ސާފް ބަންގުބަންދު ޗެމްޕިއަންޝިޕް 2023 ގައި މިއަދު ހަވީރު ކުޅުނު މެޗުން ބަންގްލަދޭޝް އިން ފަހަތުން އަރައި 3-1 އިން ރާއްޖެ ބަލިކޮށްފި އެވެ.
މިއީ 2003 ވަނަ އަހަރު ފައިނަލުގައި، ބަންގްލަދޭޝް އަތުން ބަލިވި ފަހުން، ސާފް ޗެމްޕިއަންޝިޕްގައި އެ ޓީމު އަތުން ރާއްޖެ ބަލިވި ފުރަތަމަ ފަހަރެެވެ. މި ވޭތުވެދިޔަ 20 އަހަރު ތެރޭ ސީނިއާ ފުޓްބޯޅައިގައި ރާއްޖެ އަތުން ބަންގްލަދޭޝް މޮޅުވި ދެ ފަހަރު ވެސް އެކަން ހާސިލްކުރީ ރާއްޖޭގެ ކޯޗަކަށް އިޓަލީގެ ފްރެންޗެސްކޯ މޮރިއޭރޯ ހުއްޓަ އެވެ. މީގެ ކުރިން، ބަންގްލަދޭޝް އިން ވަނީ 2021 ވަަނަ އަހަރުގެ ނޮވެމްބަރު މަހު، ސްރީ ލަންކާގައި ބޭއްވި ފޯ ނޭޝަންސް ކަޕްގައި ވެސް 2-1 އިން ރާއްޖެ ބަލިކޮށްފަ އެވެ.
މޮރިއޭރޯ ވަނީ މިދިޔަ އަހަރު މާލޭގައި ކުޅުނު އެކުވެރިކަމުގެ މެޗެއްގައި ބަންގްލަދޭޝް އަތުން މޮޅުވެފަ އެވެ. އެކަމަކު، އޭރު ބަންގްލަދޭޝްގެ ކޯޗަކަށް ހުރި ސްޕެއިނުގެ ހަވިއޭ ކަބްްރޭރާ މި ވަނީ މިއަދު ރާއްޖެ ބަލިކޮށްފަ އެވެ.
މި މޮޅާ އެކު ބަންގްލަދޭޝް އިން މި ވަނީ ސެމީ ފައިނަލުގެ އުންމީދު ބޮޑުކޮށްފަ އެވެ. އެ ޓީމަށް ތިން ޕޮއިންޓް ލިބުނުއިރު، ރާއްޖެ އާއި ލެބަނަން އަށް ވެސް ވަނީ ތިން ޕޮއިންޓް ލިބިފަ އެވެ. ރާއްޖެ އަށް އަމިއްލަ ބާރުގައި ދެން ސެމީ ފައިނަލުގެ ކިރިޔާ ވެސް ފުރުސަތެއް އޮތީ ގްރޫޕްގެ ފަހު މެޗުގައި ލެބަނަން ބަލިކޮށްގެންނެވެ. ލެބަނަން ދެ ވަނަ މެޗުގައި މިރޭ ބޫޓާނާ ކުޅޭނެ އެވެ.
ބެންގަލޫރުގެ ސްރީ ކަންޓީރަވާ ސްޓޭޑިއަމްގައި މިއަދު ކުޅުނު މެޗަށް ރާއްޖެ އާއި ބަންގްލަދޭޝް އިން ނެރުނު ފުރަތަމަ އެގާރަ އަށް ވެސް ވަނީ ބަދަލު ގެނެސްފަ އެވެ. އެ ގޮތުން ރާއްޖޭން ގެނައި ބަދަލަކީ އިބްރާހިމް ވަހީދު ހަސަން (އިއްބެ) އާއި އިބްރާހިމް މަހުދީ (ފޭދޫ އިއްބެ)ގެ ބަދަލުގައި އަލީ ފާސިރު (ސެންޓޭ) އާއި ނާއިޒު ހަސަން (ދާދު) ހިމެނުމެވެ.
ބޫޓާން މެޗެކޭ އެއްގޮތަށް މި މެޗުގައި ވެސް ރާއްޖެ އަށް ލީޑުނަގައިދިނީ ހަމްޒާ މުހައްމަދު (ހަމްޕު) އެވެ. މެޗުގެ 17 ވަަނަ މިނިޓްގައި އޭރިއާބޭރުން ސެންޓޭ ދިން ބޯޅަ ކޮންޓްރޯލްކުރުމަށް ފަހު، ހަމްޕު ވަނީ ގޯލުގެ ދުރު ކަނަށް ބޯޅަ އަމާޒުކޮށްލައިފަ އެވެ. ހަމްޕު ޖެހި ބޯޅަ ކަނަށް ވަންއިރު، އެ ބޯޅަ ހުއްޓުވަން ބަންގްލަދޭޝް ކީޕަރު އަނީސުރް ރަހްމާން ޒީކޯ އަށް މާ ބޮޑު ކަމެއް ނުކުރެވުނެވެ.
