ލަންޑަން (ޖުލައި 6) - މެންޗެސްޓާ ޔުނައިޓެޑަށް ބަދަލުވި އެންމެ ބޮޑު އެއް ސަބަބަކީ ޗެލްސީގެ ޕްލޭންގައި އޭނާ ކުރިއަރަން ފުރުސަތެއް ނެތުން ކަމަށް އެ ޓީމު ދޫކޮށް ޔުނައިޓެޑަށް ސޮއިކުރި އިނގިރޭސި މިޑްފީލްޑަރު، މޭސަން މައުންޓް ބުނެފި އެވެ.
މިދިޔަ ބުދަ ދުވަހު، މައުންޓް ވަނީ 70 މިލިއަން ޑޮލަރުގެ ޑީލެއްގެ ދަށުން ޗެލްސީ ދޫކޮށް މެންޗެސްޓާ ޔުނައިޓެޑާ އެކު، ފަސް އަހަރުގެ ކޮންޓްރެކްޓެއްގައި ސޮއިކޮށްފަ އެވެ. ޔުނައިޓެޑުން މައުންޓްގެ ސޮއި ހޯދީ ގިނަ ބިޑްތަކެއް ކުރުމަށް ފަހު އެވެ. ފުރަތަމަ ތިން ބިޑް ޗެލްސީން ވަނީ އަނބުރާ ފޮނުވާލައިފަ އެވެ.
ޔުނައިޓެޑާ ގުޅުމަށް ފަހު ދިން އިންޓަވިއުގައި މައުންްޓް ބުނީ ދުރުރާސްތާ ޕްލޭނެއްގެ ދަށުން ޗެލްސީން ކުރާ މަސައްކަތުގައި އޭނާ އަށް ޖާގައެއް އޮތް ކަމުގެ އިހުސާސް ނުކުރެވޭތީ އެ ޓީމު ދޫކޮށްލަން ވިސްނީ ކަމަށެވެ.
"މީގެ މަސްތަކެއް ކުރިން އަހަންނަށް އިހުސާސް ކުރެވެން ފަށައިފި، ލޯންގް ޓާމަށް ޗެލްސީން ގެންގުޅޭ ޕްލޭނުގައި އަހަންނަށް އޮތް ފުރުސަތު ކުޑަކަން، ދެން، އަހަންނަށް ލިބުނީ ޔުނައިޓެޑްގެ އޮފާ އެ ހިސާބުން، އަހަރެން ގޮތް ނިންމައިފިން،" މައުންޓް، 24، ބުންޏެވެ.
"މިއީ ވަރަށް ބޮޑު ކްލަބެއް، ތަފާތު މޮޅު ކުޅުންތެރިން މި ޓީމަށް ކުޅެފައިވޭ، އަހަރެންނަށް ހުށަހެޅުން ލިބުނު ހިސާބުން މި ޓީމާ ގުޅުމުގެ ޝައުގުވެރިކަން އުފެދިއްޖެ،"
ޗެލްސީގައި 18 ވަރަކަށް އަހަރު ހޭދަކުރި މައުންޓް ބުނީ އެ ޓީމު ދޫކޮށްލުން އެއީ ފަސޭހަ ނިންމުމެއް ނޫން ކަމަށެވެ. ކެރިއަރަށް ވިސްނާފައި ބައެއް ނިންމުންތައް ނިންމަންޖެހޭނެކަން ފާހަގަކޮށް، މައުންޓް ބުނީ މުސްތަގުބަލުގައި ޔުނައިޓެޑާ އެކު ގިނަ ކާމިޔާބީތައް ހޯދަން ބޭނުންވާ ކަމަށެވެ.
ޔުނައިޓެޑްގައި މައުންޓް ބޭނުންކުރާ ހަތް ނަމްބަރު ޖޯޒީ އަކީ އެ ކްލަބަށް ކުޅެފައިވާ ލެޖެންޑަރީ ކުޅުންތެރިން ބޭނުންކުރި ނަމްބަރެކެވެ. އޭގެ ތެރޭގައި އެރިކް ކެންޓޮނާ، ޖޯޖް ބެސްޓް، ޑޭވިޑް ބެކަމް އަދި ކްރިސްޓިއާނޯ ރޮނާލްޑޯ ހިމެނެ އެވެ. މައުންޓް ބުނީ އެ ނަމްބަރު ލިބުމަަކީ ވެސް ހާއްސަ ޝަރަފެއްގެ ގޮތުގައި ދެކޭ ކަމެއް ކަމަށެވެ.
