ކުރިއަށް އޮތް ރިޔާސީ އިންތިހާބުގައި ރައީސް އިބްރާހިމް މުހައްމަދު ސޯލިހާއެކު ކޯލިޝަން ހަދަން ނިންމި ސަބަބު އެމްޑީއޭގެ ލީޑަރު އަދި ސަން ކުންފުނީގެ ވެރިޔާ އަހުމަދު ސިޔާމް މުހައްމަދު ސާފުކޮށްދެއްވައިފި އެވެ.
މީދޫ ދާއިރާގެ މެންބަރުކަން ކުރައްވާ ސިޔާމް ވެރިކަމަށް ކުރިމަތިލުއްވުމުގެ ވިސްނުންފުޅު ބަދަލުކުރައްވައި ރައީސް ސޯލިހަށް ތާއީދު ކުރަން ވަނީ ނިންމައިފަ އެވެ. އެ ނިންމުމާ މެދު ވާހަކަ ދައްކަވަމުން ސިޔާމް މިރޭ ވިދާޅުވީ ފާއިތުވީ 20، 25 އަހަރު ތެރޭގައި ވެރިކަންތަކުން ރައްޔިތުން ބޭނުންވާ އުންމީދުތައް ހާސިލުވާ މިންވަރު އޭނާއަށް ފެނިފައިވާ ކަމަށެވެ.
"ކޯލިޝަނެއް އޮތުމާއި ނެތުން ވެސް ފެނިއްޖެ. ބޭނުންވަނީ ރައްޔިތުންނަށް ވައުދުވެފައި ވައުދު ފުއްދަން. އެކަން ކުރެވޭނީ ފަސް އަހަރު ވެރިކަން ކުރެވިގެން. އަދި ކޯލިޝަނެއް އޭގެ އެންމެ ރަނގަޅު ގޮތުގައި ހިންގިގެން. ކޯލިޝަނެއް ފަސް އަހަރު ވަންދެން މައްސަލައެއް ނެތި ހިންގީ މިހާރުގެ ރައީސް ސޯލިހު،" ކުރީގެ ރައީސް އަބްދުﷲ ޔާމީނާއެކު ކޯލިޝަނެއްގައި ކުރިން ހުންނެވި ސިޔާމް ވިދާޅުވި އެވެ.
ސިޔާމް ފާހަގަ ކުރެއްވި ގޮތުގައި އޭނާ ރައީސް ސޯލިހަށް ތާއީދުކުރަން ނިންމެވި ދެ ވަނަ ސަބަބަކީ ޔޫކްރެއިން ހަނގުރާމަ އާއި ކޮވިޑާ ގުޅިގެން އިގްތިސޯދަށް އައި ލޮޅުންތަކުގެ ވަގުތުގައި އެމަނިކުފާނު ކަން ކުރެއްވި ގޮތުގެ މޮޅު ކަމުންނެވެ.
"އެ ވަގުތު މުޅި ރާއްޖޭގެ ހުރިހާ ވިޔަފާރިވެރިން ތިބީ ހަދާނެ ގޮތެއް ނެތި, ބޭންކްރަޕްޓު ވާނެ ކަމަށް ގަބޫލުކޮށްގެން, އެހެން ނަމަވެސް, ވަރަށް ގިނަ ވިޔަފާރިވެރިންނާ ހާލަތަކީ ކޮބައިތޯ. އޭރު އެންމެ މަތީ ތިބި ވިޔަފާރިވެރިން ބުނީ މި ހަލާކުވަނީ އޭ, ނެތި ދަނީއޭ. މެދުވެރިކޮށްފައި ހުރީ ވިސްނުން ތޫނު ކެތްތެރި ރައީސެއް،" ސިޔާމް ވިދާޅުވި އެވެ.
އެ ގަދަ ލޮޅުމުން ސަލާމަތްވެ ރާއްޖެ ކޮޅަށް ޖެއްސުނީ ބޭރު ގައުމުތަކުން ލޯނު ނަގައިގެން އަދި، ރިސޯޓު ހިންގާ މީހުންނާއި, ބޮޑު ވިޔަފާރި އާއި, ކުދި ވިޔަފާރި އާއި, ވަޒީފާ ތިބި މީހުންނަށް ސަރުކާރުން ދިން ލޯނާއި މާލީ ލުއިތަކުގެ ސަބަބުން ކަމަށް، ރިސޯޓުތައް ހިންގަވާ މަހުޖަނު ސިޔާމް ވިދާޅުވި އެވެ.
ކޮވިޑާއި ޔޫކްރެއިން ހަނގުރާމަ ފެށުމާއެކު އެ ކަމުގެ އަސަރު އޭނާގެ ސަން ކުންފުންޏަށް ވެސް ކުރި ކަމަށް ފާހަގަކުރެއްވި އެވެ.
"ހަ މިލިއަން އެބަ ދެޔޭ މުސާަރައަށް. ކިހިނެއްތޯ މުސާރަ ދޭނީ. މުސާރަ ދީ މި ކުންފުނި ބާއްވައިފިނަމަ ކުންފުނި ބޭންކްރަޕްޓޭ ވާނީ. އަޅުގަނޑު ގުޅިން ރައީސަށް, މިހެންނޭ ކަންތައް މިވަނީ, އެތައް ހާސް މުވައްޒަފުން ގެޔަށޭ ދާން ޖެހޭނީ. ނުކައޭ ތިބޭނީ،" ސިޔާމް ވިދާޅުވި އެވެ.
މުވައްޒަފުންނަށް މުސާރަ ދިނުމާއި ވިޔަފާރި ކޮޅަށް ޖެހުމަށް ހުރިހާ ކަމެއް ކޮށްދޭނެ ކަމުގެ ޔަގީން ކަން ރައީސް ދެއްވި ކަމަށް ސިޔާމް ވިދާޅުވި އެވެ.
ރައްޔިތުން ބޭނުންވަނީ މިއަށް ވުރެ މާ މުއްސަނދި ކަމުގައި ހަމަޖެހިގެން ރައްޔިތުން އުޅެން ކަމަށާއި ރައީސް ސޯލިހު ދެ ވަނަ ދައުރަކަށް ހޮފައިފިނަމަ އިގްތިސޯދު ދެގުނަ ކުރެވޭނެ ކަމުގެ ޔަގީން ކަން އޭނާ ވެސް އަށް އެބައޮތް ކަމަށް ވިދާޅުވި އެވެ.
