ލަންޑަން (ޖޫން 25) - ޗެލްސީގެ އިނގިރޭސި މިޑްފިލްޑަރު މޭސަން މައުންޓް ހޯދުމަށް މެންޗެސްޓާ ޔުނައިޓެޑުން ކުރި ތިން ވަނަ ބިޑަށް ވެސް ޗެލްސީ އިން ނޫނެކޭ ބުނެފައިވާ ކަމަށް އިނގިރޭސި މީޑިއާ ރިޕޯޓްތައް ބުނެފި އެވެ.
މައުންޓް، 24، ޗެލްސީގެ ޔޫތު ޓީމުން ވިދާލުމަށްފަހު މިދިޔަ ތިން ސީޒަނުގައި ވެސް އެ ކުލަބުގެ މުހިންމު ކުޅުންތެރިއެކެވެ. މި ސީޒަންގައި އެކުލަބަށް އިރުޝާދުދިން ދެ ކޯޗުން ކަމަށްވާ ތޯމަސް ޓުޗެލް އާއި ގްރަހަމް ޕޮޓާގެ ގޭމް ޕްލޭންގައި ނުހިމެނި މި ސީޒަންގައި އޭނާ އަށް މާ އެދެވޭ ކުޅުމެއް ނުދެއްކުނެވެ. އެހެންވެ މިހާރު މައުންޓް ބޭނުންވަނީ ޗެލްސީ ދޫކޮށް، ގަވާއިދުން ކުޅުމުގެ ފުރުސަތު ގިނައިން ލިބޭ ޓީމަކަށް ދާށެވެ.
މައުންޓް ހޯދުމަށް އެންމެ ބޮޑަށް މަސައްކަތް ކުރަމުން އަންނަނީ ޔުނައިޓެޑުންނެވެ. އެ ގޮތުން، ޔުނައިޓެޑުން ވަނީ މައުންޓް ހޯދުމަށް ތިން ބިޑެއް ކޮށްފަ އެވެ. ތިން ފަހަރު މަތިން ކުރި މަސައްކަތް ވެސް ޔުނައިޓެޑަށް ކާމިޔާބުވާ ގޮތެއް ނުވި އެވެ.
މައުންޓް ގެންދިއުމަށް ޔުނައިޓެޑުން ފުރަތަމަ ހުށަހެޅީ 40 މިލިއަން ޕައުންޑުގެ ބިޑެކެވެ. ދެ ވަނަ ބިޑު 50 މިލިއަން ޕައުންޑަށް އަރާއިރު، ތިން ވަަނަ ބިޑު 55 މިލިއަން ޕައުންޑް ކަމަށް ބެލެވެ އެވެ. ފަހު ބިޑަށް ވެސް ޗެލްސީން ނޫނެކާ ބުނެފައިވަނީ މި ފަހަރު ވެސް އަގު ކުޑަވެގެން ކަމަށް ބެލެވެ އެވެ.
ޗެލްސީއާ އެކު މައުންޓް ހަދާފައިވާ އެއްބަސްވުން ހަމަވާނީ އަންނަ އަހަރު އެވެ. އެހެންކަމުން، އޭނާ ހިލޭ ޓްރާންސްފާއެއްގައި އެހެން ޓީމަކަށް ދޫކޮށްލުމުގެ ބަދަލުގައި ޗެލްސީ އިން ބޭނުންވަނީ އާ ސީޒަން ފެށުމުގެ ކުރިން ބޮޑު އަގުގައި އޭނާ ވިއްކާލާށެވެ. ޗެލްސީން މައުންޓް ވިއްކާލަން ބޭނުންވާ އަގު 60 މިލިއަން ޕައުންޑަށް ވުރެ ބޮޑެވެ.
މައުންޓް، ހޯދުމަށް ޕްރިމިއާ ލީގުގެ އިތުރު ބައެއް ކުލަބުތަކުން ޝައުގުވެރިކަން ފާޅުކޮށްފައިވާއިރު، އަމަލީ ގޮތުން އޭނާ ހޯދުމަށް މަސައްކަތް ކުރަމުން އަންނަ ހަމައެކަނި ކުލަބަކީ ޔުނައިޓެޑެވެ.
ފަހަކަށް އައިސް، ޗެލްސީގެ ސީނިއާ ޓީމްގައި މުހިންމު ދައުރެއް އަދާކުރަމުން އަންނަ މައުންޓް ވަނީ މިހާތަނަށް ޗެލްސީ އަށް 195 މެޗު ކުޅެދިންއިރު، އެ މެޗުތަކުގައި 33 ލަނޑު ޖަހައިފައިވެ އެވެ. މީގެ އިތުރުން އެ ކުލަބާ އެކު ޔުއެފާ ޗެމްޕިއަންސް ލީގު، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް ކާމިޔާބުކުރި އެވެ.
