ޒަގްރެބް، ކްރޮއޭޝިއާ (ޖުލައި 12) - ކްރޮއޭޝިއާގެ ރަށެއްގައި ޗުއްޓީ ހޭދަކުރަމުން ދަނިކޮށް ބަލިހާލަތު ގޯސްވެ، ސިކުނޑި އަށް ލޭ އެޅުމުގެ ސަބަބުން އިންޓެންސިވް ކެއާ ޔުނިޓް (އައިސީޔޫ)ގައި ފަރުވާ ދެމުން އަންނަ، ނެދަލެންޑްސްގެ ލެޖެންޑަރީ ގޯލްކީޕަރު، އެޑްވިން ވެން ޑަ ސާގެ ފުރާނަ އަށް ނުރައްކަލެއް ނެތް ކަމަށް އޭނާގެ އާއިލާ އިން ބުނެފި އެވެ.
މިދިޔަ ހުކުރު ދުވަހުން ފެށިގެން ވެން ޑަ ސާ، 52، އަށް އަންނަނީ ކްރޮއޭޝިއާގެ ހޮސްޕިޓަލެއްގެ އައިސީޔޫގައި ފަރުވާ ދެމުންނެވެ.
ވެން ޑަ ސާގެ އަންހެނުން، އެންމެރީ ވެން ކެސްޓެރެން، މީޑިއާ އަށް ނެރުނު ބަޔާނެއްގައި ބުނެފައިވަނީ ވެން ޑަ ސާ އަށް އައިސީޔޫގައި ފަރުވާ ދެމުން އައި ނަމަވެސް ހާލަތު އަންނަނީ ރަނގަޅުވަމުން ކަމަށާއި ފުރާނަ އަށް ނުރައްކަލެއް ނެތް ކަމަށް ޑޮކްޓަރުން ބުނެފައިވާ ކަމަށެވެ. އަދި ހޮސްޕިޓަލަށް ދާ ކޮންމެ ފަަހަރަކު، ވެން ޑަ ސާއާ މުއާމަލާތު ކުރަން ކުރާ މަސައްކަތުގައި ކުރިއެރުން ފެންނަ ކަމަށް ވެސް އެންމެރީ ނެރުނު ބަޔާނުގައި ބުނެފައިވެ އެވެ.
ކުރިން އަޔަކްސް އަށް ކުޅުނު ލެޖެންޑަރީ ކީޕަރު، ވެން ޑަ ސާ އެ ކްލަބްގެ އެޑްމިނިސްޓްރޭޝަނުގެ ކަންކަމާ ހަވާލުވެ، ފަހުން ޗީފް އެގްޒެކްޓިވްގެ މަގާމުގައި ހުރިއިރު، އެ ކްލަބްގެ އިދާރީ ހިންގުމުގެ އިސް ޒިންމާގައި 10 އަކަށް ވުރެ ގިނަ އަހަަރު ހޭދަކުރުމަށް ފަހު ވެން ޑަ ސާ ދާދި ފަހުން ވަނީ އެ މަގާމުން އިސްތިއުފާ ދޭން ނިންމާފައިވާކަން އިއުލާނުކޮށްފަ އެވެ.
އަޔަކްސް ދޫކޮށްލަން އުޅޭ ކަމުގެ ނިންމުން އިއުލާނުކުރުމަށު ފަހު، ޗުއްޓީ ދަތުރަކަށް ދިޔަ ވެން ޑަ ސާ އަށް މި ވަނީ ސިއްހީ ގޮތުން ޗެލެންޖިން ވަގުތަކާ ކުރިމަތިލާން ޖެހިފަ އެވެ.
އަޔަކްސްގެ މަގާމުން ވެން ޑަ ސާ އިސްތިއުފާ ދޭން ނިންމީ މި ވޭތުވެދިޔަ 14 އަހަރު ތެރޭ އެ ޓީމުގެ އެންމެ ނަތީޖާ ދަށް ސީޒަނަށް ފަހު އެވެ. އަަޔަކްސް އިން މި ފަހަރު ނެދަލެންޑްސްގެ ލީގު ނިންމާލީ ތިން ވަނައިގަ އެވެ.