ރާއްޖޭގެ ގޯލަށް ފަހު، ބަންގްލަދޭޝް އިން ކުރިއަށް ޖެހިގެން ކުޅެން ފެށި އެެވެ. އަދި ގޯލު ޖަހާނެ ފުރުސަތުތައް ހޯދަން ފެށި އެވެ. އެ ގޮތުން ބަންގްލަދޭޝްގެ އެޓޭކްތަކުގައި އެ ޓީމުގެ ފަހަތަށް ކުޅޭ ޑިފެންޑަރު، ޓޯޕޫ ބަރްމަން ބައިވެރިވެ، ރާއްޖެ އަށް ނުރައްކާކުރި އެވެ. މެޗުގެ 34 ވަނަ މިނިޓްގައި ބަންގްލްދޭޝްގެ ސޮހޭލް ރާނާ ނެގި ކޯނަރެއްގައި ޓޯޕޫ ބޮލުން ޖެހި ބޯޅަ ރާއްޖޭގެ ގޯލު ރޮނގުމަތިން ސަލާމަތްކުރީ ހުސެއިން ނިހާން (ނިހާޓް) އެވެ. ނިހާޓް ޖެހި ބޯޅަ ރާއްޖޭގެ އަހުމަދު ނޫމާން (ހެލްމެޓް) ގައިގައި ޖެހިފައި ގޯލަށް ވަންނަން އައި ވަގުތު ރާއްޖޭގެ ކީޕަރު ހުސެއިން ޝަރީފް (ހުސެން) ވަނީ މަތަކޮށްފަ އެވެ.
ބަންގްލަދޭޝް އިން ކުރަމުންދިޔަ އެޓޭކްތަކުން އެއް ބޯޅަ ކާމިޔާބުކޮށް، ނަތީޖާ ހަމަހަމަކުރީ މެޗުގެ 42 ވަނަ މިނިޓްގަ އެވެ. މި ލަނޑު ޖެހީ ރަކީބް ހުސެއިން އެވެ. މި ފަހަރު ވެސް ސޮހޭލް ނެގި ހުރަހަކަށް އަރައި، ޓޯޕޫ ބޮލުން ޖައްސާލި ބޯޅައަށް ހުސްކޮށް އަރައި، ކުޑަ އޭރިއާތެރެއިން ރަކީބް ވަނީ ބޮލުން ގޯލަށް ބޯޅަ ވައްދާލައިފަ އެވެ.
ރާއްޖޭން ފުރަތަމަ ހާފުގައި ގޯލު ޖެހި ފަހުން، ބަންގްލަދޭޝްގެ ފަހަތަށް ބާރު ބޮޑުކުރެވޭ ވަރުގެ ފުރުސަތެއް ނުހޯދެ އެވެ. ދެ ވަނަ ހާފު ފެށިއިރު، ރާއްޖޭން ވަނީ ދާދުގެ ބަދަލުގައި ފޭދޫ އިއްބެ ކުޅެން ނެރެފަ އެވެ.
ދެ ވަނަ ހާފް ފަށައިގެން މާގިނައިރެއްނުވެ ބަންގްލަދޭޝްގެ ކެޕްޓަން ޖަމާލް ބުޔާން ނެގި ކޯނަރަކަށް ހުސްކޮށް އަރައި، އެ ޓީމުގެ ބިޝްވަނާތު ގޯޝް ބޮލުން ޖެހި ބޯޅަ ދިޔައީ ހުރަސްދަނޑިމަތިންނެވެ. މި ހާފުގައި ރާއްޖޭގެ ފުރަތަމަ ހަމަލާ ފޮނުވާލީ ސެންޓޭ އެވެ. އޭރިއާބޭރުން ޖެހި ބޯޅަ ދިޔައީ އަރިމަތިން ބޭރުންނެވެ.
ބަންގްލަދޭޝް އިން ވަނީ މެޗުގެ 66 ވަނަ މިނިޓްގައި ލީޑުނަގައިފަ އެވެ. މިއީ ކޯނަރެއްގައި ރާއްޖޭގެ ކީޕަރު ހުސެން އަތްމަތިން ދިޔަ ބޯޅައެއްގައި ބަންގްލަދޭޝް އިން ކުރި އެޓޭކަކުން ރާއްޖޭގެ ކުޅުންތެރިންނަށް ސަލާމަތް ނުކުރެވިގެން ދިޔަ ބޯޅައެއް، ބަންގްލަދޭޝްގެ ޑިފެންޑަރު ތާރިގް ކާޒީ ބޮލުން ގޯލަށް ފޮނުވާލައިގެން ޖެހި ގޯލެކެވެ. އޭގެ ހަތަރު މިނިޓް ފަހުން، އޭރިއާ ރޮނގުމަތިން ބަންގްލަދޭޝްގެ ޝެއިހް މޮރްސަލިން ޖެހި ބޯޅަ ކީޕަރު ހުސެން ވަނީ މަތަކޮށްފަ އެވެ.
އިތުރު ވަގުތުގައި ކައުންޓަ އެޓޭކެއްގައި ތަނަވަސްކުރި ފުރުސަތަކުން މޮރްސަލިން ވަނީ ބަންގްލަދޭޝްގެ ތިން ވަނަ ގޯލު ޖަހައިފަ އެވެ.
ރާއްޖެ އަށް ގޯލެއް ޖަހައިދޭން އިތުރު ވަގުތުގައި ހަމްޕު ޖެހި ޝޮޓެއް ވަނީ ގޯލުގެ ދަނޑިއަށް އަމާޒުވެފަ އެވެ.
