އެލިއާ އިންވެސްޓްމަންޓްސް އާއި މޯލްޑިވްސް އިންސްޓިއުޓް އޮފް ޓެކްނޮލޮޖީ (އެމްއައިޓީ) ގުޅިގެން ލޯންޗުތަކުގެ ކެޕްޓަނުންނަށް އަމާޒުކޮށްގެން ތަމްރީނު ޕްރޮގްރާމެއް ފަށައިފި އެވެ.
ޖުމްލަ 50 ބައިވެރިންނާއިއެކު ކުރިއަށް ގެންދާ އެ ޕްރޮގްރާމަކީ 2014 އިން ފެށިގެން ކޮންމެ އަހަރަކު ވެސް ބާއްވަމުން އަންނަ ޕްރޮގްރާމެކެވެ. މިފަހަރުގެ ޕްރޮގްރާމަކީ ކޮވިޑްގެ މެދުކެނޑުމަށްފަހު ބާއްވާ ފުރަތަމަ ޕްރޮގްރާމެވެ. "ބޯޓް އޮޕަރޭޓާސް ޓްރެއިނިން" ގެ ނަމުގައި ކުރިއަށް ގެންދާ އެ ތަމްރީނު ޕްރޮގްރާމް ކުރިއަށް ގެންދާނީ މި މަހުގެ ހަތަރަކުން ހަޔަކަށެވެ.
ސެޝަންތަކަކަށް ބަހާލައިގެން ކުރިއަށް ގެންދާ އެ ތަމްރީނު ޕްރޮގްރާމުގެ މައިގަނޑު މަގުސަދަކީ ކަނޑު އުޅަނދުފަހަރުގެ ކެޕްޓަނުން ހޭލުންތެރިކޮށް، ކަނޑު އުޅަނދުފަހަރުގެ ސަލާމަތާއި ރައްކާތެރިކަމާއި ބެހޭ ފަންނީ މައުލޫމާތު ފޯރުކޮށްދިނުމެވެ.
ތަމްރީނު ޕްރޮގްރާމް ފެށުމުގެ ރަސްމިއްޔާތުގައި އެލިއާގެ މެނޭޖިން ޑިރެކްޓަރު އަލާއު އަލީ ވިދާޅުވީ، ކަނޑުމަތީގއި އެންމެ މުހިއްމު ދެކަމަކީ ސަލާމަތާއި، ކަނޑު ފަޅުތަކުގެ ރައްކާތެރިކަން ކަމަށެވެ.
"އެންމެ މުހިއްމު ދެކަންތަކުގެ ތެރޭގަ ސޭފްޓީ އަދި ތިމާވެށީގެ ރައްކާތެރިކަން ހިމެނޭ، އަޅުގަނޑުގެ އުންމީދަކީ މި ޕްރޮގްރާމް ނިމޭއިރު ކަނޑުމަތީގައި ރައްކާތެރިކަމާއިއެކު ދަތުރުކުރުމަށް ބޭނުންވާ ހުރިހާ ސްކިލްއެއް ތިބޭފުޅުންނަށް ދަސްވުން،" އަލާއު ފާހަގަކުރެއްވިއެވެ.
އެ ޕްރޮގްރާމުގައި އައުޓްބޯޑް އިންޖީނު އެޅި ސްޕީޑްބޯޓުތަކުގައި އިތުބާރާއިއެކު ދަތުރުކުރުމަށް ބޭނުންވާ ތިއަރީއާއި ހުނަރުތައް ހިމެނޭ ހާއްސަ ސެޝަންތައް ހިމެނެ އެވެ.
ސްޕީޑް ބޯޓަށް ހާއްސަ މެނިއުވާ ކުރުމުގެ އުކުޅުތަކާއި، ނެވިގޭޝަން އަދި ޗާޓް ރީޑިންގް އަދި ސޭފްޓީ ޕްރޮޓޮކޯލްތަކާއި، ކުއްލި ހާލަތުގައި އަމަލުކުރާނެ ގޮތްތަކުގެ އިތުރަށް ފަސްޓް އެއިޑް، ފަޔާ ސޭފްޓީ އަދި އައުޓްބޯޑު އިންޖީނު ބެލެހެއްޓުމާއި މައްސަލަ ހައްލުކުރުމުގެ ސެޝަންތަކެއް ވެސް އެ ޕްރޮގްރާމްގައި ހިމެނެ އެވެ.
ތިން ދުވަހުގެ މުއްދަތަކަށް ކުރިއަށް ގެންދާ ޕްރޮގްރާމުގައި ރިސޯޓްތަކާއި، ކަނޑު އުޅަނދުފަހަރު ގެންގުޅޭ ކުންފުނިތަކުގެ އިތުރުން ސަރުކާރުގެ ބައެއް އިދާރާތައް ބައިވެރިވެ އެވެ.
