ލަންޑަން (ޖޫން 30) - ޗެލްސީ އަށް ކުޅެމުން އަންނަ ޖަރުމަނުގެ ފޯވާޑް، ކައި ހަވާޓްޒް އާސެނަލަށް ސޮއިކުރިއިރު، ޗެލްސީގެ އިނގިރޭސި މިޑްފީޑަރު، މޭސަން މައުންޓް މެންޗެސްޓާ ޔުނައިޓަށް ބަދަލުވާން އެއްބަސްވުމަކަށް އަތުވެއްޖެ އެވެ.
ޖަރުމަނުގެ ބަޔާ ލެވަކޫސަން ދޫކޮށް 2020 ވަނަ އަހަރު ޗެލްސީ އަށް ބަދަލުވި ހަވާޓްޒް ހޯދަން އާސެނަލުން 75 މިލިއަން ޑޮލަރު ދެއްކި އެވެ. ހަވާޓްޒް، އާސެނަލާ އެކު ސޮއިކޮށްފައިވަނީ ފަސް އަހަރުގެ ކޮންޓްރެކްޓެއްގަ އެވެ.
ހަވާޓްޒް ވަނީ ޗެލްސީ އަށް ކުޅެދިން ތިން ސީޒަނުގައި 139 މެޗުން 32 ގޯލު ޖަހައިފަ އެވެ. އޭގެ ތެރޭގައި، 2021 ވަނަ އަހަރުގެ ޗެމްޕިއަންސް ލީގުގެ ފައިނަލްގައި މެންޗެސްޓާ ސިޓީ ކޮޅަށް ޖެހި ގޯލު ހިމެނެ އެވެ.
އާސެނަލްގެ ކޯޗު މިކޭލް އާޓެޓާ ބުނީ އެ ޓީމުން ކުޅޭ ސްޓައިލަށް ބަލާއިރު، ހަވާޓްޒްގެ ބޭނުން ވަރަށް ބޮޑަށް ހިފޭނެ ކަމަށާއި އޭނާ އަކީ ވަރަށް ހުނަރުވެރި މޮޅު ކުޅުންތެރިއެއް ކަމަށެވެ.
އާސެނަލުން އަންނަނީ ކްލަބް ރެކޯޑް އަގެއްގައި ވެސްޓް ހޭމް އަށް ކުޅެމުން އަންނަ އިނގިރޭސި މިޑްފީލްޑަރު ޑެކްލަން ރައިސް ގަންނަން ތައްޔާރުވަމުންނެވެ. އެ ގޮތުން، އާސެނަލުން އެންމެ ފަހުން ހުށަހެޅި، ޖުމްލަ އެކު 135 މިލިއަން ޑޮލަރުގެ ހުށަހެޅުމެއް ވެސްޓް ހޭމް އިން ރުހުންދީފައިވާ ކަމަށް ރިޕޯޓްތައް ބުނެ އެެވެ.
ޔުނައިޓެޑުން މައުންޓް، 24، ގަންނަން ފުރަތަމަ ކުރި ތިން ބިޑް ވެސް ޗެލްސީން ވަނީ އަނބުރާ ފޮނުވާލައިފަ އެވެ. އެކަމަކު، އެންމެ ފަހުން ޔުނައިޓެޑުން ހުށަހެޅި 69 މިލިއަން ޑޮލަރުގެ ބިޑް ޗެލްސީން ވަނީ ގަބޫލުކޮށްފަ އެވެ. އެ ގޮތުން، ޔުނައިޓެޑުން ވަނީ ފަސް އަހަރުގެ ކޮންޓްރެކްޓެއް މައުންޓަށް ދޭން ނިންމައިފަ އެވެ. އަދި އެ ކޮންޓްރެކްޓްގެ މުއްދަތުގައި މައުންޓް ދައްކާ ކުޅުމަށް ބެލުމަށް ފަހު އިތުރު އެއް އަހަރު އާ ކުރެވޭ ގޮތަށް ވެސް އެއްބަސްވުމުގައި ހިމަނާނެ އެވެ.
ޗެލްސީގެ އެކެޑަމީން އައި މައުންޓް ވަނީ ސީނިއާ ޓީމަށް ޕްރިމިއާ ލީގުގައި ކުޅެދިން 129 މެޗުން 27 ގޯލު ޖަހައި، 22 ގޯލު ޖަހަން ފުރުސަތު ތަނަވަސްކޮށްދީފަ އެެވެ.
މިދިޔަ ސީޒަނުގައި ޗެލްސީން ބޮޑު ހަރަދުތަކެއް ކުރި ނަމަވެސް ލީގުގެ 12 ވަނައިގައި ނިންމާލަން ޖެހުމުން އެ ކްލަބަށް ވަނީ ކުޅުންތެރިންތަކެއް ވިއްކާލަން ޖެހިފަ އެވެ. އެ ގޮތުން ޗެލްސީގެ ތިން ކުޅުންތެރިއަކު ވަނީ ސައުދީ ޕްރޯ ލީގުގެ ކްލަބްތަކަށް ވެސް ސޮއިކޮށްފަ އެވެ.
