ހެލްތު މިނިސްޓްރީން އދ. އަތޮޅު ހޮސްޕިޓަލާއި އެ އަތޮޅު ސިއްހީ މަރުކަޒުތަކަށް ފޮނުވި މިލިއަނެއްހާ ރުފިޔާގެ އައިޓީ ސާމާނު، އިއްޔެ މޫސުން ގޯސްވެގެން އަޑިއަށް ދިޔަ "ރިކާޑޯ" ދޯންޏާއެކު ގެއްލިއްޖެ އެވެ.
މާލެއިން ފުރައިގެން މަހިބަދޫއަށް ދަތުރުކުރަމުން ދަނިކޮށް ވިއްސާރަވެ ރިކާޑޯ ދޯނި ދިޔަވާތީ އެކަމުގެ ރިޕޯޓު ކޯސްޓްގާޑަށް ކުރީ ރޭ 6:50 ހާއިރު އެވެ. އެ ދޯނި އަޑިއަށް ދިޔައީ މާލެ އަތޮޅާއި އަރިއަތޮޅާއި ދެމެދު އޮންނަ އަލިހުރަސް ކަނޑުން ދަތުރުކުރަނިކޮށެވެ. ދޯނީގައި ތިބި މީހުން ސަލާމަތް ކުރެވުނަސް މުދާ ސަލާމަތެއް ނުކުރެވެ އެވެ.
ހެލްތު މިނިސްޓްރީގެ އެގްޒެކެޓިވް ޑިރެކްޓަރު އައިމިނަތު ޝަތުފާ "އަދަދު"އަށް ވިދާޅުވި ގޮތުގައި، ރާއްޖޭގެ ސިއްހީ ދާއިރާ ޑިޖިޓަލައިޒް ކުރުމުގެ ގޮތުން ފެށި މަޝްރޫއުގެ ދަށުން އދ. އަތޮޅު ހޮސްޕިޓަލަށާއި އެ އަތޮޅު ހުރިހާ ސިއްހީ މަރުކަޒުތަކަށް ހެލްތު މިނިސްޓްރީން ފޮނުވި އައިޓީ ސާމާނު ހުރީ އެ ދޯނީގަ އެވެ.
ކޮމްޕިއުޓާ ސިސްޓަމްތަކާއި، ޕްރިންޓަރާއި، ވީޑިއޯ ކޮންފަރެންސް ކެމެރާތަކާއި، ޓެބްލެޓްތަކާއެކު މިލިއަނެއްހާ ރުފިޔާގެ މުދާ ދޯންޏާއެކު އަޑިއަށްގޮސްފައިވާ ކަމަށް ޝަތުފާ ވިދާޅުވި އެވެ.
ދޯނީގައި ހުރި އައިޓީ ސާމާނުތައް ގެންދަން ހަމަޖެހިފައި އޮތީ މަހިބަދޫގައި ހުންނަ އަތޮޅު ހޮސްޕިޓަލަށެވެ. އެ ސާމާނުތައް އެހެން ރަށްތަކަށް ފޮނުވަން ހަމަޖެހިފައި އޮތީ އަތޮޅު ހޮސްޕިޓަލު މެދުވެރިކޮށެވެ.
ރިކާޑޯ ދޯނީގައި ތިބި އަށް މީހުން ސަލާމަތް ކުރީ، އދ. އަތޮޅު ފުލުހުންގެ ލޯންޗެއް އެ ދޯނި އޮތް ސަރަހައްދަށް ގޮސްގެންނެވެ.
ސިއްހީ ދާއިރާ ޑިޖިޓަލައިޒްކޮށް އައިޓީ އިންފްރާންސްޓްރަކްޗާ ހަރުދަނާ ކުރުމަށް ސަރުކާރުން ފެށި 56 މިލިއަން ރުފިޔާގެ މަޝްރޫއުގެ ދަށުން ފަސް ރީޖަނަލް ހޮސްޕިޓަލާއި, 15 އަތޮޅު ހޮސްޕިޓަލް އަދި 163 ސިއްހީ މަރުކަޒަކަށް އައިޓީ ސާމާނު ހަވާލު ކުރަން ހަމަޖެހިފައިވެ އެވެ.
ހެލްތު މިނިސްޓްރީން މީގެ ކުރިން އާންމު ކުރި މައުލޫމާތުން އެނގޭ ގޮތުގައި އޭގެ ތެރޭގައި ހިމެނެނީ، 608 ކޮމްޕިއުޓާ ސިސްޓަމާއި, 44 ލެޕްޓޮޕާއި 500 ޓެބްލެޓާއި 551 ޕްރިންޓަރާއި 14 ވީޑިއޯ ކޮންފަރެންސް ސިސްޓަމެވެ.
ހުޅަނގު މޫސުމުގެ ވިއްސާރަ ރާއްޖޭގެ ހުރިހާ ސަރަހައްދަކަށް ކުރަމުންދާއިރު، މޫސުމާ ބެހޭ ގައުމީ އިދާރާ މެޓް އޮފީހާއި އެމްއެންޑީއެފް އަދި ފުލުހުން ވެސް ވަނީ ކަނޑުދަތުރުކުރާ ފަރާތްތައް މޫސުމަށް ސަމާލުވުމަށް އެދިފަ އެވެ.
