ވިލާ ކޮލެޖުގެ 2023 ވަނަ އަހަރު ސެޕްޓެމްބަރު އިންޓޭކްގައި ފެށުމަށް 147 ކޯހެއްގައި ބައިވެރިވުމުގެ ފުރުސަތު ހުޅުވާލައިފި އެވެ.
ކޯސްތައް ތައާރަފު ކުރުމަށްޓަކައި އިއްޔެ އެ ކޮލެޖުގައި ބޭއްވި ނޫސްވެރިންގެ ބައްދަލުވުމުގައި މައުލޫމާތު ދެއްވަމުން ވިލާ ކޮލެޖުގެ ރެކްޓާ ޑރ. އަހްމަދު އަންވަރު ވިދާޅުވީ ރާއްޖޭގެ ތަރައްގީއަށް މުހިއްމު ދާއިރާތަކުން ކޯސްތައް ތައާރަފުކޮށް ހިންގުމަކީ އެ ކޮލެޖުން އަބަދުވެސް އެންމެ ބޮޑު އިސްކަމެއްދޭ ކަންތައް ކަމަށެވެ.
ވިލާ ކޮލެޖްގެ ސެޕްޓެމްބަރު އިންޓޭކްގައި މާސްޓާސް ފެންވަރުގެ 20 ކޯހަކާއި، ޕޯސްޓް ގްރެޖުއޭޓް ޑިޕްލޮމާ އަދި ޕޯސްޓު ޕޯސްޓް ގްރެޖުއޭޓް ސެޓްފިކެޓް ފެންވަރުގެ 9 ކޯހަކާއި، ޑިގްރީ ފެންވަރުގެ 41 ކޯހަކާއި، ޑިޕްލޮމާ ފެންވަރުގެ 29 ކޯހަކާއި ފައުންޑޭޝަން ފެންވަރުގެ 17 ކޯހަކާއި އަދި ސެޓްފިކެޓް ތިނެއްގެ ފެންވަރުގެ 17 ކޯހަކާއި ސެޓްފިކެޓް ލެވެލް ދޭއްގެ އެއް ކޯސް ފަށަން ވަނީ ހަމަޖެހިފައެވެ.
ސެޕްޓެމްބަރު އިންޓޭކްގައި ކޯސްތައް ހިންގާ ދާއިރާތަކުގެ ތެރޭގައި އިންފޮރމޭޝަން ޓެކްނޮލޮޖީ، ކޮމްޕިއުޓާ ސައިންސް، ޓީޗިންގް، ޝަރީއާ، ލޯ، ޓޫރިޒަމް އެންޑް ހޮސްޕިޓަލިޓީ، ބިޒްނަސް މެނޭޖްމަންޓް، އޭވިއޭޝަން މެނޭޖްމެންޓް، އިންޓަނޭޝަނަލް ބިޒްނަސް، އިކޮނޮމިކްސް، އެކައުންޓިންގ އެންޑް ފައިނޭންސް، ބޭންކިންގ އެންޑް ފައިނޭންސް، މާކެޓިންގ، ހިއުމަން ރިސޯސް އަދި އިންޖިނިއަރިން ފަދަ ދާއިރާތައް ހިމެނެ އެވެ.
ވިލާ ކޮލެޖުން ހިންގާ އިންޖިނިއަރިންގް ޕްރޮގްރާމްތަކަކީ އިނގިރޭސިވިލާތުގެ ޕޯޓްސްމައުތު ޔުނިވާސީޓީން ވެލިޑޭޓް ކޮށްފައިވާ ޕްރޮގްރާމްތަކެކެވެ. އެ ވެލިޑޭޝަނުގެ ދަށުން ވިލާ ކޮލެޖުން ފުރަތަމަ ތިން އަހަރު ނިންމާ ދަރިވަރުންނަށް އެ ޔުނިވަރސިޓީގެ ޑިގްރީގެ ފަހު އަހަރުގައި ކިޔަވަން ބައިވެރިވެވޭނެ އެވެ.
