އިންޓަނޭޝަނަލް މަނިޓަރީ ފަންޑް (އައިއެމްއެފް) އިން ސްރީލަންކާއަށް ފޯރުކޮށްދޭން ނިންމި 2.9 ބިލިއަން ޑޮލަރުގެ އެހީ ކަށަވަރު ކުރުމުގެ ގޮތުން އެތެރޭގެ ދަރަނި ރީސްޓްރަކްޗާ ކުރުމުގެ ޕްލޭނަށް ޕާލަމެންޓުން ރުހުން ދީފި އެވެ.
ޕާލަމެންޓުގެ 225 މެމްބަރުންގެ ތެރެއިން 122 މެމްބަރުން ވަނީ އެ ޕްލޭނަށް ރުހުން ދީފަ އެވެ.
ސްރީލަންކާއަށް ކުރިމަތިވެފައިވާ މާލީ އަދި އިގްތިސާދީ ކާރިސާއިން އަރައިގަތުމަށް އައިއެމްއެފްއިން އެހީދޭން ނިންމީ ޝަރުތުތަކެއްގެ މަތިންނެވެ.
ލަންކާގެ އެތެރޭގެ ދަރަނި 42 ބިލިއަން ޑޮލަރަށް އަރާ އިރު، އެ ދަރަނި ދައްކާނެ ގޮތް އަލުން ކަނޑައަޅައި ސަރުކާރުން ޕްލޭނެއް އާއްމުކުރީ މިދިޔަ ބުރާސްފަތި ދުވަހު އެވެ.
ޕާލަމެންޓަށް އެ ޕްލޭން ހުށަހަޅުއްވަމުން ފިނޭންސް މިނިސްޓަރު ޝޭހަން ސެމާސިންގެ ވިދާޅުވީ ލަންކާގެ ދަރަނި މިހާރު ހުރީ ޖީޑީޕީގެ 128 ޕަސެންޓުގައި ކަމަށާއި އެ އަދަދު 95 ޕަސެންޓަށް ތިރިކުރަން އައިއެމްއެފުން ދީފައިވާ ޓާގެޓަށް ވާސިލްވުމަށް ދަރަނި ރީސްޓްރަކްޗާ ކުރުމުގެ ޕްލޭން މުހިއްމު ކަމަށެވެ.
"އަޅުގަނޑުމެން މިކަން މި ކުރަނީ ބޭންކުތަކާއި، ޑިޕޮސިޓަރުންނާއި، ޕެންޝަނަށް އަސަރު ނުކުރާނެ ގޮތަކަށް."
އިދިކޮޅު ޕާޓީތަކުން ގޮވާލީ އެ ޕްލޭން ތަންފީޒު ކުރުމުގެ ދެފުށްފެންނަަ ގޮތްތަކެއް ގެންގުޅުމަށެވެ.
އެތެރޭގެ ދަރަނި ރީސްޓްރަކްޗާ ކުރުމުގެ ޕްލޭނަކީ ބޮންޑްހޯލްޑަރުންނާއި ކްރެޑިޓަރުންގެ ގޮތުގައި ހިމެނޭ ޗައިނާ، ޖަޕާން އަދި އިންޑިއާއާ އެކު ކުރާ މަޝްވަރާ އަވަސްކުރަން އެޅޭ ފިޔަވަޅެކެވެ.
ލަންކާގެ އަމާޒަކީ އެ ގައުމުތަކާ އެކު ދަރަނި ރީސްޓްރަކްޗާ ކުރުމުގެ މަޝްވަރާ އަންނަ ސެޕްޓެމްބަރު މަހު ނިންމާލުމެވެ.
