މަރުގެ ތުހުމަތު ކުރެވޭ ބޮޑު ކުށްވެރިއަކު ޕެންސިލްވޭނިއާގެ ޖަލުން ފިލުމުން، އޭނާ ހޯދުމަށް ބޮޑު އޮޕަރޭޝަނެއް ފަށައިފި އެވެ.
ވޮރަން ސިޓީގައި ބޮޑު ޖަންގައްޔެއް ކައިރީގައި ހުންނަ ޖަލުން މައިކަލް ބާންހަމް ފިލީ ޖިމް ސާމާނުގެ މައްޗަށް ކޮޅަށް އަރައި، ފުރާޅުން ނިކުމެގެންނެވެ.
ވޮރަން ޕޮލިސް ޑިޕާޓްމަންޓުން އާއްމުންނަށް އެންގީ ސަމާލުވެ ތިބުމަށެވެ. ބާންހަމްއަކީ ގިނަ ދުވަހު ޖަަންގަލީގައި އުޅުމުގެ "ސަވައިވަލް" އުކުޅު ވެސް ދަސްކޮށްފައިވާ މީހެކެވެ.
ބާންހަމް ޖަލުގައި ނެތްކަން އެނގުނީ ހުކުރު ދުވަހުގެ ހެނދުނެވެ.
ފުރާޅުން މައްޗަށް އަރައި، ބެޑްޝީޓްތަކެއް ބޭނުންކޮށް ދިގު ވާގަނޑެއް ހަދައި، ބިންމައްޗަށް ފޭބީ އެ ވާގަނޑުގެ އެހީގައި ކަމަށް އޮފިޝަލުން ބުންޏެވެ.
ޖަލު ކައިރީގައި އޮންނަ އެލެގްހެނީ ޖަންގައްޔަކީ 515،000 އޭކަރުގެ ބޮޑު ސަރަހައްދެކެވެ. ޖަންގަލި ތެރެ ބެލުމުގެ މަސައްކަތް ވެސް މިހާރު ދަނީ ކުރަމުންނެވެ.
އުމުރުން 34 އަހަރުގެ ބާންހަމް ޖަލުގައި ހުރީ ގަސްދުގައި އަލިފާން ރޯކުރުމާއި ވައްކަމުގެ ކުށުގަ އެވެ. އޭގެ އިތުރުން އަންހެނަކު މަރާލުމުގެ ތުހުމަތު ވެސް އޭނާގެ މައްޗަށް ކުރެވެ އެވެ. އޭނާއާ ދެކޮޅަށް އުފުލާފައިވާ އިތުރު ދައުވާތަކުގެ ތެރޭގައި ރޭޕް އާއި މީހުން ބަންދުކޮށްގެން ގެންގުޅުން ފަދަ ކަންކަން ހިމެނެ އެވެ.
