިކުރެއްވުމަށް ބާއްވާ ޖަލްސާ މިރޭ އާޓިފިޝަލް ބީޗުގައި އޮންނާނެ އެވެ. ލޫކަސް ވެސް އެ ޖަލްސާގައި ޑިމޮކްރެޓްސްއަށް ސޮއިކުރާނެ އެވެ.
ލޫކަސް ވަނީ ކުރީގެ ރައީސް އަބްދުﷲ ޔާމީނުގެ ވެރިކަމާއި ޑރ. މުހައްމަދު ވަހީދުގެ ވެރިކަމުގައި އެމްޑީޕީން އިދިކޮޅު ޕާޓީގެ ގޮތުގައި އޮތް އިރު ލޫކަސް ވަނީ ޕާޓީގެ ހަރަކާތްތަކުގައި އިސްކޮށް ހަރަކާތްތެރިވެފަ އެވެ.
ހާއްސަ ގޮތެއްގައި ސޯޝަލް މީޑިއާގައި އޭރުގެ ސަރުކާރުތަކަށް ފާޑުކިޔާ ހިންގި ސިޔާސީ ހަރަކާތްތަކުގެ އެންމެ ކުރީގައި ހުރި އެއް އެކްޓިވިސްޓަކީ ލޫކަސް އެވެ. އެގޮތުން ޔާމީނުގެ ވެރިކަމުގައި ފ. އަތޮޅު ސައޫދީ އަރަބިއްޔާގެ އިސް ފަރާތްތަކަކަށް ވިއްކާލުމާ ދެކޮޅަށް އޭނާ އަޑުއުފުލުމާއެކު، ފިތުނައުފެދޭ ގޮތަށް މައުލޫމާތު ފަތުރާ ކަމަށްބުނެ ލޫކަސް ހައްޔަރުވެސް ކުރި އެވެ.
ނަމަވެސް މި ވެރިކަމުގައި އެމްޑީޕީގެ ތެރޭގައި އުފެދުނު ހަމަނުޖެހުންތަކާއެކު ލޫކަސްގެ އަޑު ސޯޝަލް މީޑިއާގައި ވަނީ މަޑުވެފަ އެވެ. ނަޝީދު އާއި ރައީސް ސޯލިހާ ދެމެދު އުފެދުނު ހިޔާލުތަފާތުވުމަށްފަހު ޕާޓީ ދެބައިވި އިރުވެސް ލޫކަސް އެއްވެސް ކޮޅަކަށް އަރާ ފާޅުގައި މަސައްކަތް ކޮށްފައެއް ނުވެ އެވެ.
