ބޮސްޓަން، އެމެރިކާ (ޖޫން 22) - ކަނޑުގެ އަޑީގައި ޓައިޓޭނިކް އޮތް ހިސާބު ކައިރިން ގެއްލުނު ސަބްމެރީންގެ ބައިތަކެއް ފެނިއްޖެ އެވެ.
އެމެރިކާގެ ކޯސްޓު ގާޑުން ބުނީ ކަނޑު އަޑީގެ އުޅަނދަކަށް ފެނުނީ ޓައިޓޭނިކް ކައިރީގައި އޮތް "ޑެބްރީ ފީލްޑެއް" ކަމަށެވެ. ގެއްލުނު ސަބްމެރީންގައި ފަސް މީހުން ތިއްބެވެ.
ކޯސްޓު ގާޑުން ބުނީ ކެނެޑާއިން ރިމޯޓުކޮށް އޮޕަރޭޓް ކުރި ކަނޑު އަޑީގެ އުޅަނދަށް ފެނުނު ބައިތަކާ ގުޅޭ މައުލޫމާތު ދިރާސާ ކުރުމުގެ މަސައްކަތް ތަޖުރިބާކާރުން ކުރަމުންދާ ކަމަށެވެ.
ފްރާންސްގެ ދިރާސާ ކުރާ ބޯޓަކުން ވެސް ވަނީ ގެއްލުނު 22 ފޫޓުގެ ސަބްމެރީންގެ ހިލަމެއްވޭތޯ ކަނޑުގެ އަޑިއަށް ރޮބޮޓެއް ފޮނުވައިފަ އެވެ.
ތަޖުރިބާކާރަކު ބީބީސީ އަށް ބުނީ ފެނުނީ ސަބްމެރީންގެ "ލޭންޑިން ފްރޭމަކާއި ރިއާ ކަވަރެއް" ކަމަށެވެ. ސަބްމެރީންގައި ހުރީ 96 ގަޑިއިރަށް ވާ ވަރުގެ އޮކްސިޖަން އެވެ.
އެމެރިކާގެ އޯޝަންގޭޓް އެކްސްޕެޑިޝަންގެ ސަބްމެރީން އާދީއްތަ ދުވަހު ދަތުރު ފެށި އިރު، ބުރާސްފަތި ދުވަހުގެ ހެނދުނާ ހަމައަށް ދިޔަ އިރު އޮކްސިޖަން ހުންނާނީ ހުސްވެފަ އެވެ.
ބުދަ ދުވަހު ރެސްކިއު ޓީމުން ބުނީ ކަނޑުގެ އަޑިން "ތެޅުމެއްގެ އަޑު" އިވުނު ކަމަށެވެ. އެހެންވެ، ސަބްމެރީނަށް ގެއްލުމެއް ނުވެ، އޭގައި ތިބި މީހުން ސަލާމަތުން ތިބިކަމުގެ އުއްމީދު ބޮޑުވި އެވެ.
އެހެން ނަމަވެސް އެއީ އެ އުޅަނދާ ގުޅުމެއް ނެތް އަޑުތަކަކަށް ވުން އެކަށީގެންވާ ކަމަށް ތަޖުރިބާކާރުން ބުންޏެވެ.
އިންގްލޭންޑުން ނިއުޔޯކަށް ކުރި ޓައިޓޭނިކްގެ ފުރަތަމަ ދަތުރުގައި 1912 ވަނަ އަހަރު ގަނޑުފެންގަނޑެއްގައި ޖެހި ބޯޓު އަޑިއަށް ދިޔުމުން 1500 އަށް ވުރެ ގިނަ މީހުން މަރުވި އެވެ.
ޓައިޓޭނިކް އޮންނަނީ އެމެރިކާގެ މަސަޗޫސެޓްސްގެ ކޭޕް ކޮޑްގެ އިރުން 900 މޭލު ދުރުން އެޓްލާންޓިކް ކަނޑު އަޑީގަ އެވެ. އެ ބޯޓު ބަލާލަން ދިޔުމަކީ ގިނަ ބަޔަކު ޝައުގުވެރިވާ ކަމެކެވެ.
އޯޝަންގޭޓް ކުންފުނިން ޓައިޓޭނިކް ބަލަން ދާން މީހެއްގެ އަތުން 250،000 ޑޮލަރު ނަގަ އެވެ. ގެއްލުނު ބޯޓުގައި ތިބީ އިނގިރޭސި ބިލިއަނަރަކާއި، ޕާކިސްތާނަށް އުފަން އިނގިރޭސި މަހުޖަނަކާއި އޭނާގެ ފިރިހެން ދަރި އަދި ފްރާންސްގެ އޯޝަނޮގްރާފަރަކާއި އޯޝަންގޭޓްގެ ފައުންޑަަރެވެ.
