ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުالله ޖާބިރު މިއަދު ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީއަށް ސޮއި ކުރައްވައިފި އެވެ.
ސޮއި ކުރެއްވުމަށްފަހު ނޫސްވެރިންނާ ބައްދަލުކުރައްވާ ޖާބިރު ވިދާޅުވީ ކުރިން ވެސް އޭނާ ހުންނެވީ އެމްޑީޕީގައި ކަމަށާއި އޭރު އޭނާ އެމްޑީޕީގައި ބަހައްޓަން ބޭނުންވާ މީހުން މިހާރު ޕާޓީގައި ނެތުމުން އަދި ރައީސް އިބްރާހިމް މުހައްމަދު ސޯލިހު އިތުރު ދައުރަކަށް ހޮވުމަށް ބޭނުންވެވަޑައިގަންނަވާތީ އަލުން ސޮއިކުރެއްވީ ކަމަށެވެ.
"އަޅުގަނޑަށް 100 ޕަސަންޓް ޔަގީން [ރައީސް ސޯލިހަށް ރިޔާސީ އިންތިހާބު] ކާމިޔާބު ވާނެ ކަމަށް. އަޅުގަނޑުގެ ފުލް ކެޕޭސިިޓީގައި މަސައްކަތް ކުރާނަން, ފައިނޭޝަލީ ވެސް, އަދަވައިސް [އެހެނިހެން ގޮތްގޮތުން] ވެސް،" ޖާބިރު ވިދާޅުވި އެވެ.
މި ދަނޑިވަޅުގައި މަޖިލިސް ހުއްޓިފައި އޮތުމާ ބެހޭ ގޮތުން ސުވާލުކުރުުމުން ޖާބިރު ވިދާޅުވީ ރިޔާސީ އިންތިހާބު މިހާ ގާތްވެފައި އޮއްވާ މަޖިލިސް ހުއްޓިފައި އޮވެގެން ނުވާނެ ކަމަށާއި އެމްޑީޕީން އެ ކަމުގައި ހައްލެއް ހޯދައި, ކަންކަން ހަމައަކަށް އަޅުވާނެ ކަމަށެވެ.
ޖާބިރު އެމްޑީޕީއާ ގުޅިވަޑައިގަތުން ރައީސް ސޯލިހު ފާހަގަކުރެއްވީ, އެމްޑީޕީއަށާއި, އެމަނިކުފާނަށް ލިބިވަޑައިގެންނެވި ވަރަށް ބޮޑު އެހީތެރިކަމެއް އަދި ކުރިއެރުމެއް ގޮތުގަ އެވެ. އަދި ކުރިއަށް އޮތް ރިޔާސީ އިންތިހާބު ކާމިޔާބު ކުރުމުގައި ޖާބިރުގެ ހިއްސާ ލިބިގެންދާނެ ކަމަށް ރައީސް ވިދާޅުވި އެވެ.
ކުރިން 2018 ވަނަ އަހަރު އެމަނިކުފާނު ވެރިކަމަށް ވަޑައިގެންނެވިއިރު ވެސް ޖާބިރުގެ އެހީތެރިކަން ލިބިވަޑައިގެންނެވި ކަމަށާއި އޭރުވެސް ވަރަށް ބުރަކޮށް މަސައްކަތް ކުރެއްވިކަން ފާހަގަކުރައްވާ ރައީސް ވިދާޅުވީ އެ ފޯރި އާއި ޖޯށުގައި ޖާބިރު ނިކުމެވަޑައިގެންނެވުމުން މި ރިޔާސީ އިންތިހާބުގައި ވެސް ވަރަށް ބޮޑު ކާމިޔާބެއް ލިބިގެންދާނެ ކަމަށެވެ.
"ޒުވާނުން ދެކޭ ގޮތުގައި, އެ ކުދިންގެ ތެރޭގައި ޖާބިރަކީ އެމީހުންގެ ލީޑަރުގެ ގޮތުގައި ބަލައިގެންފައި ހުރީ. އެހެންމަ މިއީ ވަރަށް ރަނގަޅު ވަގުތެއް ޖާބިރު ގުޅިވަޑައިގަންނަވަން،" ޖާބިރަށް މަރުހަބާ ދަންނަވަމުން ރައީސް ވިދާޅުވި އެވެ.
އިތުރަށް ވާހަކަ ދައްކަވަމުން ރައީސް ވިދާޅުވީ, ރައްޔިތުންގެ މަޖިލީހުގެ އިތުރު މެމްބަރުންނާއި ސިޔާސީ ދާއިރާގެ އިސްސަފުގައި މަސައްކަތް ކުރައްވާ ބޭފުޅުން ވެސް ކުރިއަށް އޮތްތަނުގައި އެމްޑީޕީއާ ގުޅިވަޑައިގަންނަވާނެ ކަމަށެވެ.
ޖާބިރު މިއަދު އެމްޑީޕީއަށް ސޮއިކުރުމުގެ ރަސްމިއްޔާތަށް ސޯލްޓް ކެފޭއަށް ފައިމަގުގައި ވަޑައިގެންނެވިއިރު, އެކުގައި ނޫސްވެރިންނާއި ބޮޑުބެރު ގްރޫޕަކުން ވެސް ދިޔަ އެވެ.
ޖާބިރު އެމްޑީޕީއަށް ސޮއިކޮށްފައިވާއިރު, އޭނާ ވަނީ ދާދި ފަހުން މަޖިލީހުގެ ރައީސްގެ އިތުބާރު ނެތްކަމުގެ މައްސަލަ މަޖިލީހަށް ވެއްދުމަށް ވެސް ސޮއިކުރައްވާފަ އެވެ.
އެމްޑީޕީ މެމްބަރުންގެ އިސްނެންގެވުމުގެ މަތިން ކުރިއަށް ދިޔަ އެ މަސައްކަތުގައި އެމްޑީޕީ މެމްބަރުންގެ އިތުރު ސޮއިކުރެއްވީ ޖާބިރާއި ތުލުސްދޫ ދާއިރާގެ މެމްބަރު އިބްރާހިމް ނަސީމާއި ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަދި ދ. މީދޫ ދާއިރާގެ މެމްބަރު އަހްމަދު ސިޔާމް މުހައްމަދެވެ.
