މަނާކޮށްފައިވާ ކްލަސްޓާ މިޔުނިޝަން ޔޫކްރެއިނަށް ފޯރުކޮށްދޭން ނިންމާފައިވާ ކަމަށް އެމެރިކާގެ ސަރުކާރުން އިއުލާންކޮށްފި އެވެ.
އެމެރިކާގެ ނޭޝަނަލް ސެކިއުރިޓީ އެޑްވައިޒަރު ޖޭކް ސަލިވަން ވިދާޅުވީ ކްލަސްޓާ މިޔުނިޝަން ފޯރުކޮށްނުދީ ގިނަ ދުވަސްވީ އޭގެ ސަބަބުން އާއްމުންނަށް ނުރައްކާ އުފެދޭތީ ކަމަށެވެ.
"އެކަމަކު ރަޝިއާގެ ސިފައިން ޔޫކްރެއިންގެ މައްޗަށް އަތްގަދަ ކުރުމުން ވެސް އާއްމުންނަށް ނުރައްކާވުމުގެ ފުރުސަތު އެބަ އުފެދޭ،" އޭނާ ވިދާޅުވި އެވެ.
ކްލަސްޓާ މިޔުނިޝަންއަކީ 100 އަށް ވުރެ ގިނަ ގައުމުގައި މަނާ އެއްޗެކެވެ. އެއީ އެއް ފަހަރާ ގިނަ އަދަދެއްގެ ކުދި ބޮންތަކެއް ދޫކޮށްލައިގެން ބޮޑު ސަރަހައްދެއްގައި ގިނަ ބަޔަކު މަރާލަން ބޭނުންކުރާ އެއްޗެކެވެ.
"މި ތަކެތި ބޭނުންކުރާނީ ވަރަށް ރައްކާތެރިކަމާ އެކު ބަލައިގެންކަން ޔޫކްރެއިނުން ވަނީ ލިޔުމުން ކަށަވަރުކޮށްދީފައި،" ސަލިވަން ވިދާޅުވި އެވެ.
އދ. ގެ އިތުރުން އިންސާނީ ހައްގުތަކަށް މަސައްކަތް ކުރާ ގްރޫޕްތަކުން ވެސް ވަކާލާތު ކުރަނީ ކްލަސްޓާ މިޔުނިޝަން ބޭނުންކުރުމާ ދެކޮޅަށެވެ.
އޭގެ އިތުރުން ހުޅަނގުގެ ގައުމުތަކުގެ ތެރެއިން ޖަރުމަނުން ވެސް ބުނީ ޔޫކްރެއިނަށް ކްލަސްޓާ މިޔުނިޝަން ފޮނުވުމާ ދެކޮޅު ކަމަށެވެ.
ޖަރުމަނާ އެކު ޖުމްލަ 111 ގައުމަކުން ވަނީ ކްލަސްޓާ މިޔުނިޝަން މަނާކުރުމުގެ މުއާހަދާގައި ސޮއިކޮށްފަ އެވެ. އެކަމަކު އެމެރިކާއިން އެ މުއާހަދާގައި ބައިވެރިއެއް ނުވެ އެވެ.
