ޕެރިސް (ޖޫން 26) - ޕީއެސްޖީގައި ފެށުން ދިޔައީ ވަރަށް ގޯސްކޮށް ކަމަށާއި އެ ކްލަބާ އެކު ޔުއެފާ ޗެމްޕިއަންސް ލީގުގައި ކުރިމަތިވި ނާކާމިޔާބާ މެދު ވަރަށް ދެރަވާ ކަމަށް އާޖެންޓީނާގެ ތަރި ލިއޮނެލް މެސީ ބުނެފި އެވެ.
ޕީއެސްޖީގައި ދެ ސީޒަން ހޭދަކުރުމަށް ފަހު، މެސީ، 36، ވަނީ ކުރިއަށް އޮތް ސީޒަނަށް އެމެރިކާގެ އިންޓަ މިއާމީ އަށް ބަދަލުވެފަ އެވެ.
ބާސެލޯނާ ދޫކޮށް 2021 ވަނަ އަހަރު ޕީއެސްޖީ އަށް ބަދަލުވި މެސީ ބުނީ އެ ކްލަބާ ގުޅުނު ދުވަސްކޮޅު، އޭނާ އަށް ވަރަށް ގިނަ އުނދަގޫތައް ކުރިމަތިވި ކަމަށެވެ.
"އަހަރެން ޕީއެސްޖީއާ ގުޅުނީ އެ ކްލަބު ކަމުދާތީ. އެ ޓީމުގައި ރަހުމަތްތެރިންތަކެއް ތިބީ، އަހަރެން ހީކުރީ ޓީމަށް ހޭނެން ފަސޭހަވާނެ ކަމަށް،" މެސީ ބުންޏެވެ.
"އަހަރެން އެ ޓީމާ ގުޅުނީ ޕްރީ ސީޒަނަށް ފަހު. އަހަރެން ހީކުރި ވަރަށް ވުރެ ޓީމަށް ހޭނެން އުނދަގޫވި. ޕީއެސްޖީގައި އަހަރެން ފެށުން ދިިޔައީ އަހަންނާއި އަހަރެންގެ އާއިލާ އަށް ވަރަށް އުނދަގޫގޮތަކަށް."
ޕީއެސްޖީގައި ހޭދަކުރި ފުރަތަމަ ސީޒަންގައި މެސީ ވަނީ 34 މެޗުން 11 ލަނޑު ޖަހައިފަ އެވެ. މެސީ ބުނީ ޕީއެސްޖީއާ އެކު ޗެމްޕއިަންސް ލީގުން ދެ ފަހަރު ވެސް ކެޓުމަކީ އޭނާ ވަރަށް ދެރަވާ ކަމެއް ކަމަށެވެ.
މީގެ އިތުރުން 2022 ވަނަ އަހަރުގެ ވޯލްޑް ކަޕަށް ފަހު، ޓީމަށް ގިނަ އުނދަގޫތަކެއް ކުރިމަތިވި ކަމަށެވެ.
"ބައެއް ކުޅުންތެރިން އަލުން ކްލަބާ ގުޅުނީ ލަހުން. އަދި ބައެއް ކުޅުންތެރިން ތިބީ އަނިޔާވެފައި،" މެސީ ބުންޏެވެ.
ޕީއެސްޖީން މެސީ އަށް އާ ކޮންޓްރެކްޓެއް ވެސް ދިނެވެ. އެކަމަކު، މެސީ ނިންމީ އިތުރަށް އެ ކްލަބްގައި މަޑުނުކޮށް ކެރިއަރުގައި އާ ޗެޕްޓަރެއް ފެށުމަށެވެ.
