އިންޑިއާގެ މުސްލިމުންގެ ހައްގުގައި ވާހަކަ ދެއްކެވުމުން އެ ގައުމުގެ ވެރިކަން ކުރާ ބަރަތިޔަ ޖަނަތަ ޕާޓީ (ބީޖޭޕީ)ގެ ލީޑަރުން އެމެރިކާގެ ކުރީގެ ރައީސް ބަރަކް އޮބާމާއަށް ފާޑުކިޔަމުން އެބަދެ އެވެ.
މިދިޔަ ހަފުތާގައި ސީއެންއެންއަށް ދެއްވި އިންޓަވިއުއެއްގައި އޮބާމާ ވިދާޅުވީ މައިނޯރިޓީންގެ ހައްގު ހިމާޔަތް ނުކުރެވޭ ނަމަ އިންޑިއާ ވަކިވަކިވެގެން ހިނގައިދާނެ ކަމަށެވެ.
އޮބާމާ އިންޓަވިއު ދެއްވީ ބޮޑު ވަޒީރު ނަރެންދްރަ މޯދީ ރަސްމީ ދަތުރެއްގައި އެމެރިކާއަށް ވަޑައިގެން އުޅުއްވަނިކޮށެވެ. އެ ދަތުރާ މެދު އެމެރިކާގެ ގިނަ ސިޔާސީ ފަރާތްތަކެއް ހިތްހަމަނުޖެހުނެވެ.
"ބޮޑު ވަޒީރު މޯދީ އާއި ރައީސް [ޖޯ ބައިޑެން] ބައްދަލުކުރައްވާ ނަމަ، ހިންދޫ މެޖޯރިޓީ އޮންނަ އިންޑިއާގެ މުސްލިމް މައިނޯރިޓީގެ ވާހަކަ ދެއްކުން މުހިއްމު."
އިންޑިއާގެ ފިނޭންސް މިނިސްޓަރު ނިރްމަލާ ސިތަރަމަން އާދީއްތަ ދުވަހު ނޫސްވެރިންނަށް ވިދާޅުވީ އޮބާމާގެ ވާހަކަތަކާ ގުޅިގެން ސިހުން ލިބިފައިވާ ކަމަށެވެ.
އޮބާމާ ވެރިކަމުގައި ހުންނެވި އިރު ސީރިއާ އާއި ޔަމަން ފަދަ މުސްލިމް މެޖޯރިޓީ އޮންނަ ގައުމުތަކަށް އެމެރިކާއިން ބޮން އެޅި ކަމަށް އޭނާ ތުހުމަތު ކުރެއްވި އެވެ.
ޑިފެންސް މިނިސްޓަރު ރާޖްނަތު ސިންގް ވިދާޅުވީ ދީނަށް ބަލައި އެއްވެސް ބަޔަކާ މެދު އިންޑިއާއިން ދުވަހަކު ވެސް ތަފާތުކުރުމެއް ގެންގުޅެފައި ނުވާނެ ކަމަށެވެ.
ބީީޖޭޕީ ފާޑުކިޔުންތަކާ ގުޅިގެން އޮބާމާ އެއްޗެއް ވިދާޅުވެފައެއް ނުވެ އެވެ. އަދި އެމެރިކާއިން ވެސް ވަކި އެއްޗެއް ނުބުނެ އެވެ.
