ޕެރިސް (ޖުލައި 10) - ކޮންޓްރެކްޓް އާ ކުރަން ބޭނުންނުވާތީ މައްސަލަ ޖެހިފައިވާ ޕީއެސްޖީގެ ފޯވާޑް، ކީލިއަން އެމްބާޕޭ ވިއްކާލުން ނޫން ގޮތެއް އެ ކްލަބަށް ނެތް ކަމަށް ޕީއެސްޖީގެ ކުރީގެ ސްޕޯޓިން ޑިރެކްޓަރު ލިއޮނާޑޯ ބުނެފި އެވެ.
އެމްބާޕޭ، 24، މި ވަގުތު ޕީއެސްޖީގެ ކޮންޓްރެކްޓްގައި ހުރީ އަންނަ އަހަރުގެ ޖޫން މަހުގެ ނިޔަލަށެވެ. ޕީއެސްޖީއާ އެކު ކޮންޓްރެކްޓް އާ ނުކުރާނެކަން އެމްބާޕޭ ވަނީ ހާމަކޮށްފަ އެވެ. އަދި އަންނަ ސީޒަނުގައި ވެސް ޕީއެސްޖީ އަށް ކުޅުމުގެ ޝައުގުވެރިކަން ހުރި ކަމަށް އެމްބާޕޭ ވަނީ ބުނެފަ އެވެ. މާނަ އަކީ އެމްބާޕޭ ވިސްނައިގެން ހުރީ އަންނަ އަހަރު ހިލޭ ޓްރާންސްފާއެއްގައި ކްލަބް ދޫކޮށްލުމަށެވެ.
ޕީއެސްޖީގެ ކޯޗަކަށް ލުއިސް އެންރީކޭ ހަމަޖައްސައި، މީޑިއާ އަށް އޭނާ ތައާރަފްކުރަން ބޭއްވި ނޫސްވެރިންގެ ބައްދަލުވުމުގައި ޕީއެސްޖީގެ ރައީސް ނާސިރު އަލް ހަލީފާ ވިދާޅުވީ، ކޮންޓްރެކްޓް އާ ނުކުރާނަމަ އެމްބާޕޭ އަށް ހިލޭ ކްލަބް ދޫކޮށްލަން ފުރުސަތު ދެވެން ނެތް ކަމަށެވެ. މިއާ އެކު، މި ފަހަރުގެ ޓްރާންސްފާގައި އެމްބާޕޭ، ޕީއެސްޖީ ދޫކޮށްލުމުގެ އަޑުތައް ވަނީ ގަދަވެފަ އެވެ.
"ޕީއެސްޖީން ރަނގަޅަށް ކަމެއް ކުރަންޏާ މިއީ އެމްބާޕޭ ދޫކޮށްލަން ވީ ވަގުތު، އެ ނޫން ގޮތެއް ނެތް،" ލެކިއުޕޭ އަށް ދިން އިންޓަވިއުއެއްގައި ލިއޮނާޑޯ ބުންޏެވެ.
ލިއޮނާޑޯ ބުނީ މިދިޔަ ދެތިން އަހަރު އެމްބާޕޭ އަށް އުޅުނީ މުސްތަގުބަލާ ގުޅޭގޮތުން ކަންތައްތަކެއް ނުނިންމިގެން ކަމަށެވެ. އަދި ޕީއެސްޖީން އެމްބާޕޭ އަށް ބަލައިގެން ޓީމެއް ހަދައިގެން ވީ ފައިދާއެއް ނެތް ކަމަށާއި އެމްބާޕޭ އަކީ ލީޑަރެއް ނޫންކަން ފެނިގެން ގޮސްފައިވާ ކަމަށް ލިއޮނާޑޯ ވަނީ ބުނެފަ އެވެ.
"އެމްބާޕޭ ނެތްއިިރު ވެސް ޕީއެސްޖީ އޮތް. އެހެންވީމަ އޭނަ ދިޔަސް ޕީއެސްޖީ އޮންނާނެ. އެމްބާޕޭ ޕީއެސްޖީގައި ހުއްޓައި، ތަފާތު ފަސް ކްލަބަކުން ޔޫރަޕިއަން ކަޕް (ޗެމްޕިއަންސް ލީގު) ހޯދައިފި. އޭގެއިން އެއްވެސް ޓީމަކުން ތަށި ހޯދީ އެމްބާޕޭ ހުރެގެނެއް ނޫން. އެހެންވީމަ، ޕީއެސްޖީން ބޭނުންވާ ކަމެއް އެމްބާޕޭ ދިޔަޔަސް ވާނެ،" ޕީއެސްޖީގައި ދެ ފަހަރެއްގެ މަތިން 10 އަހަރު ވަންދެން އެޑްމިނިސްޓްރޭޓިވް ގިނަ މަސައްކަތްތަކެއް ކުރި ލިއޮނާޑޯ ބުންޏެވެ.
އެމްބާޕޭ ހޯދުމުގެ ރޭހުގައި އެންމެ ބޮޑަށް އުޅެނީ ރެއާލް މެޑްރިޑް އެވެ. އެކަމަކު، 200 މިލިއަން ޑޮލަރުގެ ފީއެއް ދީފައި އެމްބާޕޭ ގެންނަން ރެއާލުން ބޭނުމެއްނުވެ އެވެ.
މޮނާކޯ ދޫކޮށް 2017 ވަނަ އަހަރު ޕީއެސްޖީ އަށް އެމްބާޕޭ ބަދަލުވީ ފުރަތަމަ ލޯން ޑީލެއްގަ އެވެ. އޭގެ ޖެހިގެން އައި އަހަރު ޕީއެސްޖީން ވަނީ 196 މިލިއަން ޑޮލަރުގެ ފީއެއް ދައްކައި، އެމްބާޕޭގެ އެއްބަސްވުން ދާއިމީ ކޮށްފަ އެވެ. އެ ޑީލުގައި އެންމެ އިސްކޮށް އުޅުނު އެއް ފަރާތަކީ ލިއޮނާޑޯ އެވެ.
