ޕެރިސް (ޖުލައި 6) - ޕީއެސްޖީގެ ކޯޗަކަށް ލުއިސް އެންރީކޭ ހަމަޖައްސައި، އެ ކްލަބްގެ ތަރި ކީލިއަން އެމްބާޕޭގެ ކޮންޓްރެކްޓް އާ ކުރަން މަސައްކަތް ފަށައިފި އެވެ.
މިދިޔަ ޑިސެމްބަރު މަހު ފީފާ ވޯލްޑް ކަޕުން ސްޕެއިން ކެޓުމަށް ފަހު އެ ޓީމާ ދުރަށް ދިޔަ އެންރީކޭ، ޕީއެސްޖީއާ އެކު ސޮއިކޮށްފައިވަނީ ދެ އަހަރުގެ ކޮންޓްރެކްޓެއްގަ އެވެ. ކޮންޓްރެކްޓްގައި ސޮއިކުރުމަށް ފަހު، އެންރީކޭ، 53، ބުނީ ޕީއެސްޖީގެ މި ޕްރޮޖެކްޓާ މެދު އޭނާ ވަރަށް ހިތްހަމަޖެހޭ ކަމަށާއި އެ ކްލަބްގެ މެނޭޖްމަންޓާ ގުޅިގެން ރަނގަޅު މަސައްކަތްތަކެއް ކުރެވޭނެ ކަމުގެ ޔަގީންްކަން އެބައޮތް ކަމަށެވެ.
ފާއިތުވި ސީޒަނުގައި ޕީއެސްޖީ އަށް އިރުޝާދުދިން ފްރާންސްގެ ކޯޗު ކްރިސްޓޮފް ގަލްޓިއޭ އަށް ކުރިމަތިވި ޕްރެޝަރަކީ ޔޫރަޕްގައި ޕީއެސްޖީ ގޮވައިގެން ރަނގަޅު ހިސާބަކަށް ނުދެވުމެވެ.
އެންރީކޭ ވަނީ މީގެ ކުރިން ރޯމާ އާއި ބާސެލޯނާ އަދި ސެލްޓަ ވިގޯ އަށް ކޯޗުކޮށްދީފަ އެވެ. މީގެ ތެރެއިން ބާސެލޯނާގައި އެންރީކޭ ވަނީ ގިނަ ކާމިޔާބީތަކެއް ހޯދައިފަ އެވެ. އެންރީކޭގެ އިރުޝާދުގެ ދަށުން ބާސެލޯނާ އަށް ކުޅުނު ނޭމާ މި ވަގުތު ހުރީ ޕީއެސްޖީގަ އެވެ. އެކަމަކު، ނޭމާ އާއި އެމްބާޕޭ މި ފަހަރު ޕީއެސްޖީ ދޫކޮށްލާނެ ކަމަށް މީޑިއާގައި އަންނަނީ ވާހަކަ ދެކެވެމުންނެވެ.
އަންނަ ސީޒަނުގެ ނިޔަލަށް ޕީއެސްޖީގެ ކޮންޓްރެކްޓްގައި ހުރި، އެމްބާޕޭ، 24، ވަނީ މި އަހަރު އެ ކްލަބް ދޫކޮށްނުލާނެ ކަމަށާއި އެކަމަކު، ޕީއެސްޖީއާ އެކު ދެން އިތުރު ކޮންޓްރެކްޓެއްގައި ސޮއިނުކުރާނެ ކަމަށް ބުނެފަ އެވެ. މާނަ އަކީ، އަންނަ އަހަރުގެ ޖޫންގެ ނިޔަލަށް ޕީއެސްޖީގައި އެމްބާޕޭގެ ކޮންޓްރެކްޓް ހަމަވުމުން ހިލޭ ޓްރާންސްފާއެއްގައި އޭނާ އަށް ބޭނުން ޓީމަކަށް ބަދަލުވާން ފުރުސަތު އޮތުމެވެ.
ޕީއެސްޖީގެ ރައީސް ނާސިރު އަލް ހަލީފާ ވިދާޅުވީ އެމްބާޕޭ އަންނަ ސީޒަނުގައި ޕީއެސްޖީގައި މަޑުކުރަން ބޭނުންވާނަމަ އާ ކޮންޓްރެކްޓެއްގައި ސޮއިކުރަން ޖެހޭނެ ކަމަށާއި އެ ގޮތަށް އެކަން ނުކޮށް އަންނަ އަހަރު އޭނާ އަށް ހިލޭ ޕީއެސްޖީ ދޫކޮށްލަން ފުރުސަތު ނުދޭނެ ކަމަށެވެ.
"ދުނިޔޭގެ އެންމެ މޮޅު ކުޅުންތެރިޔާ ހިލޭ އަހަރެމެން ދޫކޮށްލަން ފުރުސަތެއް ނުދެވޭނެ،" ހަލީފާ ވިދާޅުވީ އެވެ.
މޮނާކޯ ދޫކޮށް 2017 ވަނަ އަހަރު ޕީއެސްޖީ އަށް އެމްބާޕޭ ބަދަލުވީ ފުރަތަމަ ލޯން ޑީލެއްގަ އެވެ. އޭގެ ޖެހިގެން އައި އަހަރު ޕީއެސްޖީން ވަނީ 196 މިލިއަން ޑޮލަރުގެ ފީއެއް ދައްކައި، އެމްބާޕޭގެ އެއްބަސްވުން ދާއިމީ ކޮށްފަ އެވެ. ޕީއެސްޖީން އެމްބާޕޭގެ ކޮންޓްރެކްޓް އާ ކުރުމަށް ފަހު، އޭނާ އަށް މިހާތަނަށް ވަނީ ބޮޑު އިންވެސްޓެއްކޮށްފަ އެވެ. އެކަމަކު، ޕީއެސްޖީއާ އެކު، ދިގު މުއްދަތަކަށް މަޑުކުރަން އެމްބާޕޭ ބޭނުމެއް ނުވެ އެވެ.
