އެމެރިކާއިން ދިން ޑްރޯން ހަމަލާއެއްގައި ސީރިއާގައި އުޅުނު އިސްލާމިކް ސްޓޭޓް (އައިއެސް) ގްރޫޕްގެ ލީޑަރު މަރާލައިފި އެވެ.
އެމެރިކާއިން ބުނީ ޑްރޯންތައް ކުރި މަސައްކަތަށް ރަޝިއާގެ ޖެޓުތަކުން ހުރަސްއެޅި ނަމަވެސް، ކާމިޔާބުކަމާ އެކު ހަމަލާދީ އުސާމާ އަލް މުހާޖިރް މަރާލާފައިވާ ކަމަށެވެ.
އޭނާއަަށް ހަމަލާދިނީ އަލެޕޯ ސަރަހައްދުގައި ސައިކަލެއްގައި ދަތުރު ކުރަނިކޮށެވެ. އިތުރު ތަފްސީލެއް އެމެރިކާއިން ހާމައެއް ނުކުރެ އެވެ.
އެމެރިކާގެ ސެންޓްރަލް ކޮމާންޑުން ނެރުނު ބަޔާނެއްގައި ބުނީ އެ ހަމަލާގައި އާއްމުންގެ އެއްވެސް މީހަކު މަރުވިކަމުގެ ރިޕޯޓެއް ނުލިބޭ ކަމަށެވެ.
ޑްރޯންތަކަށް ރަޝިއާއިން ފުރައްސާރަ ކުރާ ކަމަށް ބުނެ، އެމެރިކާއިން މިދިޔަ ހަފުތާގައި ތަކުރާރުކޮށް ޝަކުވާކުރި އެވެ.
ރަޝިއާއިން ބުނީ އެ ގައުމާއި ސީރިއާ ގުޅިގެން މިދިޔަ ހަފުތާގައި ފެށި ތަމްރީން ޕްރޮގްރާމެއް ނިންމަން ހަމަޖެހިފައި ވަނީ ހޯމަ ދުވަހު ކަމަށެވެ.
ސީރިއާގެ އުތުރުގައި އެމެރިކާގެ ޑްރޯންތައް ދުއްވުމަކީ ޕްރޮޓޮކޯލްއާ މުޅިން ހިލާފަށް ހިންގާ އަމަލެއް ކަމަށް ބުނެ ރަޝިއާއިން ފާޑުކިޔެވެ.
