ދުނިޔޭގައި މަސްތުވާތަކެތި އިންކެޖްޓް ކުރުން ވަރަށް ބޮޑަށް އިތުރުވެފައިވާ ކަމަށް އދ. އިން ކުރި ދިރާސާއަކަށް ފަހު ނެރުނު ރިޕޯޓުގައި ބުނެފި އެވެ.
ވިއެނާގައި ހުންނަ އދ. ގެ އޮފީސް އޮން ޑްރަގްސް އެންޑް ކްރައިމް (ޔޫއެންއޯޑީސީ) އިން ބުނީ 2021 ވަނަ އަހަރު 13.2 މިލިއަން މީހުން މަސްތުވާތަކެތި އިންޖެކްޓް ކުރި ކަމަށެވެ. އެއީ ކުރިން ލަފާކުރި ވަރަށް ވުރެ 18 ޕަސެންޓު އިތުރެވެ.
ދުނިޔޭގެ ވަގު މަސްތުވާތަކެތީގެ މާކެޓް މިހާރު ޑޮމިނޭޓް ކުރަނީ ފެންޓަނިލް އާއި މެތަމްފެޓަމައިން ފަދަ ނުރައްކާތެރި ސިންތެޓިކް ބާވަތްތައް ކަމަށް އެ ރިޕޯޓުގައި ބުންޏެވެ.
މުޅި ދުނިޔޭގައި މަސްތުވާތަކެތި ބޭނުންކުރާ މީހުންގެ ނިސްބަތް 23 ޕަސެންޓުން އިތުރުވެ، މަސްތުވާތަކެއްޗާ ގުޅުން ހުރި ޑިސްއޯޑާތައް މީގެ 10 އަހަރު ކުރިއާ އަޅާ ބަލާއިރު 45 ޕަސެންޓު އިތުރުވެފައިވެ އެވެ.
މަސްތުވާތަކެތީގެ ނުރައްކަލަށް އެންމެ ބޮޑަށް ހުށަހެޅެނީ ނަފުސާނީ މައްސަލަތައް ހުރި މީހުންނާއި އިޖުތިމާއީ އަދި އިގުތިސާދީ ގޮތުން ދަށް ފަންތީގެ މީހުންނާއި ޒުވާނުން ކަމަށް ރިޕޯޓުގައިވެ އެވެ.
މަަސްތުވާތަކެތި އިންޖެކްޓް ކުރުން ބޮޑަށް ފެތުރިފައި އޮތީ އިރުމަތީ ޔޫރަޕާއި އުތުރު އެމެރިކާގަ އެވެ. އެ ތަންތަނަށް ވުރެ އިރުމައްޗާއި ދެކުނު އިރުމަތީ އޭޝިއާގައި އެ މައްސަލަ ކުޑަ އެވެ.
ފެންޓަނިލްގެ ސަބަބުން އުތުރު އެމެރިކާގެ މަސްތުވާތަކެތީގެ މާކެޓް މުޅިން ބަދަލުވެ، ހީވެސްނުކުރާވަރުގެ ހިތާމަވެތި ނަތީޖާތައް ފެންނަމުންދާ ކަމަށް ރިޕޯޓުގައި ބުންޏެވެ.
އަށާރަ ގައުމެއްގެ ޑޭޓާގެ މައްޗަށް ދިރާސާ ކުރުމަށް ފަަހު ރިޕޯޓުގައި ބުނީ މަސްތުވާތަކެތި އިންޖެކްޓް ކުރުމުގެ އާދަ ފަސްގުނަ އިތުރު ކަމަށް ފެންނަނީ ފިރިހެނުންގެ މެދުގައި ކަމަށެވެ. އަންހެން ލޯބިވެރިންނާއި ދިރިއުޅުމުގެ ބައިވެރިން އެކަމުގެ ތެރެއަށް ވަނުމަށް ހިތްވަރުދެނީ ފިރިހެނުންނެވެ.
އެކަމަށް ފަރުވާ ހޯދުމުގެ ފުރުސަތު ލިބެނީ ކޮންމެ ފަސް މީހަކުން އެކަކަށް ކަމަށާއި އަންހެނުންނަށް ދިމާވާ ގޮންޖެހުންތައް ފިރިހެނުންނަށް ވުރެ ގިނަ ކަމަށް އދ. އިން ފާހަގަކުރި އެވެ.
