ރަޝިއާގެ ކުލީ ސިފައިންގެ ގްރޫޕުން ހިންގަން އުޅުނު ބަގާވާތުގައި ހުޅަނގުގެ ޖާސޫސީ އިދާރާތަކުގެ އަތެއްވޭތޯ ބަލަމުންދާ ކަމަށް ރަޝިއާގެ ފޮރިން މިނިސްޓަރު ސާގެއި ލެވްރޯވް ވިދާޅުވެއްޖެ އެވެ.
ދައުލަތުގެ ޓީވީއަށް ދެއްވި އިންޓަވިއުއެއްގައި ލެވްރޯވް ވިދާޅުވީ އެކަމުގައި އެމެރިކާގެ ބައިވެރިވުމެއް ނެތްކަން އެންގުމުގެ ސިގްނަލްތައް އެމެރިކާގެ ސަފީރު ލިން ޓްރޭސީ ދެއްވި ކަމަށެވެ.
"ހިނގައިދިޔަ ހުރިހާ ކަމަކީ ރަޝިއާގެ އެތެރޭގެ ކަމެއްގެ ގޮތުގައި އެމެރިކާއިން ފުރިހަމައަށް ދެކޭ ކަމަށް އެންގުމުގެ ސިގްނަލްތައް ދެއްވި،" ލެވްރޯވް ވިދާޅުވި އެވެ.
ވާގްނާ ގްރޫޕުން ކުރި މަސައްކަތް ކާމިޔާބުވާނެ ކަމަށް އެމެރިކާގެ ޖާސޫސީ އިދާރާތަކުން އުއްމީދު ކުރި ކަމަށް ވެސް ލެވްރޯވް ތުހުމަތު ކުރެއްވި އެވެ.
"އޭރަކު އެ ގައުމެއްގައި އޮތް ސަރުކާރަކާ މެދު ހުޅަނގުން ހިތްހަމަޖެހޭ ނަމަ، ކުރާ ހުރިހާ މުޒާހަރާއެއް ވެސް ވާނީ ގާނޫނާ ހިލާފު ކަންކަމަށް. އެއާ ހިލާފަށް ހުޅަނގަށް ބޯނުލަނބައި ގައުމުގެ މަސްލަހަތު ކުރިއަށް ނެރޭ ސަރުކާރެއް އޮތް ނަމަ، ސަރުކާރާ ދެކޮޅަށް ތެދުވަން އެކި ފަރާތްތަކަށް ހިތްވަރު ދޭނެ."
ވާގްނާ ގްރޫޕުން ރަޝިއާގެ އަސްކަރީ ލީޑާޝިޕް ވައްޓާލާނެ ކަމަށް ބުނެ މޮސްކޯއަށް ދާން މަސައްކަތް ކުރި ނަމަވެސް، އެންމެ ފަހު ވަގުތު ވަނީ މިސްރާބު އަނބުރާލައި ބެލަރޫސްއަށް އެތެރެވެފަ އެވެ.