އެ ޕްރޮގްރާމްތަކުގެ ތެރޭގައި ހިމެނޭ ބެޗްލާ އޮފް ކަލިނަރީ މެނޭޖެމަންޓް، ބެޗްލާ އޮފް މާސް ކޮމިއުނިކޭޝަންސް، ބެޗްލާ އޮފް އިންޓަނޭޝަނަލް ހޮސްޕިޓަލިޓީ މެނޭޖްމަންޓް، މާސްޓާ އޮފް އިންޓަނޭޝަނަލް ހޮސްޕިޓަލިޓީ މެނޭޖްމަންޓް، މާސްޓަރ އޮފް ކޮމިއުނިކޭޝަން އަކީ މެލޭޝިއާ ގެ ޓެއިލާސް ޔުނިވާސިޓީގެ ޕްރޮގްރާމްތަކެކެވެ. މި ކޯސްތަކުގެ ދަރިވަރުންނަށްވެސް ކޯހުގެ ބައެއް ވިލާ ކޮލެޖުގައި ފުރިހަމަ ކުރުމަށްފަހު، ބާކީ ބައި ބޭނުންވެއްޖެ ހިނދެއްގައި މެލޭޝިއާގައި ފުރިހަމަ ކުރުމުގެ ފުރުސަތު ވަނީ ހުޅުވިފައެވެ.
އަންނަ ސެޕްޓެމްބަރަށް އިއުލާނުކުރި ކޯސްތަކުގެ ތެރޭގައި އިނގިރޭސިވިލާތުގެ މަޝްހޫރު ޔުނިވަރސިޓީ އެއް ކަމަށްވާ ޔުނިވާސިޓީ އޮފް ދަ ވެސްޓް އޮފް އިންގްލެންޑްގެ މާސްޓާސް އަދި ފުރަތަމަ ޑިގްރީގެ ކޯސްތައް ހިމެނޭކަން އެ ކޮލެޖުގެ ރެކްޓާ ފާހަގަކުރެއްވި އެވެ.
ވިލާ ކޮލެޖުގެ ސެޕްޓެމްބަރު އިންޓޭކްގެ ކޯސްތައް ތައާރަފުކުރުމަށްޓަކައި ބޭއްވި ނޫސްވެރިންގެ ބައްދަލުވުމުގައި އެ ކޮލެޖުގެ ވައިސް ރެކްޓާ ޑރ. އަލީ ނަޖީބް މައުލޫމާތު ދެއްވަނީ -- ފޮޓޯ: ވިލާ ކޮލެޖް
މި އިންޓޭކުގައި ހުޅުވާލެވޭ ކޯސްތަކުގެ ތެރޭގައި އޮންލައިން އަދި ފޭސް ޓު ފޭސް ކޮށް ކިޔެވޭ ކޯސްތައް ހިމެނެއެވެ.
ވިލާ ކޮލެޖުގެ މާލޭގައި ހުންނަ ކިއުއައި ކެމްޕަހުގެ އިތުރުން ވިލާކޮލެޖް ނައިފަރު ކެމްޕަސް، ވިލާކޮލެޖް ގަން ކެމްޕަސް، ވިލާކޮލެޖް މަހިބަދޫ ކެމްޕަސް، ވިލާކޮލެޖް ހިތަދޫ ކެމްޕަސް އަދި ވިލާކޮލެޖް ކުޅުދުއްފުށީ ކެމްޕަސހުގައި ވެސް ކޯސްތައް ފެށުމަށްވަނީ ހަމަޖެހިފައެވެ.
އެ ކޯސްތަކުގައި ބައިވެރިވާން އެދޭ ފަރާތްތަކުން ކޯހުގައި ބައިވެރިވުމަށް ފޯމު ހުށަހަޅަން ޖެހޭ އެންމެ ފަހުގެ ތާރީހަކީ އޯގަސްޓް މަހުގެ 13ވަނަ ދުވަހެވެ.
ވިލާ ކޮލެޖުގެ ދަރިވަރުންނަށް ފީ ދެއްކުމުގައި ލުއި ފަސޭހަ ގޮތްތަކެއް ހޯދައި ދިނުމުގެ މަގްސަދުގައި ދަރިވަރުންނަށް މަންތްލީ އިންސްޓޯލްމަންޓްއަށް ފީ ދެއްކޭނެ ގޮތް ވަނީ އިންތިޒާމް ކުރެވިފައިވާކަން އެ ކޮލެޖުގެ ވައިސް ރެކްޓާ ޑރ. އަލީ ނަޖީބް ފާހަގަކުރެއްވި އެވެ.
ސަރުކާރުން ހަމަޖައްސާފައިވާ ފުރަތަމަ ޑިގްރީއަށް ހިލޭ ކިޔެވުމުގެ ސްކީމްގެ ދަށުން ވިލާ ކޮލެޖުގެ ހުރިހާ ބެޗެލާސް ޑިގްރީ ޕްރޮގްރާމްތަކަށް ކިޔެވޭނެ އެވެ.
