އެމެރިކާއިން ޔޫކްރެއިނަށް ކްލަސްޓާ މިޔުނިޝަން ފޮނުވުމަކީ ހަނގުރާމައިގައި ޖަރީމާ ހިންގާ ކަމަށް އިއުތިރާފުވުމުގެ އަމަލެއް ކަމަށް ރަޝިއާއިން ބުނެފި އެވެ.
އެމެރިކާގައި ހުންނަ ރަޝިއާ އެމްބަސީން ޓެލެގްރާމް މެދުވެރިކޮށް ނެރުނު ކުރު ބަޔާނެއްގައި ބުނީ ވައިޓް ހައުސްގެ ނޭޝަނަލް ސެކިއުރިޓީ ތަރުޖަމާނު ޖޯން ކާބީގެ ވާހަކަތައް ރަނގަަޅަށް އަޑުއިވުނު ކަމަށެވެ.
"އެ އޮފިޝަލް ވަނީ ޔޫކްރެއިން ހަނގުރާމައިގައި އެމެރިކާއިން ޖަރީމާ ހިންގާ ކަމަށް އިއުތިރާފްވެފައި،" ބަޔާނުގައި ބުންޏެވެ.
ޔޫކްރެއިން ހަނގުރާމައިގައި ކްލަސްޓާ މިޔުނިޝަން ބޭނުންކުރާ ކަމަށް ރަޝިއާ އާއި އެމެރިކާއިން ވެސް މީގެ ކުރިން ތުހުމަތުކޮށްފައިވެ އެވެ.
ކްލަސްޓާ މިޔުނިޝަންއަކީ 100 އަށް ވުރެ ގިނަ ގައުމުގައި މަނާ އެއްޗެކެވެ. އެއީ އެއް ފަހަރާ ގިނަ އަދަދެއްގެ ކުދި ބޮންތަކެއް ދޫކޮށްލައިގެން ބޮޑު ސަރަހައްދެއްގައި ގިނަ ބަޔަކު މަރާލަން ބޭނުންކުރާ އެއްޗެކެވެ.
އދ. ގެ އިތުރުން އިންސާނީ ހައްގުތަކަށް މަސައްކަތް ކުރާ ގްރޫޕްތަކުން ވެސް ވަކާލާތު ކުރަނީ ކްލަސްޓާ މިޔުނިޝަން ބޭނުންކުރުމާ ދެކޮޅަށެވެ.
އޭގެ އިތުރުން ހުޅަނގުގެ ގައުމުތަކުނުން ވެސް ބުނީ ޔޫކްރެއިނަށް ކްލަސްޓާ މިޔުނިޝަން ފޮނުވުމާ ދެކޮޅު ކަމަށެވެ.
ޖުމްލަ 111 ގައުމަކުން ވަނީ ކްލަސްޓާ މިޔުނިޝަން މަނާކުރުމުގެ މުއާހަދާގައި ސޮއިކޮށްފަ އެވެ. އެކަމަކު އެމެރިކާއިން އެ މުއާހަދާގައި ބައިވެރިއެއް ނުވެ އެވެ.
